"მომავალში უფრო ბინძური ხერხებიც იქნება, მორალსა და ჰუმანურ ხერხებზე ლაპარაკიც არ არის, ხელისუფლება უკვე გასულია ზონიდან" - რა საფრთხეებს წარმოშობს წახალისებული ძალადობა?
- ფოტო: დიმიტრი ჩიქოვანზე თავდასხმის კადრი
ბოლო რამდენიმე დღეა, საქართველოში მძიმე მოვლენები ვითარდება. ქრონოლოგიურად თუ მივყვებით, ჯერ იყო და, ორი დღის წინ, 7 მაისიდან მოქალაქეები სოციალურ ქსელში ავრცელებდნენ ინფორმაციას, რომ როგორც უცხო სახელმწიფოების, ისე ქართული ნომრებიდან მათთან შედის სატელეფონო ზარები, რომლებიც ე.წ. "რუსულ კანონს" უკავშირდება. პასუხის შემთხვევაში, ზარის ავტორები იყენებდნენ სიძულვილის და შეურაცხმყოფელ ენას ზარის ადრესატის მისამართით და მათ ცემით ემუქრებოდნენ. ამ საყოველთაო კაკოფონიის მეორე დღეს, პარლამენტის თავმჯდომარე შალვა პაპუაშვილმა მორიგი სადამსჯელო ღონისძიების - "შავი სიების“ შექმნის იდეა გაგვაცნო:
"ქართული ოცნების“ პოლიტსაბჭოს გადაწყვეტილებით, პარტიული სტრუქტურების მეშვეობით ვიწყებთ მონაცემთა ბაზის შექმნას, სადაც თავს მოიყრის ინფორმაცია ყველა იმ პირის შესახებ, რომელიც ძალადობაში, სხვა კანონსაწინააღმდეგო ქმედებებში, მუქარასა და შანტაჟში არის ჩართული, ან ამგვარ ქმედებებს საჯაროდ იწონებს. ეს მონაცემთა ბაზა განთავსდება სპეციალურ ვებგვერდზე და იქნება საჯარო და გამჭვირვალე საქართველოს მოქალაქეებისთვის. ამ პირთა წინააღმდეგ კონსტიტუციისა და კანონის ფარგლებში მიღებული იქნება ყველა ზომა, რათა კანონდარღვევა, ძალადობა და მუქარა არ დარჩეს სახელმწიფოს თუ საზოგადოების რეაგირების გარეშე. დასასრულ, აღვნიშნავთ, რომ "უცხოური გავლენის გამჭვირვალობის შესახებ“ კანონი მნიშვნელოვან წვლილს შეიტანს საქართველოში გრძელვადიანი მშვიდობისა და სიმშვიდის უზრუნველყოფაში და, შესაბამისად, ე.წ. დეპოლარიზაციაში, რაც საქართველოს მიმართ ევროკავშირის ერთ-ერთი უმთავრესი მოთხოვნაა“, - განაცხადა პაპუაშვილმა.
შემდეგი რაუნდი იყო წუხელ, რამაც მოლოდინს გადააჭარბა - 8 მაისის ღამეს საკუთარ სახლებთან ნიღბიანი პირები ფიზიკურად გაუსწორდნენ სამ ადამიანს, რომლებიც ღიად უპირისპირდებიან ე.წ. რუსულ კანონს. ერთ-ერთი მათგანი საერთაშორისო ურთიერთობების სპეციალისტი გია ჯაფარიძეა, მეორე - "ნაციონალური მოძრაობის“ წევრი დიმიტრი ჩიქოვანი, ხოლო მესამე - რუსული კანონის წინააღმდეგ გამართული მარშის ერთ-ერთ ორგანიზატორი, ბაიკერი ლაშა ღვინიანიძე. სამივე ნაცემი კლინიკებში გადაიყვანეს და მათ შესაბამისი გამოკვლევები ჩაუტარდათ. "საშინელებათა ფილმი“ ამით არ დასრულებულა - ორი დღეა, რაც სოციალურ ქსელში, "ტელეგრამში" გამოჩნდა არხი "ამხილე“, სადაც, როგორც შემქმნელები აცხადებენ, "თანამედროვე ფაშისტებს ამხელენ“. ჯგუფში ვრცელდება ე.წ. აგენტების კანონის მოწინააღმდეგე აქტივისტებისა და ზოგადად, ხელისუფლების მოწინააღმდეგე პირების პირადი მონაცემები, ტელეფონის ნომრები და სხვა.
