"საქორწილო კაბა ეკლესიიდან გამოსვლისთანავე გამოვიცვალე" - ვინ არის გურამ კაშიას სამართალმცოდნე მეუღლე: კაპიტნის პირადი ცხოვრება და ოჯახური იდილია

"დღეს ოქროს ბიჭის დაბადების დღეა, შენ საუკეთესო ხარ, კაპიტნად დაბადებული, ოჯახის სიამაყე, მიყვარხარ“ – ასე მიულოცა ორი დღის წინ საქართველოს ნაკრების კაპიტანს გურამ კაშიას მეუღლემ დაბადების დღე.

ევროპის ჩემპიონატზე გასვლის პარალელურად ინტერესი საქართველოს ნაკრების წევრების მიმართ გაიზარდა. ყოველდღიურად მედიაში არაერთი ინფორმაცია ქვეყნდება მათ ცოლებზე, მშობლებზე, შვილებზე. გამონაკლისი არც გურამ კაშიაა. 37 წლის კაპიტანმა 22 წლის ასაკში თამთა გიგაშვილზე იქორწინა. წყვილს ერთი ქალიშვილი ჰყავს, ალექსანდრა.

თამთა პროფესიით სამართალმცოდნეა, თუმცა დაოჯახების შემდეგ, ყოველთვის მეუღლეს ახლავს იმ ქვეყანაში, სადაც ის თამაშობს. მისი ცხოვრება ფეხბურთელების ცოლებისას ჰგავს. ხშირი მოგზაურობა, ყურადღება მედიისგან და უარი საკუთარ კარიერაზე.

ერთმანეთი საერთო მეგობარმა გააცნოთ, თუმცა მოვლენები სწრაფად განვითარდა და მალე აღმოაჩინეს, რომ შეყვარებულები იყვნენ. ბევრი აღარ უფიქრიათ და დაოჯახება გადაწყვიტეს, მაშინ ორივე 22 წლის იყვნენ.

მოგვიანებით თამთა იხსენებდა:

- ერთად თავს კომფორტულად ვგრძნობდით და ერთმანეთის ყოველთვის უთქმელად გვესმოდა. დიდი ქორწილი არ გვქონია, რადგან არც მე და არც გურამს არ გვქონდა ამის სურვილი. ჩვენი ერთად ცხოვრების დასაწყისი უახლოესი მეგობრების გარემოცვაში აღვნიშნეთ... თეთრი კაბის ჩაცმასა და ქორწილზე არასდროს მიოცნებია. ალბათ ამიტომაც, საქორწილო კაბა ეკლესიიდან გამოსვლისთანავე გამოვიცვალე.

კაპიტანი საუკეთესო მეუღლეა, ამას 15 წლიანი ქორწინებაც მოწმობს. ცოლი ამბობს, რომ მათ ოჯახში სრული იდილიაა და ილუზიებით არ ცხოვრობენ.

- საუკეთესო მეუღლეა და ამავე დროს, ჩემი საუკეთესო მეგობარიცაა. რომანტიკული "ნატურა" არც ერთი არ ვართ. ცხოვრებას რეალური თვალით ვუყურებთ, ილუზიებით არ ვცხოვრობთ. ხასიათებითაც ახლოს ვართ ერთმანეთთან. თითქმის ყველაფერზე ერთნაირი შეხედულებები გვაქვს, რის გამოც ჩვენს ოჯახში სრული იდილიაა.

მასთან ძალიან თავისუფლად და კომფორტულად ვიყავი. არ მახსოვს, რომ რაიმეზე სერიოზულად გვეკამათოს, ყველაფერზე ვთანხმდებით და სრული თავისუფლება გვაქვს ერთმანეთში.

ბედნიერია გურამ კაშიაც, რომელიც წლების შემდეგ, მეუღლეზე იტყვის, რომ ის ყველაზე ლამაზი ადამიანია ვინც კი შეხვედრია.

- პირველივე დანახვაზე ვიგრძენი, რომ ძალიან მომეწონა, ყველაზე ლამაზი ადამიანი იყო, ვინც კი შემხვედრია. ვეცადე რომ ურთიერთობაში შევსულიყავი და გამომივიდა. ერთმანეთის ძალიან კარგად გვესმის და პირად სივრცეს პატივს ვცემთ. ვეხმარებით ერთმანეთს.

2021 წლიდან ოჯახი სლოვაკეთში ცხოვრობს. გურამ კაშია „სლოვანის“ ფეხბურთელია.

საინტერესო ფაქტები გურამ კაშიაზე

თამთამ და გურამმა 2009 წელს იქორწინეს. მათი გოგონა, ალექსანდრა 2013 წელს დაიბადა.

გურამ კაშიას ჰყავს ორი წლით უფროსი ძმა, შოთა კაშია, რომელიც ასევე ფეხბურთელია და 2013 წლიდან საჩხერის „ჩიხურაში“ თამაშობს. კაპიტანმა ერთ-ერთ ინტერვიუში განაცხადა, რომ მისი უფროსი ძმა იყო მიზეზი, რის გამოც მან ბავშვობაში ფეხბურთის თამაში დაიწყო."თავიდან არ მქონია ფეხბურთის ამოჩემება. სპორტი ყოველთვის მაინტერესებდა. ჯერ კალათბურთი მიზიდავდა, შემდეგ რაგბი - მამაჩემი იყო მორაგბე და უნდოდა, რომ მეორე შვილი მაინც გაჰყოლოდა ამ გზას, მაგრამ ბოლოს მაინც ფეხბურთმა მძლია და ჩემი ძმის გზას გავყევი. მამის ტრადიცია არც ერთმა არ გავაგრძელეთ" - იხსენებდა მოგვიანებით.

2017 წლის ნოემბერში, „ვიტესში“ თამაშისას, კაშიას ცისარტყელა სამკლაური ეკეთა, Coming Out Day-ის ფარგლებში. მის მიერ გეების უფლებებისადმი მხარდაჭერის გამოხატვის გამო, საქართველოს ფეხბურთის ფედერაციასთან მცირერიცხოვანი აქცია გაიმართა, ისინი ნაკრებიდან კაშიას გაყვანას ითხოვდნენ. აქციაზე რვა ადამიანი დააკავეს.

„მე ყოველთვის მხარს ვუჭერ ადამიანების თავისუფლებას და ყოველთვის წინააღმდეგი ვარ ძალადობის. მანამ, სანამ ადამიანი სხვებს რაიმე ცუდს არ გაუკეთებს, მე მხარს დავუჭერ მას,” - ამბობდა კაპიტანი.

2018 წლის დეკემბერში მაშინდელმა საქართველოს პრეზიდენტმა გიორგი მარგველაშვილმა ბრწყინვალების საპრეზიდენტო ორდენი გადასცა.