ევაკუაცია აეროპორტში, ბომბის არსებობის საფრთხე, თავდასხმა სარკინიგზო ქსელზე - რა ხდება საფრანაგეთში ოლიმპიადის დაწყებამდე რამდენიმე საათით ადრე (ფოტოები)
რამდენიმე საათში პარიზში ოლიმპიადის გახსნის ცერემონია დაიწყება, თუმცა მანამდე ფრანგი სამართალდამცველები სერიოზული გამოწვევის წინაშე არიან. მთელი დღეა, არეულობის შექმნის მცდელობას ვხედავთ.
ოლიმპიური თამაშების გახსნის ცერემონიის წინ, საფრანგეთის ჩქაროსნულ სარკინიგზო ქსელზე რამდენიმე თავდასხმა განხორციელდა.
საფრანგეთის ეროვნული რკინიგზის ცნობით, კომპანიის ობიექტებს ცეცხლი განზრახ წაუკიდეს და დაზიანებულ ხაზებზე მოძრაობა შეფერხდა. აღდგენის სამუშაოები კი ამ დრომდე მიმდინარეობს.
გარდა ამისა, აზელ-მიულუზის აეროპორტში ევაკუაცია გამოცხადდა, რადგან სამართალდამცავებს "ბომბის არსებობის" შესახებ შეატყობინეს. ბომბი არ აღმოჩდა და აეროპორტმა მუშაობა განაახლა.
ევაკუაციის შემდეგ, საფრანგეთში, ბაზელ-მიულუზის აეროპორტმა მუშაობა განაახლა, - ამის შესახებ განცხადებას აეროპორტი ავრცელებს. მათივე ცნობით, ზოგიერთი რეისი გაუქმდა და ზოგიც გადაიდო.
როგორც აეროპორტის მიერ გავრცელებულ განცხადებაშია ნათქვამი, მგზავრების ევაკუაცია უსაფრთხოების მიზნით გახდა საჭირო. ორივე შემთხვევაზე დაწყებულია გამოძიება, თუმცა ამ ეტაპზე უცნობია, ვინ დგას ამ ყველაფრის მიღმა.
აღსანიშნავია, რომ რამდენიმე დღის წინ საფრანგეთში რუსეთის მოქალაქე დააკავეს ჯაშუშობისა და არეულობის მოწყობის ბრალდებით.