"კონორი ამბობდა, რომ იესოს ნოკაუტით მოუგებდა..." - როგორ გახდა მორწმუნე სკანდალური ირლანდიელი მებრძოლი, რომელიც მანამდე რელიგიაზე დამცინავად საუბრობდა
კონორ მაკგრეგორში ორი პიროვნება ცხოვრობს. პირველი - ირლანდიელი პატრიოტი, მორწმუნე კათოლიკე, მოსიყვარულე მამა და ქმარი. მეორე - ლოთი, მოქეიფე, მდიდარი, რომელსაც სისტემატურად ადანაშაულებენ ძალადობაში.
- როგორი არის სინამდვილეში კონორ მაკგრეგორი და რატომ ლაპარაკობს ბოლო პერიოდში რელიგიაზე?
მაკგრეგორი კათოლიკურ ოჯახში აღზრდილია. 8 წლის ასაკში ის ეკლესიაში ცეკვავდა (შესაბამის ცეკვას)
MMA-ში კი კონორი სხვანაირი გახდა - ბინძურად მოსაუბრე, რომელიც გამდიდრებაზე ოცნებობდა. 2012 წელს დადო ვიდეო, სადაც საუბრობდა, რომ იესო უყვარდა. ამაზე კი ნასვამ მდგომარეობაში და პირში სიგარით, ლას-ვეგასის სასტუმრო-კაზინოდან ლაპარაკობდა.
"იესო, მადლობა შენ ამ ღონისძიებისთვის. შენ ნომერ პირველი ხარ, მეგობარო!“ - ამბობდა მაკგრეგორი.
კონორისთვის რელიგია უბრალოდ ირლანდიელი ადამიანისთვის დამახასიათებელი ატრიბუტი იყო. 2015 წელს ამბობდა: "არ მაინტერესებს პოლიტიკა და რელიგია. მინდა წყნარად ვიბრძოლო და რამდენიმე ასეული მილიონი გამოვიმუშაო“.
თუმცა მისი მსგავსი განცხადებების პიკმა 2016 წელს მიაღწია. ჟოზე ალდოს დამარცხების შემდეგ მაკგრეგორი ჟურნალისტებს ეუბნებოდა: "მე და იესოს ნორმალური ურთიერთობა გვაქვს. მე ყველა ღმერთთან კარგი დამოკიდებულება მაქვს. ღმერთები აღიარებენ ღმერთებს“.
ამის შემდეგ კი ისეთი განცხადება გააკეთა, რომ ქრისტიანები გააბრაზა. ერთ-ერთმა ჟურნალისტმა ჰკითხა, დაამარცხებდა თუ არა იესოს, ირლანდიელმა უპასუხა: "აი, რას გეტყვით: არ არსებობს ადამიანი, რომელიც შეძლებს ჩემს დამარცხებას. მაგრამ იესო ცოცხალი არ არის, ასე რომ, არ ვიცი. შეიძლება ის მკვდრეთით აღდგეს. მე ნებისმიერ შემთხვევაში მოვერეოდი“.
- შემდეგი შეხვედრისას კონორი გაბრაზდა და ჟურნალისტს იდიოტი უწოდა. ამ პასუხმა იმდენად დიდი უარყოფითი რეაქცია გამოიწვია საზოგადოებაში, რომ მას აკრიტიკებდნენ არა მხოლოდ ქრისტიანი მებრძოლები, არამედ მუსლიმებიც. მაგალითად, ხაბიბის მეგობარმა ზუბაირა ტუხუგოვმა კონორს ეშმაკი უწოდა.
"ის ეშმაკია. ის და მისი ტატუები, გამოიყურება როგორც ეშმაკი. თავი ძალიან უხერხულად ვიგრძენი, იმიტომ რომ ის შეურაცხყოფას აყენებს ისას - ჩვენს წინასწარმეტყველს.
როგორ უნდა უგულშემატკივრონ მას?! განსაკუთრებით კი მუსლიმებმა. თუ ის წინასწარმეტყველს შეურაცხყოფას აყენებს, ის უნდა დაისაჯოს. როგორ უნდა გიყვარდეს ან პატივს სცემდე ასეთ ხალხს?“, - ამბობდა ტუხუგოვი.
