საფრანგეთის პოლიციამ დააკავა რუსეთის მოქალაქე, რომელიც  პარიზის ოლიმპიადის დროს დესტაბილიზაციის მოწყობას გეგმავდა

საფრანგეთის პოლიციამ დააკავა რუსეთის მოქალაქე, რომელიც ეჭვმიტანილია პარიზის ოლიმპიადის დროს დესტაბილიზაციის მოწყობის დაგეგმვაში. ამის შესახებ ფრანგული მედია სამართალდამცველებზე დაყრდნობით წერს.

• მედიის ინფორმაციით, 1984 წელს დაბადებული მამაკაცი ამზადებდა "რუსულ ოპერაციას, საფრანგეთში არეულობის გამოწვევის მიზნით“. დანაშაული 30 წლამდე ვადით თავისუფლების აღკვეთას ითვალისწინებს.

სხვა დეტალებს სამართალდამცველები არ ასახელებენ, არც დაკავებულის ვინაობაა ცნობილი, თუმცა ხაზგასმით აღნიშნავენ, რომ დანაშაული, რომელიც მზადდებოდა, არ იყო ტერორისტული ხასიათის.

საფრანგეთის შს მინისტრის ცნობით, უსაფრთხოების ზომები განსაკუთრებით გამკაცრებულია და სწორედ უსაფრთხოების ფარგლებში სამართალდამცველებმა მილიონზე მეტი ადამიანი გამოიკვლიეს ოლიმპიადის წინ. მათგან 4360 ადამიანს უარი ეთქვა ოლიმპიადაზე დასწრებაზე "უცხოური ჩარევის ეჭვების გამო“.