პროტესტი სომხეთში დელიმიტაციის წინააღმდეგ - რა ხდება ადგილზე, სადაც მოქალაქეებმა ერევანი-გიუმრის საავტომობილო გზის საქართველოსკენ მომავალი მონაკვეთი გადაკეტეს (ფოტოები)

სომხეთის მოქალაქეებმა, რომლებიც აზერბაიჯანთან საზღვრის დელიმიტაციას აპროტესტებენ, ერევანი-გიუმრის საავტომობილო გზის საქართველოსკენ მიმავალი მონაკვეთი გადაკეტეს, - ამის შესახებ ინფორმაციას მედია სომხეთის პარლამენტის წევრზე, ქრისტინე ვარდანიანზე დაყრდნობით ავრცელებს.

"როგორც ჩანს, საპროტესტო აქცია ტავუშის რეგიონს გასცდა, ახლა მოქალაქეებმა გადაკეტეს ერევან-გიუმრის გზა შირაქის ოლქში, თანამემამულეების მხარდაჭერის ნიშნად, რომლებიც ტავუშში სამართლიან პროტესტს მართავენ. ეს გზა ასევე ალტერნატიული, სომხეთი-საქართველოს სახელმწიფოთაშორისი მაგისტრალის ნაწილია.

კირანცას მონაკვეთზე მთავარი გზა რამდენიმე დღეა ჩაკეტილია“, - წერს ქრისტინე ვარდანიანი სოციალურ ქსელში.

როგორც მანამდე გავრცელდა ინფორმაცია, 19 აპრილს სომხეთისა და აზერბაიჯანის საზღვრის დელიმიტაციის კომისია შეთანხმდა დელიმიტაციის დაწყებაზე. სომხური მედიის ცნობით, სასაზღვრო ხაზის აღწერილობა შედგენილი იქნება ადგილზე გეოდეზიური გაზომვების შედეგად გაკეთებული კოორდინატების დაზუსტების გათვალისწინებით, რომელიც უნდა შეთანხმდეს და ხელი მოეწეროს ორივე მხარის მიერ 15 მაისამდე.

ტავუშის საზღვრისპირა სოფლების მცხოვრებლები სომხეთ-საქართველოს სახელმწიფოთაშორის ავტომაგისტრალზე 19 აპრილიდან აპროტესტებენ დელიმიტაციას. ისინი სომხეთსა და აზერბაიჯანს შორის შეთანხმებული საზღვრის დელიმიტაციის ზემოაღნიშნულ ვერსიას ეწინააღმდეგებიან.