სამართალდამცავებმა 54 წლის წინ გაუჩინარებული მოზარდის ნეშთის იდენტიფიცირება შეძლეს: როგორ მიაკვლიეს აშშ-ში მოკლული გოგონას დას თანამედროვე ტექნოლოგიების მეშვეობით

1960-იან წლებში, აშშ-ში, ორეგონის შტატში, პორტლენდში გაუჩინარებული მოზარდი გოგონას ნეშტის იდენტიფიცირება 54 წლის შემდეგ შეძლეს. განცხადებას ორეგონის პოლიცია ავრცელებს.

1970 წელს ორეგონის კუნძულ სოვიზე მოსწავლეებმა უცნობი საფლავი აღმოაჩინეს. იმ პერიოდში გამომძიებლებმა ცხედრის იდენტიფიცირება ვერ მოახერხეს, მაგრამ აღნიშნეს, რომ სხეულის ტრავმები მკვლელობაზე მეტყველებდა.

ნახევარ საუკუნეზე მეტი ხნის შემდეგ, გამომძიებლებმა დნმ-ის მოწინავე ტექნოლოგიის წყალობით დაადგინეს, რომ ნეშტი 1968 წელს გაუჩინარებულ სანდრა იანგს ეკუთვნოდა. სანდრა გაუჩინარებამდე პორტლენდის საშუალო სკოლაში სწავლობდა. დაკარგული გოგონას საქმის გამოძიება მას შემდეგ განახლდა, რაც 2023 წლის იანვარში გენეალოგიის მონაცემთა ბაზაში ერთ-ერთმა მომხმარებელმა თავისი დნმ-ის მონაცემები ატვირთა. პოლიციამ ის სანდრა იანგის ოჯახის პოტენციურ შორეულ წევრად მაშინვე აღიარა და გამომძიემბლებმა ოჯახთან მუშაობა დაიწყეს. მათ სურდათ, ოჯახის გენეალოგიური ხის შესადგენად ბაზაში ატვირთული დნმ-ის დამატებითი ნიმუშები აეღოთ. ამგვარად მათ იანგის იდენტიფიცირება შეძლეს.

პოლიციის თქმით, გაუჩინარებული სანდრა იანგი იმ ადამიანის და იყო, რომელმაც ონლაინ მონაცემთა ბაზაში დნმ-ის ნიმუში ატვირთა. "სანდრა იანგმა თავისი იდენტობის დაბრუნება 54 წლის შემდეგ შეძლო",- განაცხადა დოქტორმა ნისი ვანსმა ორეგონის შტატის სამედიცინო ექსპერტიზის ოფისიდან.

სანდრას ოჯახმა პორტლენდის პოლიციის ბიუროს შემდგომი გამოძიების ჩატარებაც სთხოვა, რათა შეძლებისდაგვარად დადგინდეს ისიც, თუ რა გარემოებებში გარდაიცვალა თინეიჯერი გოგონა.

წყარო: cnn

მოამზადა: ანა სიბოშვილმა