უცნაური სამედიცინო შემთხვევა: ინდოელ მამაკაცს, ტრავმის შედეგად, თავზე რქა გაეზარდა

74 წლის ინდოელ ფერმერს 10 სმ-ის "ეშმაკის რქა" მოკვეთეს. შიამ ლალ იადავმა, 2014 წელს თავის ტრავმა მიიღო, რამაც სიმსივნის განვითარება და კანის რქის ფორმირება გამოიწვია.

კეთილთვისებიანი წარმონაქმნი, რომელსაც ეშმაკის რქას უწოდებენ, 5 წლის განმავლობაში იზრდებოდა. ნაზარდის ამოღების ოპერაცია ჩატარდა ქალაქ საგარში, ბჰაგიოდეი ტირტ ჰოსპიტალში.

"პაციენტმა რამდენიმე წლის წინ თავის დაზიანება მიიღო, რის შედეგადაც სიმსივნე განვითარდა, თავიდან ამას ყურადღებას არ აქცევდა, თუმცა დროთა განმავლობაში წარმონაქმნი გაიზარდა და დისკომფორტი შეუქმნა" - განაცხადა ქირურგმა ვიშალ გაჯბჰიემ.

ოპერაციამ წარმატებით ჩაიარა, რქა მთლიანად მოკვეთილია, პაციენტი რეაბილიტაციის კურსს საავადმყოფოში გაივლის.

• კანის რქა – წარმოადგენს კონუსისებურ წარმონაქმნს მკრივი ჰიპერკერატოზული ზედაპირით და რბილი ფუძით. როგორც წესი ლოკალიზებულია სახეზე, ქუთუთოებზე, ყურის ნიჟარებსა და თავის თმიან არეში, იშვიათად გვხვდება ტანზე და კიდურებზე.

წყარო: dailymail