რამაზან კადიროვის 2 არასრულწლოვანი ვაჟი საიდუმლოდ დაქორწინდა ჩეჩნეთის გავლენიანი ოჯახების შთამომავლებზე - რატომ გადაწყდა თითქმის ბავშვების დაქორწინება?

Novaya Gazeta Europe-ს წყაროების თანახმად, 8 ივნისს, ჩეჩნეთის რესპუბლიკაში, კადიროვის ორი ვაჟის - 17 წლის ელი კადიროვის და 16 წლის ადამ კადიროვის ქორწილი გაიმართა. ჩეჩნეთის მეთაურის უფროსი ვაჟის, ახმატის ძვირადღირებული ქორწილისგან განსხვავებით, რომელიც 2023 წლის მარტში იყო, ამჯერად ყველაფერი გააკეთეს იმისთვის, რომ ინფორმაციას მედიამდე არ მიეღწია.

ჩეჩნეთის უშიშროების სამსახურმა დავალებას კარგად გაართვა თავი, რომ არა ერთი ინციდენტი, რომელიც ტრაგედიით დასრულდა. 8 ივნისს, ქორწილის დღეს, ცენტრალურ გზატკეცილზე მოძრაობა შეიზღუდა, რათა ქორწილის მანქანებს უპრობლემოდ გაევლოთ. რამდენიმესაათიანი ლოდინის შემდეგ პოლიციამ ყურადღება მოადუნა და "ფორდის" ფირმის მანქანა გზაზე გადავიდა, სწორედ ამ დროს გამოჩნდა საქორწინო კოლონა, რომლის პირველივე მანქანა Rolls-Royce - მთელი სიჩქარით დაეჯახა "ფორდს" და გზა გააგრძელა. წყაროს ინფორმაციით, ფორდის მძღოლი საავადმყოფოში გადაიყვანეს.

ინციდენტის შემდეგ საგზაო პოლიციის თანამშრომლები, რომლებმაც ვერ უზრუნველყოფდნენ კავკასიის ფედერალური გზატკეცილის "გასუფთავება“, მკაცრად დაისაჯნენ.

ელი კადიროვის მოახლოებული ქორწილის შესახებ ერთადერთი წყარო თავად ჩეჩნეთის ხელმძღვანელი იყო. 8 ივნისს სიახლე თავის Telegram-ის არხზე გააზიარა. კადიროვი წერდა, რომ ქორწილის წინა დღეს ელი პუტინს შეხვდა. ჩეჩნეთის ხელმძღვანელს სიტყვა არ უთქვამს, რომ ელისთან ერთად მეორე ვაჟი, ადამიც ქორწინდებოდა. მედია წერს, რომ მიზეზი ახალდაქორწინებულთა ასაკია, რომლებიც არასრულწლოვანები არიან.

• პატარძლები

ელი კადიროვმა ცოლად ჩეჩნეთის სახელმწიფო სათათბიროს დეპუტატის ადამ დელიმხანოვის უფროსი შვილიშვილი მოიყვანა, ხოლო 16 წლის ადამ კადიროვმა ჩეჩენი სენატორის სულეიმან გერემეევის ქალიშვილი.

სოციალურ ქსელში არსებობს ორი ვიდეო, დელიმხანოვების ოჯახის მონაწილეობით. ერთ ვიდეოში გოგონა საყვარელ ბაბუას დაბადების დღეს ულოცავს. მეორეში კი დედის დაბადების დღეზე მღერის. ორივე ვიდეო გადაღებულია ექვსი წლის წინ და მათში დელიმხანოვის შვილიშვილი მთლად ბავშვია.

გოგონა დელიმხანოვის უფროსი ქალიშვილის ხედას შვილია, რომლის გამოც, მამა ერთხელ უკვე გაეხვა სკანდალში. 2020 წელს ინტერნეტში გამოჩნდა ვიდეო, რომელიც გადაღებული იყო ხედას დაბადების დღეზე. სიუჟეტი აღებული იყო ცნობილი თურქული სერიალიდან "დიდებული საუკუნე". ვიდეოში ხედა ამბობს: "მე, ხედა დელიმხანოვა, ადამ სულთანოვიჩისა და მაკა ზაურბეკოვნასგან დაბადებული... მზისა და მთვარის სულთანი...“

ვიდეომ კადიროვის თვალში არამხოლოდ ხედა არამედ მთელი დელიმხანოვის ოჯახი დააზარალა. ჩეჩნეთში ხომ მხოლოდ ერთი "სულთანია“ - აიშატ კადიროვა, რამზან კადიროვის უფროსი ქალიშვილი.

ვიდეოს გამოქვეყნებისას ხედა 31 წლის იყო. რაც იმას ნიშნავს, რომ მისი ასაკისა და ქორწინების თარიღის მიხედვით, მისი ქალიშვილი არ შეიძლება 14 წელზე მეტის იყოს.

• ქალიშვილები

ოთხი ახალდაქორწინებულიდან, რომელთა ქორწილიც ჩეჩნეთში 8 ივნისს გაიმართა, სულ მცირე სამი არასრულწლოვანია.

ეს საიდუმლო, სწრაფი და საეჭვო ქორწინებები, ირიბად ადასტურებს იმ ფაქტს, რომ ჩეჩნეთში ვითარება ბოლო დროს ფორსმაჟორული სცენარის მიხედვით მიდის.

წელიწად ნახევრის წინ, კადიროვის გახანგრძლივებულმა დაავადებამ (პანკრეასის ნეკროზი) პროგრესირება დაიწყო და გასული წლის სექტემბერში მას ახალი დიაგნოზი დაუსვეს, რამაც, წყაროს თქმით, სასოწარკვეთაში ჩააგდო. ის შეაშფოთა თავისი შთამომავლების მომავალმა, რადგან იცის რა საფრთხეები შეუქმნა შვილებს თავისი სასტიკი მმართველობით. ამიტომ ცდილობს დაიცვას ისინი ყველა შესაძლო გზით, ერთ-ერთია მისი ვაჟების პირადი შეხვედრები პრეზიდენტ პუტინთან, რითაც საზოგადოებას აჩვენებს, რომ უსაფრთხოების გარანტიები ვრცელდება მემკვიდრეებზე.

რაც შეეხება საქორწინო კავშირებს გავლენიან ჩეჩნურ ოჯახებთან, ესეც შვილების უსაფრთხოების მთავარი გარანტია მას შემდეგ, რაც თავად გარდაიცვლება. ამიტომ ჩქარობს.

ჩეჩნეთის ლიდერის შვილებიდან მხოლოდ უფროსი ქალიშვილი აიშატი დაქორწინდა სრულწლოვანებამდე. მომავალი ქმარი ქორწილამდე ორი კვირით ადრე გაიცნო. თუმცა, მის ქმარს, ვისხან მაწუევს, მამის ზელიმხანის გარდაცვალების შემდეგ რამზან კადიროვი მფარველობდა. სიძის მამა 2010 წელს დაიღუპა კადიროვების საგვარეულო სოფელ ცენტოროიზე "ბოევიკების" თავდასხმის დროს. კადიროვის უახლოესი მეგობარი აბუზაიდ ვისმურადოვის მსგავსად, ზემლიხან მაწუევიც იყო კადიროვის თანაკლასელი და ჩეჩნეთის ხელმძღვანელის თანამოაზრე.

კადიროვის კიდევ ორი ​​ქალიშვილი, ხადიჟატი და ტაბარიკი, 17 წლის ასაკში დაქორწინდნენ, სკოლის დამთავრებისთანავე. ხადიჟატი დაქორწინებულია რუსლან ალხანოვის შვილზე, ახმატ-ხაჯი კადიროვის მეგობარსა და უსაფრთხოების სამსახურის უფროსზე.

ტაბარიკ კადიროვი ასევე დაქორწინდა აბუზაიდ ვისმურადოვის ვაჟზე, კაცზე, რომელსაც კადიროვი, მისივე სიტყვებით, ძმაზე უფრო ახლობლად თვლის.

ყველა უფროსი ქალიშვილი დაბინავებულია ოჯახებში, რომელთა ერთგულება კადიროვისადმი ჯერ კიდევ მაშინ დაიწყო, როდესაც ძალაუფლება და ფული არ ჰქონდა. ის იმედოვნებს, რომ ეს ჩეჩნური ოჯახები შეძლებენ თავიანთი რძლების დაცვას მისი სიკვდილის შემთხვევაში.

ვაჟები

რაც შეეხება ვაჟებს ელისა და ადამს, მათი მოულოდნელი ქორწილები აშკარად იმავე მიზანს ემსახურება, რასაც დების ქორწინება. დელიმხანოვები და გერემეევები ნათესავები არიან და გავლენით, სიმდიდრითა და შეიარაღებული შენაერთების რაოდენობით, ერთად შეუძლიათ კონკურენცია გაუწიონ თავად კადიროვს. მას რომ აჯობონ, მხოლოდ ერთი რამ აკლიათ - ახლო ურთიერთობა პრეზიდენტ პუტინთან.

მაგრამ ახლა, როდესაც კადიროვი სასიკვდილოდ დაავადებულია, ამ ფაქტორს დიდი მნიშვნელობა აღარ აქვს. არ არსებობს გარანტია, რომ პრეზიდენტი პუტინი ძველებურად იქნება განწყობილი კადიროვების ოჯახის მიმართ. როგორ მოიქცევიან მაშინ დელიმხანოვ-გერემეევები ახალ რეალობაში? - ერთის მხრივ, ისინი თავად არიან დიდი რისკის ქვეშ, რადგან სწორედ პუტინისა და კადიროვის ახლობლობა არის მათთვის ხელშეუხებლობის „ფარი“. მეორეს მხრივ, თავად ქმნიან ყველაზე ძლიერი კლანს ჩეჩნეთში.

ამ სრულიად გასაგები ლოგიკიდან ამოვარდნილია კადიროვის უფროსი ვაჟის, ახმატის ქორწილი. წყაროს ცნობით, ის მისი დის აიშატის ინიციატივით დაქორწინდა, რადგან ახმატს ვნებიანად შეუყვარდა ქალი, რომელიც ოჯახის გადაწყვეტილებით მისი შესაფერისი არ იყო. ქალი იყო მასზე უფროსი, "უბრალო“ ოჯახიდან და განქორწინებული. საყვარელი ქალისთვის რომ ჩამოეცილებინა, აიშატმა ძმა ჩეჩნეთში სტომატოლოგიური კლინიკების ქსელის მფლობელის მემკვიდრეზე დააქორწინა. მიუხედავად იმისა, რომ რამზან კადიროვის პირველი რძლის ოჯახმა ბევრი არაფერი შემატა მის კლანს, ჩეჩნეთის მეთაურმა ამჯერად აიშატის გამო დათმო.