ქალს, რომელზეც ქმარმა იძალადა, ბრალი ალკოჰოლის მიღებისა და თვითმკვლელობის მცდელობისთვის წაუყენეს - დუბაიში მომუშავე სტიუარდესას უმძიმესი ისტორია
დუბაიში ირლანდიელი სტიუარდესა დააკავეს და სავარაუდოდ, ოჯახური ძალადობის შემდეგ, მას ალკოჰოლის მიღებისა და თვითმკვლელობის მცდელობის გამო პატიმრობა ემუქრება.
28 წლის, ტორი ტოუი, წარმოშობით ბოილიდან, როსკომონის საგრაფოდან არის. ის Emirates Airlines-ში მუშაობს. ახლა მას ქვეყნიდან გასვლა აქვს აკრძალული.
სამართლებრივი ჯგუფის, Detained in Dubai (DiD) წარმომადგენლის თქმით, ტორის სამხრეთ აფრიკელი ქმარი დანით დაედევნა და დაარტყა, შემდეგ კი აბაზანის კართან ხელი მოუჭირა და ცდილობდა, მისთვის მკლავი გადაეტეხა.
ტორიმ თქვა, რომ თავდასხმის შემდეგ, რამაც მას მძიმე დაჟეჟილობები და დაზიანებები დაუტოვა, თავის მოკვლა სცადა.
მაგრამ პოლიციის განყოფილებაში მიყვანის შემდეგ, ტოუის დუბაის სასამართლოს მიერ ალკოჰოლის მოხმარებასა და თვითმკვლელობის მცდელობაში ახლა ბრალი წარედგინა.
მისი თქმით, ქვეყანას ვერ ტოვებს, რადგან მისი პასპორტი დაბლოკილია, რაც ნიშნავს, რომ ირლანდიაში ვერ დაბრუნდება.
- DiD-ის მეშვეობით, ტოუიმ განაცხადა: "არ ვიცი, რა მოხდება სასამართლოში მომავალ კვირას. სასოწარკვეთილი ვარ, მინდა, ირლანდიაში დავბრუნდე და ეს ყველაფერი წარსულს ჩავაბარო. მივმართავ პრემიერ-მინისტრს, გთხოვთ, დაგვეხმაროთ."
DiD-მა განაცხადა, რომ ტოუის შეიძლება ხანგრძლივი პატიმრობა ემუქრებოდეს იმ ციხეში, რომელიც "ადამიანის უფლებების დარღვევებითა და წამებითაა" ცნობილი.
Detained in Dubai-ის აღმასრულებელი დირექტორი, რადა სტირლინგი, აცხადებს: "ჩვენ მოვუწოდებთ დუბაის ხელისუფლებას, სასწრაფოდ მოხსნას ბრალდებები ტორის წინააღმდეგ, გააუქმოს მოგზაურობის აკრძალვა და მისცეს მას საშუალება, დედასთან ერთად გაფრინდეს სახლში, ირლანდიაში. მას ბრალი თვითმკვლელობის მცდელობასა და ალკოჰოლის მოხმარებაში ედება.
უცნაურია, რომ არაბთა გაერთიანებული საემიროები საზოგადოებრივი ურთიერთობების დიდ რესურსებს ქვეყანაში ალკოჰოლის ლეგალურობის პროპაგანდისთვის ხარჯავს. რეალურად, ადამიანებს კვლავ რეგულარულად ედებათ ბრალი ალკოჰოლის მოხმარებასა და ფლობაში. ტორის გამოცდილება უბრალოდ ტრაგიკულია და გულახდილად რომ ვთქვათ, მას გაუმართლა, რომ საერთოდ, ცოცხალია."
შემდეგ მან განმარტა: "ტორიმ ირლანდიაში დაბრუნება დაგეგმა, მაგრამ როდესაც აეროპორტში მივიდა, უთხრეს, რომ მის წინააღმდეგ ქმრის მიერ აღძრული საქმე შეწყდა, მაგრამ მოგზაურობის აკრძალვა დარჩა.
მან პოლიციის განყოფილებას მიმართა, სადაც დაარწმუნეს, რომ მოგზაურობის აკრძალვა მოიხსნებოდა, მაგრამ ეს არ მომხდარა. მეორე დღეს ტორიმ და მისმა ქმარმა ცოტა ღვინო დალიეს, უცებ ქმარი გაბრაზდა და ცოლი ღალატში დაადანაშაულა".
ტოუიმ შემდეგ სუიციდი სცადა და პოლიციის განყოფილებაში აღმოჩნდა.
სტირლინგმა აღნიშნა: "შემდეგი, რაც ახსოვს, არის სასწრაფო დახმარების ბრიგადა და პოლიცია, რომლებმაც გამოაღვიძეს. ალ ბარშას პოლიციის განყოფილებაში წაიყვანეს და სახლში დაბრუნებამდე კიდევ რამდენიმე საათი ჰყავდათ დაკავებული.
ირლანდიის პრემიერ-მინისტრმა, საიმონ ჰარისმა განაცხადა, რომ იმუშავებს ამ "საშინელ" ამბავში ჩართვაზე, ხოლო საქმე ირლანდიის პარლამენტში დეპუტატმა მარი ლუ მაკდონალდმა წამოსწია.
ჰარისმა მადლობა გადაუხადა მაკდონალდს და თქვა, რომ დეპუტატთან ერთად იმუშავებს "საქმეში ჩართვისა და იმის დასადგენად, თუ როგორ შეგვიძლია, დავეხმაროთ ირლანდიის მოქალაქეს".
ხოლო მაკდონალდის თქმით, ის ტოუის ესაუბრა.
"ტორის უბრალოდ, სახლში დაბრუნება სურს. ახლა ვითხოვ, როგორც აბსოლუტურად გადაუდებელ საკითხს, რომ გავაკეთოთ განცხადება ამ პალატიდან, რათა თქვენ, პრემიერ-მინისტრო, საქმეში ჩაერიოთ, ელჩი გამოიძახოთ და ცხადად განუცხადოთ დუბაის ხელისუფლებას, რომ არც ერთ ქალს არ უნდა მოექცნენ ასე, და ირლანდიის მოქალაქეს, ირლანდიელ ქალს ასე ვერ მოეპყრობიან", - განაცხადა მან.
ჰარისმა უპასუხა, რომ ტოუის საქმის შესახებ არაფერი იცოდა და მას ინფორმირებისთვის მადლობა გადაუხადა.
Sky News-თან საუბრისას, ტორის დეიდამ, ენ ფლინმა თქვა: “ეს ძალიან სტრესულია მთელი ოჯახისთვის".
მან აღწერა თავისი დისშვილი, როგორც "ლამაზი ახალგაზრდა ქალი", რომელიც "მხიარულია და მოგზაურობა უყვარს".
"მან Emirates-ში თავისი ოცნების სამსახური დაიწყო და სამსახურთან ერთად, მოგზაურობაც შეეძლო. დუბაი უყვარდა, იქ მეგობრების ფართო ქსელი აქვს".
სტიუარდესას უთხრეს, რომ "ვერაფერი გაკეთდებოდა" და რომ საქმე სასამართლოში 18 ივლისს გადავა.