მარსზე წყალი თხევად მდგომარეობაში იპოვეს - რას აცხადებენ მეცნიერები?

NASA-ს მეცნიერებმა მარსზე პირველად აღმოაჩინეს წყალი თხევად მდგომარეობაში. ის პლანეტის ზედაპირის ქვეშ, 12-დან 20 კილომეტრის სიღრმეზე იპოვეს.

მეცნიერებმა ეს დაასკვნეს ზონდის NASA-ს Mars Insight Lander-ის მიერ შეგროვებული მონაცემების გაანალიზების შემდეგ. ანალიზის შედეგები გამოქვეყნდა ჟურნალში Proceedings of the National Academy of Sciences.

მეზობელ პლანეტაზე აქამდე უკვე იყო ნაპოვნი წყალი, მაგრამ არა თხევად მდგომარეობაში, არამედ პოლუსებზე ყინულის და ატმოსფეროში ორთქლის ნარჩენების სახით.

ზონდი 2018 წელს დაეშვა მეზობელი პლანეტის ზედაპირზე და 2022 წლის ბოლომდე ერთ ადგილზე იყო გაჩერებული და სეისმოგრაფის გამოყენებით მარსის ქერქის რყევებს იწერდა. მეცნიერებს სეისმური ტალღების სიჩქარის გაზომვით შეუძლიათ განსაზღვრონ, თუ რომელ გარემოში გადიან ისინი. მეცნიერები მიიჩნევენ, რომ ოდესღაც მარსის ზედაპირზე ბევრი წყალი იყო, ისევე როგორც ახლა დედამიწაზე. მარსის ზედაპირის კვლევები აჩვენებს, რომ ძველად პლანეტაზე მდინარეები და ტბები იყო.

"ეს არის რეალურად იგივე მეთოდი, რომელიც გამოიყენება დედამიწაზე წყლის, ნავთობის ან გაზის მიწისქვეშა საბადოების მოსაძებნად“, - განუმარტა BBC-ს კალიფორნიის უნივერსიტეტის პროფესორმა მაიკლ მანგამ, რომელიც პროექტში იყო ჩართული. წყარო

იხილეთ ასევე:

• მარსზე კოლონიის აშენებამდე არც ისე დიდი დრო რჩება? - რა აჩვენა წითელ პლანეტაზე ადამიანის საცხოვრებელი გარემოს სიმულაციამ და რა დაასკვნეს მეცნიერებმა