ვინ არიან აფხაზეთში დაკავებული ქართველები და რა ხდება ცნობილი? - "იარაღი აშკარად ჩადებულს ჰგავს. ეს ყველაფერი სიტუაციის დასამძიმებლად არის გაკეთებული"
ოკუპირებული გალის სოფელ მეორე ოტობაიაში 2 ქართველი, რემიკო ჭითანავა და მურთაზ ჭითანავა დააკავეს.
20 აგვისტოს, აფხაზურმა მედიასაშუალებებმა გაავრცელეს ინფორმაცია, ოკუპირებული გალის სოფელ მეორე ოტობაიაში 2 ქართველის დაკავების თაობაზე. მათი ცნობით, თვითგამოცხადებული აფხაზეთის რესპუბლიკის ე.წ. სახელმწიფო უსაფრთხოების სამსახურმა გამოაცხადა, რომ აფხაზეთში "უცხო ქვეყნის მოქალაქეების არალეგალური მიგრაციის არხი გადაკეტა“.
მათი მტკიცებით, დაკავებულებს "ჰქონდათ აფხაზეთში ბინადრობის ნებართვა“ და ეხმარებოდნენ საქართველოს მოქალაქეებს საზღვრის უკანონოდ გადაკვეთაში.
"მათ შინა მეურნეობებში აღმოჩენილია F1 ტიპის ხელყუმბარა, RGD ტიპის 5 ხელყუმბარა, ტროტილი 1600 გ, პლასტიკური ასაფეთქებელი ნივთიერება - 45 გ, სხვადასხვა კალიბრის ვაზნები, ასევე დოლარის კუპიურების დასტა", - ნათქვამია დე ფაქტო უწყების განცხადებაში.
21 აგვისტოს საქართველოს სახელმწიფო უსაფრთხოების სამსახურმა გამოაქვეყნა განცხადება, რომელშიც ვკითხულობთ:
"უკანონო დაკავების ფაქტთან დაკავშირებით, საქართველოს სახელმწიფო უსაფრთხოების სამსახურმა მოახდინა ჟენევის საერთაშორისო დისკუსიების თანათავმჯდომარეებისა და საერთაშორისო პარტნიორების ინფორმირება. ამოქმედებულია ყველა არსებული მექანიზმი და აქტიურად მიმდინარეობს მუშაობა აღნიშნული პირების დაუყოვნებლივ გათავისუფლების მიზნით.
საოკუპაციო რეჟიმის მიერ განხორციელებული უკანონო დაკავებები ართულებს ადგილობრივი მოსახლეობის ყოველდღიურ ცხოვრებას და უკიდურესად აზიანებს უსაფრთხოების გარემოს. აღნიშნულიდან გამომდინარე მნიშვნელოვანია უკანონოდ დაკავებული პირის უპირობო გათავისუფლება.
საქართველოს მოქალაქეების მიმართ, საოკუპაციო რეჟიმის მხრიდან განხორციელებულ ძალადობრივ და უკანონო ქმედებებთან დაკავშირებით, საერთაშორისო თანამეგობრობამ არაერთგზის დააფიქსირა კონსოლიდირებული პოზიცია და დაგმო დანაშაულებრივი პრაქტიკა, რაც მიზანმიმართულად მკვიდრდება საქართველოს ოკუპირებულ ტერიტორიებზე.
საქართველოს ოკუპირებულ რეგიონებსა და საოკუპაციო ხაზის გასწვრივ განხორციელებულ ყველა დესტრუქციულ ქმედებაზე პასუხისმგებლობა ეკისრება საოკუპაციო ძალას“,- აღნიშნულია ინფორმაციაში.
ამ საკითხზე გვესაუბრება პოლიტოლოგი, პაატა ზაქარეიშვილი:
- ჯერჯერობით არანაირი დამატებითი ინფორმაცია არ მაქვს. რაც ვიცით, ეს სოხუმიდან გავრცელებული ინფორმაციაა - ეს ხალხი თითქოს ხელს უწყობდა ადამიანების გადაყვანას ზუგდიდიდან გალის რაიონში, ყველა, ვისაც მე ვიცნობ, მიიჩნევს, რომ ეს შეიძლება სიმართლეც იყოს, მაგრამ ეჭვებს ბადებს იარაღისა და ასაფეთქებელი ნივთიერების "აღმოჩენა"... ხალხის გადაყვანასთან რა საერთო აქვს იარაღის შენახვას, პირიქით, ეს ადამიანები იარაღს ამ ფორმით, წესით, არ შეინახავდნენ. აშკარად ჩადებულს ჰგავს და ეს ყველაფერი სიტუაციის დასამძიმებლად არის გაკეთებული...
რომ შევაფასო, ზოგადად, სიტუაცია აფხაზეთში, სამწუხაროდ, მსგავსი ამბები ხდება რეგულარულად. ქართველების წინააღმდეგ, მუდმივად არის საქმე აღძრული, რათა საზოგადოების ყურადღება არ მოადუნონ. ეს, სამწუხაროდ, არის პოლიტიკურად შეკერილი ამბები და ვინაიდან არ არსებობს არანაირი ქართულ-აფხაზური დიალოგები და ურთიერთობები პოლიტიკურ დონეზე, ამიტომ, სამწუხაროდ, ვერსად შევძლებთ ამ საკითხების მოგვარებას. ჩემთვის მიუღებელია მსგავსი დამოკიდებულება ქართველი მოსახლეობის მიმართ გალის რაიონში, ასევე მიუღებელია ის ფაქტი, რომ ეს საკითხები ასე მიგდებული და მიშვებულია ქართველების მხრიდან და არ არსებობს არავითარი ინსტიტუტი ამ საკითხის ფართოდ განხილვისთვის, მხოლოდ ლაპარაკია რაღაც ჰიპოთეზურ ურთიერთობებზე… სად ჩანს ეს ურთიერთობები? ჩვენ უნდა ვიცოდეთ ამ ურთიერთობების შესახებ.
ერთადერთი ადგილი, სადაც ეს საკითხები შესაძლებელია მოგვარდეს, მეტიც, უნდა გვარდებოდეს, არის ჟენევა, რომელიც ტარდება 3 თვეში ერთხელ და ისიც პოლიტიკურ და არა ასეთ ადამიანურ დონეზე დაყვანილ საკითხებზე. არ არსებობს პირდაპირი კონტაქტი თბილისი-სოხუმის დონეზე, ეს, რა თქმა უნდა, არ ამცირებს აფხაზური მხარის პასუხისმგებლობას იმაზე, რასაც აკეთებენ...
-
განახლება: 16:19
სუს-ის ინფორმაციით, ოკუპირებული გალის რაიონის სოფელ ოტობაიაში კიდევ ერთი ქართველი დააკავეს. წაიკითხეთ უწყების განცხადება სრულად
იხილეთ ასევე:
ავტორი: ანასტასია შალიკაშვილი