რუსული ძალები კიევს რაკეტებითა და დრონებით დაესხნენ თავს - რა ხდებოდა უკრაინაში გასული ღამის განმავლობაში და რას აცხადებენ ქვეყნის საჰაერო ძალებში
რუსული ძალები კიევს რაკეტებითა და დრონებით დაესხნენ თავს, რეგიონში საჰაერო თავდაცვის ძალები მუშაობდნენ, - ინფორმაციას უკრაინული მედია კიევის საოლქო-სამხედრო ადმინისტრაციის ხელმძღვანელზე, რუსლან კრავჩენკოზე დაყრდნობით ავრცელებს.
- "მტერი მთელი ღამის განმავლობაში უპილოტო საფრენი აპარატებითა და რაკეტებით უტევდა ტერიტორიას. განგაში ოთხი საათის განმავლობაში გაგრძელდა", - განაცხადა კრავჩენკომ.
მისი თქმით, ავიაიერიშის შედეგად ერთ-ერთ სამრეწველო ობიექტზე ხანძარი გაჩნდა. თავდასხმას მსხვერპლი არ მოჰყოლია.
გარდა ამისა, როგორც უკრაინული მედია საჰაერო ძალებზე დაყრდნობით წერს, რუსი ოკუპანტები წუხელ უკრაინაში კრიტიკულ ინფრასტრუქტურულ ობიექტებს 5 ფრთოსანი რაკეტით და Shahed-131/136 ტიპის 53 დრონით დაესხნენ თავს, უკრაინელებმა ყველა რაკეტა და 48 დრონი გაანადგურეს.
"საზენიტო ბრძოლის შედეგად დნეპროპეტროვსკის, ზაპოროჟიეს, კიროვოგრადის, ნიკოლაევის, ხერსონის, ოდესის, ხარკოვის, კიევისა და ხმელნიცკის ოლქებში 48 უპილოტო საფრენი აპარატი და Х-101/Х-555 ტიპის 5 ფრთოსანი რაკეტა განადგურდა“, - აცხადებენ საჰაერო ძალებში.
მათივე ცნობით, რუსებმა რაკეტები სტრატეგიული ავიაციიდან - Tu-95MS ბომბდამშენებიდან რუსეთის ფედერაციის სარატოვის ოლქის საჰაერო სივრციდან გაუშვეს, ხოლო დრონები - რუსეთის ქალაქ პრიმორსკო-ახტარსკიდან, იესკიდან და კურსკიდან, ასევე ოკუპირებული ყირიმის ტერიტორიიდან.