“მოერიდეთ უმ საკვებს, შესაძლოა, ადგილი ჰქონდეს გადახურებას“ - ინფექციონისტის რეკომენდაციები: რა უნდა გაითვალისწინოთ, თუ ზღვაზე დასვენებას გეგმავთ
ინფექციონისტი, მაია ბუწაშვილი ზღვის სეზონზე არსებული გამოწვევებისა და გართულებების თავიდან აცილებისთვის რეკომენდაციებს იძლევა. მისი თქმით, ზაფხულის სეზონისთვის, დამახასიათებელია ღებინებით და დიარეით მიმდინარე როგორც ვირუსული ისე ბაქტერიული ინფექციები.
ბუწაშვილი “ინტერპრესნიუსთან“ განმარტავს, თუ რა დაავადებებს უნდა უფრთხილდეთ, თუ ზღვაზე დასვენებას აპირებთ.
“როდესაც ვსაუბრობთ ინფექციურ დაავადებებზე, უნდა აღინიშნოს დიარეული დაავადებები, ანუ ნაწლავური ინფექციები. ადამიანები, რასაც მოწამვლას ეძახიან, უკავშირებენ ზღვის წყალს, მაგრამ უფრო მეტად კვების ობიექტებზე ხდება ინფიცირება. ზღვის კურორტებზე, ადამიანების ძალიან დიდი კონცენტრაცია შეიმჩნევა. კვების ობიექტების დატვირთვისას ჰიგიენური ნორმების დაცვა სათანადოდ არ ხდება. საკვების შენახვის პროცედურები შესაძლოა ირღვეოდეს. სიცხის დროს თუ ცივ პირობებში არ ხდება პროდუქტის შენახვა, ეს ჯანმრთელობის მდგომარეობას პრობლემას უქმნის.
შესაძლოა, კვების ობიექტებში ბოსტნეულის რეცხვა დარღვეული იყოს, რაც ხელს უწყობს ინფექციების გავრცელებას. ხშირია ღებინებით, დიარეით მიმდინარე დაავადებები. კლასიკური მოწამვლა და არაინფექცია ვლინდება მაშინ, როდესაც საკვებში მზა ტოქსინია და 2-3 საათში იწყება ღებინება. ეს მზა საკვების არასწორ პირობებში შენახვისას მასში გამომუშავებული ტოქსინის შედეგია. ხშირად ვხედავთ, რომ ადამიანები დასასვენებლად მიდიან და იქ ეწყებათ ღებინება, დიარეა, ზოგჯერ კი ტემპერატურაც. შემდეგ უკან დაბრუნება უწევთ, პრობლემები ექმნებათ დასვენების დროს.
- ზაფხულის სეზონისთვის, მით უმეტეს კურორტებისთვის, ღებინებით და დიარეით მიმდინარე როგორც ვირუსული ისე ბაქტერიული ინფექციებია დამახასიათებელი. თუ ადამიანს ჩივილი არ აქვს და თავს ჯანმრთელად გრძნობს, ზღვის კურორტიდან დაბრუნებისას ჯანმრთელობის მდგომარეობის დიაგნოსტიკისთვის, კვლევის ჩატარების აუცილებლობა არ არის.
რთულია უნივერსალურ პრევენციულ ზომებზე საუბარი მაგრამ ძირითადად რამდენიმე წესია. პირველი: ხელის დაბანა და პირადი ჰიგიენა. უმჯობესი იქნება, სწრაფი კვების თუ სხვა ობიექტებში არ მივიღებთ უმ საკვებს, სალათებს, კრემიან ნამცხვრებს, სადაც მაღალია რისკი. თერმულად, ახლად დამუშავებული საკვები ამ მხრივ უფრო უსაფრთხოა, რომელიც ცხელია და თერმულად დამუშავდა ნაკლებ საფრთხეს შეიცავს.
ასევე ზღვის კურორტებზე ხშირია მზესთან, სიცხესთან დაკავშირებული პრობლემები. სიფრთხილეა საჭირო. შესაძლოა, ადგილი ჰქონდეს გადახურებას, “მზის დაკვრას“. აქტიურ საათებში მზეს მოვერიდოთ. დილით და საღამოს გავიდეთ სანაპიროზე, ბევრი სითხე, წყალი მივიღოთ“, - აღნიშნა ბუწაშვილმა.
წყარო: interpressnews
ასევე იხილეთ: