"აფხაზებს აშფოთებს, რომ ამ ტერიტორიაზე დიდი რაოდენობით ჩამოსახლდებიან რუსები, რაც გამოიწვევს დემოგრაფიული ბალანსის დარღვევას" - რა ხდება აფხაზეთში?
ოკუპირებულ აფხაზეთში დაძაბულობა, რაც წინა კვირაში ლამის მღელვარებაში გადაიზარდა, გრძელდება. ადგილობრივების პროტესტი “ბინების შესახებ კანონპროექტმა“ გამოიწვია. გასული კვირის მთავარი თემა ხელისუფლების მხრიდან ბინების მშენებლობის ლეგალიზაციის მორიგი მცდელობა გახდა. ამ საკითხთან დაკავშირებით გვესაუბრება პოლიტოლოგი პაატა ზაქარეიშვილი.
- როგორც ცნობილია, აფხაზეთში დიდი უკმაყოფილება მოჰყვა აფხაზეთის დე ფაქტო პრეზიდენტის, ასლან ბჟანიას ადმინისტრაციის მომზადებულ კანონპროექტს "აპარტ-სასტუმროების და ბინების სამართლებრივი სტატუსის მოწესრიგების შესახებ“, რომელიც, ფაქტობრივად, აუქმებს აფხაზეთში უცხოელების მიერ საცხოვრებლის შეძენის დღეს მოქმედ აკრძალვას. აფხაზების პროტესტი საკმაოდ ხმაურიანი გამოდგა. რა იცით, მიმდინარე მოვლენების შესახებ, რა საფრთხეს ხედავენ აფხაზები და რა პრობლემები შეიძლება შეუქმნას ამ კანონმდებლობამ საქართველოს სამომავლოდ?
- აფხაზებს აშფოთებს და მათთვის მიუღებელია ეს კანონმდებლობა, რადგან კანონის ამოქმედების შემთხვევაში ამ ტერიტორიაზე დიდი რაოდენობით ჩამოსახლდებიან რუსები, რაც გამოიწვევს დემოგრაფიული ბალანსის დარღვევას. როგორც ვხედავთ, მოსახლეობის მკაფიო და მკაცრ რეაქციას მოყვა ის, რომ დე ფაქტო პარლამენტის ბევრმა დეპუტატმა უკვე განაცხადა, რომ კანონპროექტს ხმას არ მისცემს. შესაბამისად, შეგვიძლია ვივარაუდოთ, რომ თუ მათი რაოდენობრივი უპირატესობა იქნება და ჯერჯერობით არის კიდეც, ამ კანონპროექტს გაიწვევენ. საქართველოს რაც შეეხება, ეს საკითხი ასევე პრობლემურია მთელი ქვეყნისთვის - აფხაზეთის ტერიტორიაზე საკმაოდ დიდი რაოდენობით უცხოელი მოქალაქეების ჩამოსახლება ნამდვილად არ არის მისაღები. აქამდე ჩვენ მზად ვიყავით და ვართ კიდევაც, რომ მოქალაქეობა მივცეთ აფხაზებს და არამარტო მათ, მთლიანობაში ბოლო წლების განმავლობაში, ვინც დაიბადა და გაიზარდა ამ ტერიტორიაზე, მაგრამ საქართველომ არ უნდა მისცეს მოქალაქეობა იმათ, ვინც კანონის მიღების შემთხვევაში ჩამოსახლდებიან...
- ჩვენ ვიცით, რა დაჟინებული მოთხოვნა ჰქონდა რუსეთს ბიჭვინთის აგარაკების შემთხვევაში, ახლა როგორია რუსეთის ხელისუფლების პოზიცია, უნდა ვივარაუდოთ, რომ ბჟანია ამ ზეწოლის ქვეშ მოქმედებს, თუ მისთვის ეს ფინანსური მოგების მორიგი საშუალებაა?
- როგორც აფხაზები ამბობენ, ბჟანიასთვის და მისი გუნდისთვის ეს არის ერთი მხრივ ფინანსური ინტერესები და მეორე მხრივ რუსეთის წინაშე გარკვეული ვალდებულებები ძალაუფლების შენარჩუნების სანაცვლოდ... არ შეიძლება რუსეთისგან გქონდეს იმედი ძალაუფლების შენარჩუნების თვალსაზრისით, ეს შეეხება “ქართულ ოცნებასაც”, სანაცვლოდ კრემლის მხრიდან მერე ისეთ მოთხოვნები იწყება, რამაც შეიძლება ძალიან მძიმე მდგომარეობაში ჩაგაგდოს. ბიჭვინთას რაც შეეხება, იქ ჯერ კიდევ არაა დასრულებული ეს პროცესი, თუმცა შეიძლება დასრულდეს ნებისმიერ დროს...
- აფხაზეთში არსებულ ზოგად ვითარებას რომ შევეხოთ, ბოლო წლების განმავლობაში თუ შეიცვალა რაიმე ქართველებთან დაკავშირებით, თუნდაც იმ ცნობილი სოციალური პროგრამის შედეგად?
- არსებითად არაფერი შეცვლილა, ჩვენთან აქამდეც დაკავშირებული იყო გალის რაიონი და არის დღემდე. დანარჩენი კი, აფხაზებს ქართველებთან არანაირი საერთოს ქონა არ უნდათ... ისინი ელოდებიან საქართველოსგან ძალის არგამოყენებაზე ხელშეკრულებაზე მოლაპარაკების დაწყებას, რასაც საქართველო არ აპირებს, ამიტომ ამ მიმართულებით გაჩერებულია სიტუაცია..
ავტორი: ანასტასია შალიკაშვილი