შსს მინისტრის ვახტანგ გომელაურის განცხადებით, ძალადობის ფაქტებზე გამოძიება მყისიერად დაიწყო, თუმცა ჯერჯერობით ისეთი შთაბეჭდილება რჩება, რომ ხელისუფლება დიდად არ ჩქარობს საზოგადოებაში მსგავსი ბინძური მეთოდებით ანგარიშსწორების ალაგმვას და თავდამსხმელების დასჯას.
პოლიტოლოგი ვახტანგ ძაბირაძე ambebi.ge-სთან განმარტავს, რომ ხელისუფლება ბოლო პერიოდში განვითარებული მოვლენებით ცდილობს წავიდეს პროვოცირებაზე, რაღაცნაირად გამოიწვიოს ოპოზიცია და საზოგადოება ჩააგდოს ისეთ დღეში, რომ იქით დააბრალოს პროვოკაცია, ხელ-ფეხი გაეხსნას და შემდეგ გამოიყენოს რეპრესიული ზომები.
"როდესაც ხელისუფლებას მოსახლეობაში არ აქვს საყრდენი, მისთვის საყრდენს წარმოადგენს ძალოვანი სტრუქტურები და სახელისუფლებო რესურსი. დღეს ეს არის "ქართული ოცნების“ რესურსი მთლიანობაში, სხვა რესურსი მას არ აქვს. ძალზე რთული და მძიმე ვითარებაა, ამიტომ წავიდნენ ასე ვთქვათ, სხვა გზით. აქ არაფერი ახალი არ არის - რუსთაველზე მომხრეთა შეკრებას შევარდნაძეც აკეთებდა, გამსახურდიაც და სააკაშვილიც. როცა ხელისუფლება სუსტია, ის ცდილობს, თავი ძლიერად მოაჩვენოს, სახელისუფლებო გუნდს ყოველთვის შეუძლია მაქსიმალური მობილიზება გააკეთოს და ხალხის რაოდენობა ჩამოიყვანოს, მაგრამ ეს ხალხი მისი მხარდამჭერი ან არის, ან - არა, ეს ცალკე საკითხია. ამიტომ ხელისუფლება ბოლო პერიოდში განვითარებული მოვლენებით ცდილობს წავიდეს პროვოცირებაზე, რაღაცნაირად გამოიწვიოს ოპოზიცია, ჩააგდოს ისეთ დღეში, რომ იქით დააბრალოს პროვოკაცია და შემდეგ გამოიყენოს ის რეპრესიული ზომები, რაც მას აქვს. ანუ მან უნდა შექმნას ილუზია, რომ ვიღაც აპირებს პარლამენტში შევარდნას ან სამთავრობო სტრუქტურაში ან აპირებს რევოლუციას და ა.შ. ხელისუფლება ცდილობს ისეთი გარემო შექმნას, რომ ამის შემდეგ ხელ-ფეხი ჰქონდეს გახსნილი. მან ამაში პირველ რიგში უნდა დააჯეროს საქართველოს მოსახლეობა, საზოგადოება და შემდეგ საგარეო პარტნიორები, თუ ჩვენი პოტენციური მეგობრები. ისინი ბინძურ ხერხებს იყენებენ და მინდა გითხრათ, მომავალში უფრო ბინძური ხერხებიც იქნება, აქ მორალზე და ჰუმანურ ხერხებზე ლაპარაკიც არაა, ხელისუფლება უკვე გასულია ზონიდან, მათ აქამდე ვერ შეძლეს რაღაცებისთვის მიეღწიათ, არ უნდათ, რომ გამოიყენონ პოლიციის პირდაპირი ძალა, ამიტომ დაიწყეს ზონდერების მობილიზება. დღითი-დღე კიდევ უფრო რთული ვითარება შეიქნება.
