ავსტრიის ავიახაზების თვითმფრინავი ფრენის დროს სეტყვის შედეგად მნიშვნელოვნად დაზიანდა - ბორტზე 173 მგზავრი იმყოფებოდა - "თვითმფრინავი შტორმში მოჰყვა"
ავსტრიის ავიახაზების თვითმფრინავი ფრენის დროს სეტყვის შედეგად მნიშვნელოვნად დაზიანდა. ბორტზე 173 მგზავრი და ეკიპაჟის ექვსი წევრი იმყოფებოდა. თვითმფრინავი პალმა დე მაიორკადან ვენაში მიფრინავდა, რა დროსაც ძლიერ შტორმში მოხვდა, სეტყვამ კი მძიმედ დააზიანა.
ინტერნეტში გავრცელებულ ფოტოებში კარგად ჩანს, რომ კაბინის ზედა ნაწილი მოხრილია, მინა კი დაბზარული.
"Airbus A320 თვითმფრინავი პალმა დე მაიორკადან ვენაში მიფრინავდა, რა დროსაც ძლიერ შტორმში მოჰყვა. ამჟამინდელი ინფორმაციით, სეტყვის შედეგად დაზიანდა თვითმფრინავის კაბინის ორი წინა შუშა, თვითმფრინავის ცხვირი და ზოგიერთი პანელი“ - ნათქვამია ავსტრიის ავიახაზების განცხადებაში. მათივე ინფორმაციით, შემთხვევის შედეგად არავის დაშავებულა და თვითმფრინავი ვენის აეროპორტში უსაფრთხოდ დაეშვა.