"აუგი როგორ უნდა თქვა ვინმეზე. 3 კაცი კეტავდა ხვიჩას... თავი არავის დაუზოგავს და მიუხედავად წაგებისა ამაყი წამოვედი სტადიონიდან..." - გერმანიაში მოღვაწე ქართველი საოპერო მომღერალი
ცნობილი ქართველი საოპერო მომღერალი გია ონიანი, რომელიც გერმანიაში მოღვაწეობს, თურქეთ-საქართველოს გუშინდელ მატჩს ეხმაურება და სოციალურ ქსელში წერს:
"აუგი როგორ უნდა თქვა ვინმეზე. 3 კაცი კეტავდა ხვიჩას. თან საშინელი წვიმა იყო. ხვიჩას, ზოგადად, უჭირს სველ მინდორზე თამაში.
შესწავლილი ჰყავთ და ისწავლეს მისი განეიტრალება. რაღაც ახალი უნდა შემოგვთავაზონ ხვიჩამაც და მწვრთნელმაც მეტი ეფექტისთვის...
თავი არავის დაუზოგავს და მიუხედავად წაგებისა, ამაყი წამოვედი სტადიონიდან...
მსოფლიომ დაინახა, რომ გვყავს გუნდი, რომელსაც დიდი ამბიციები აქვს და იმსახურებს ასეთი დონის ტურნირებზე თამაშს.
ჩემი გამოცდილებიდან, არსებობს ადამიანში სტარტის პრობლემის ფაქტორი... საოპერო სპექტაკლებშიც მსახიობი მეორე, მესამე და მეოთხე აქტებში უკეთესად ასრულებს, მშვიდდები და იხსნები... იმედი მაქვს, ეს თამაში პირველი აქტი იყო...
აწი, სხვა საქართველოს ნაკრებს ვიხილავთ. ფიზიკურად, ტექნიკურად და ფსიქოლოგიურად ჩვენი გუნდი მზადაა შედეგების დასადებად...
ცოტა სპორტული იღბალი გჭირდება, რაც, სამწუხაროდ, ჩვენზე არაა დამოკიდებული...რწმენით და იმედით ესეც გვექნება".
შეგახსენებთ,18 ივნისს, გერმანიაში, ევროპის ჩემპიონატზე საქართველოს ეროვნულმა ნაკრებმა პირველი, ისტორიული მატჩი გამართა. ჩვენი გუნდი თურქეთს დაუპირისპირდა. მატჩი საბოლოოდ თურქების გამარჯვებით, ანგარიშით 3-1 დასრულდა.
მთელი მატჩის განმავლობაში უშეღავათო ბრძოლა იყო. ჩვენმა ფეხბურთელებმა თავდადება და თავგანწირული თამაში აჩვენეს, თუმცა ყველაფერს უიღბლობაც დაემატა. განსაკუთრებით დაძაბული მატჩის ბოლო წუთები იყო, როცა ჩვენმა გუნდმა შტურმი მოაწყო მეტოქის კართან, თუმცა გოლი არ გასულა.