რუსული მეხუთე კოლონა რომ არსებობდა და არსებობს საქართველოში, ეს საეჭვო ნამდვილად არაა. აქ მნიშვნელოვანია, რამდენად სჭირდება რუსეთს შექმნას აქ არასტაბილური ვითარება, ვინაიდან უკრაინასთან აქვს ომი. თუმცა მეორეს მხრივ, თუ აქ არასტაბილური გარემო შეიქნება, თუ იქნება შიდა დაპირისპირება, რომელიც გარკვეულ ქაოსს გამოიწვევს, ეს ოკუპანტისთვის მაინცდამაინც ცუდი არ იქნება. აქ ხელისუფლებას აქვს საკმაოდ რთული ვითარება, რადგან ადგილობრივი ძალებით გააკონტროლო ის, რაც ქვეყანაში ხდება, ფაქტობრივად, შეუძლებელია, საქართველოში ნამდვილად არაა იმის რესურსი, დიქტატურა დაამყაროს ვინმემ და ა.შ. თუ ვინმე ამას ფიქრობს, მას სჭირდება გარე ძალა, ეს გარე ძალა კი სხვა არავინაა, თუ არა რუსეთი. ანუ შეიძლება აქ წავიდეს ის პროცესი, რაც რამდენიმე წლის წინ ყაზახეთში განვითარდა, როდესაც პირდაპირ მოსთხოვეს რუსეთს. აქ შეიძლება სხვა რაღაც მოიგონონ - რომ არასტაბილური გარემოა, რომ საფრთხე შეექმნება დავუშვათ, "დამოუკიდებელ "სამხრეთ ოსეთსა" და აფხაზეთს"... მოკლედ, ისეთი ვითარება გვაქვს, რუსები ყურით მოთრეულ გამართლებას ყოველთვის მოძებნიან. ამ შემთხვევაში ძალზე მნიშვნელოვანია ოპოზიციის და საზოგადოების როლი - ორივე უნდა იყოს ერთიანი და ძალიან მშვიდობიანი, რაიმე პროვოკაციას რომ არ წამოეგონ. დღეს ეს არის ერთადერთი გამოსავალი - პროცესი უნდა მივიყვანოთ არჩევნებამდე, ეს პროცესი მთლიანად საზოგადოებისთვის სიახლეა. ჩვენ უნდა შევძლოთ პერმანენტული აქციებით მივაღწიოთ იმას, რომ პოლიცია სოლიდარული გახდეს აქციის მონაწილეების მიმართ და არა - პირიქით, ესეც ძალზე მნიშვნელოვანი ფაქტორია (გვაქვს ამის გამოცდილება ეროვნული მოძრაობის დროს, როდესაც ჩვენ და პოლიცია ერთად ვიყავით და კულმინაცია 9 აპრილს იყო, როცა ის ცდილობდა ხალხი სახიფათო ზონიდან გაეყვანა), აქამდე მისვლაა საჭირო. ზოგადად, როდესაც ლაპარაკია დიდ აქციებზე, ოპოზიციაც და საზოგადოებრივი სექტორიც უნდა იყოს ძალიან ფრთხილად, იყოს მუდმივად ლაპარაკი იმაზე, რომ ასეთ დროს პროტესტანტების მხრიდან რაიმე გამოხტომები უნდა შეფასდეს როგორც მიზანმიმართული პროვოკაცია. ამისთვის არსებობს მედიასაშულებები, მიტინგის წამყვანებმაც უნდა იქვე თქვან, რომ ხელისუფლება პროვოცირებას ცდილობს და ამას არ უნდა წამოვეგოთ. გასაგებია, რომ პროვოკატორების მოძებნა ხელისუფლებისთვის რთული არ იქნება, მაგრამ ძალიან გაჭირდება, რომ ამ პროვოკაციებმა შემდეგ სასურველი შედეგი გამოიღოს.
რაც ამ დღეებში ხდება, ამის ანალოგიურს აკეთებდა თავის დროზე სააკაშვილი, შევარდნაძეც და კი, ბატონო, შეგვიძლია პუტინის რუსეთთან ნებისმიერი პარალელი გავაკეთოთ. საზოგადოება იმაშიც უნდა გაერკვეს, რომ დღეს "ქართული ოცნება“ და "ნაციონალური მოძრაობა“ ერთ სიბრტყეზეა, მათ შორის ზღვარი აღარ არის - რასაც აკეთებდა ენმ, იმას აკეთებს "ოცნება“, ამიტომ ეს მკაფიოდ უნდა ითქვას. ვინ ვის ბრძანებას ასრულებს ამ ქვეყანაში, საკმაოდ რთული გასარკვევია, ფაქტი ისაა, რომ ხელისუფლება არაფერს აკეთებს იმისთვის, რომ ქვეყანა მართლა ქვეყანას დაემსგავსოს“.
იხილეთ ასევე: