ტენერიფეზე 19 წლის ბრიტანელ ბიჭს ეძებენ - ძებნის ოპერაცია თითქმის 10 დღეა მიმდინარეობს, მაგრამ ჯეის კვალი არ ჩანს: რა დეტალები ხდება ცნობილი?
უცხოური მედიის ცნობით, ბრიტანელი ახალგაზრდა ჯეი სლეიტერი ესპანეთში, კუნძულ ტენერიფეზე 17 ივნისს გაუჩინარდა. სავარაუდოდ, ბიჭი მას შემდეგ დაიკარგა, რაც ავტობუსმა გაასწრო და თავის საცხოვრებელში ფეხით დაბრუნებას შეეცადა.
19 წლის ბიჭი წარმოშობით ლანკაშირის საგრაფოდან, კერძოდ, ოსვალდტვისლიდან არის. ის ესპანეთის კუნძულ ტენერიფეზე მეგობრებთან ერთად, მუსიკალურ ფესტივალზე დასასწრებად ჩავიდა, მაგრამ 17 ივნისის მერე აღარავის უნახავს.
ამჟამად, კუნძულის ჩრდილო-დასავლეთით მდებარე მიუვალ ტერიტორიაზე მასშტაბური სამძებრო ოპერაცია მიმდინარეობს.
როგორც ცნობილია, 16 ივნისის ღამეს, ჯეი სოფელ მასკას მახლობლად, Airbnb-ის საცხოვრებელში წვეულებაზე იმყოფებოდა. სახლში წასვლა როცა დააპირა, უთხრეს, რომ ლოს-კრისტიანოსის მიმართულებით, სადაც ის რჩებოდა, ავტობუსი ყოველ 10 წუთში ერთხელ მიდიოდა.
Airbnb-ის საცხოვრებლის მფლობელმა მოგვიანებით დაინახა, როგორ მიდიოდა აღმართზე ახალგაზრდა. ჯეიმი, რომლემაც, სავარაუდოდ, არ იცოდა, რომ ამ მარშრუტით სიარულს დაახლოებით 10 საათი დასჭირდებოდა.
დილის 8:30-ზე მან თავის მეგობარ ლუსის დაურეკა და უთხრა, რომ ავტობუსმა გაასწრო და "უკაცრიელ ადგილას" დაიკარგა. მისი თქმით, დაახლოებით ნახევარი საათი დადიოდა, წყალი სწყუროდა, ფეხი კაქტუსზე გაიჭრა და ტელეფონის ელემენტი მხოლოდ 1%-ზე იყო.
შემდეგ ზარი გაწყდა და ბოლო სიგნალი მთიან Teno Rural პარკში დაფიქსირდა.
დილის 9:00 საათზე დაკარგული პირის შესახებ შეიტანეს განცხადება, ჯეის ძებნა კი უკვე დღეებია დრონებით, ძაღლებითა და ვერტმფრენით მიმდინარეობს.
გასული დღეების განმავლობაში იყო ცნობები, რომ ჯეი თითქოს კუნძულის ამა თუ იმ არეალში ნახეს, თუმცა, ჯერჯერობით, ბიჭის კვალი არ ჩანს.