- ბაპტისტური ეკლესიის პასტორმა ტეხასელმა დონნი რომერომ თავის ქადაგებაში მაკგრეგორს სიკვდილი უსურვა: "ის UFC-ის ჩემპიონია, რომელიც უბრალოდ ხალხს ნოკაუტში აგდებს. მაგრამ იცით რა? მან თქვა: "თუ მე და იესო ქრისტე რინგზე შევხვდებოდით, მე მას დავანოკაუტებდი“. მე ვილოცებ, რომ ღმერთმა მას მეხი დასცეს. მაშინ ყველა ადამიანს, ვისაც კი ბიბლიის სჯერა, ეცოდინებოდა, რომ ეს მას ღმერთმა გაუკეთა. ამით იესომ დასაჯა.“
2015 წელს კონორი მხოლოდ ბევრ ფულზე ოცნებობდა. მას იმქვეყნიური ცხოვრების სჯეროდა: "ამბობენ, რომ სიკვდილის შემდეგაც კი ყველაფერს ხედავ. ეს უბრალოდ არსებობის სხვა ფორმაა", - ამბობდა სპორტსმენი.
2018 წელს კონორს ხაბიბ ნურმაგომედოვთან კონფლიქტი ჰქონდა, რუსეთში მას მკრეხელად თვლიდნენ. UFC 229-ის წინ მაკგრეგორი ავტობუსს დაესხა თავს, სადაც ხაბიბთან ერთად სხვა მებრძოლებიც ისხდნენ. ინციდენტის გამო სასამართლომ საზოგადოებისთვის სასარგებლო სამუშაოები დაუწესა. კონორი ბრუკლინის ეკლესიაში გაგზავნეს, 2019 წელს იქ მან 5 დღე იმუშავა.
- "მაკგრეგორს ბრუკლინის სალოცავ სახლებში ფიზიკური მუშაობა მოსთხოვეს. ეს იყო მთელი სამუშაო დღე. ადგილობრივმა სასულიერო პირებმა უმაღლესად შეაფასეს მისი პოზიტიური განწყობა“, - თქვა ირლანდიელი მებრძოლის ადვოკატმა ბრიუს მაფფეომ.
ბედფორდის ცენტრალური ეკლესიის პასტორი კლაივ ნილი ამბობს, რომ კონორი 11 საათზე მოდიოდა და 4-ზე მიდიოდა: "ის ხშირად იყენებდა სიტყვა "შეგუებას“. აკეთებდა ფიზიკურ სამუშაოებს, მტვერსასრუტით წმენდდა, რეცხავდა იატაკებს, გადაჰქონდა ყუთები, გაჰქონდა ნაგავი. იყო მომთმენი, საკმაოდ დიდი ძალა აქვს და მომთმენია.
კონორი ეკლესიაში 6-7 ადამიანთან ერთად მიდიოდა, მათ შორის იყო მისი დაცვაც, თუმცა ისინი მებრძოლს არ ეხმარებოდნენ. დიეტოლოგი მას საუზმესა და სადილს უგზავნიდა, რომელიც მოიცავდა სტაფილოს, ვაშლებსა და სმუზს“.
- კონორმა პასტორს უთხრა, რომ ის კათოლიკეა და ბედნიერია, რომ პროტესტანტებმა ასე თბილად მიიღეს. სამუშაოების დასრულების შემდეგ, მაკგრეგორს ეკლესიაში დარჩენა სურდა:
"ქაოსური ცხოვრების შემდეგ აქ მოვხვდი, წყნარ, მშვიდ ადგილას, სადაც დადებითი ენერგიით დავიმუხტე, რომელიც თქვენიდან მოდიოდა. ვწუხვარ, რომ წასვლა მიწევს. რამდენიმე დღე მაქვს, შემიძლია დავრჩე“, - ეუბნებოდა მაკგრეგორი პასტორს.
2022 წლის ივნისში კონორმა დასტინ პორიესთან მეორედ წააგო და უფრო რელიგიური გახდა. სოციალურ ქსელებში, სადაც ყველაზე ხშირად სპორტსმენი თავის მდიდრულ ცხოვრებას აჩენდა, ნელ-ნელა გამოჩნდა ვიდეოები თუ როგორ დადიოდა და ლოცულობდა ეკლესიაში.
მიუხედავად სიგიჟეებისა, რასაც მაკგრეგორი პერიოდულად აკეთებს, ის უფრო და უფრო რელიგიური ხდება. GQ-თან ინტერვიუში თქვა, რომ ყოველთვის დაატარებს მედალიონს, რომელიც დედამ აჩუქა:
"ბევრმა ადამიანმა არ იცის, რომ მე ძალიან მორწმუნე ადამიანი ვარ. ჩვენ ირლანდიელი კათოლიკეები ვართ. ყოველთვის დამაქვს მიქაელ მთავარანგელოზის მედალიონი. ის მიცავს მე და მეხმარება ბოროტების დაძლევაში. დედის საჩუქარია. ასევე მაქვს წმინდა ქრისტეფორის მედალიონი. ჩემმა ცოლმა და შვილებმა მაჩუქეს. რელიგიური ოჯახი ვართ, ღმერთის გვჯერა“.
კონორმა თავის ყველა შვილი მონათლა, უმცროსი ვაჟი კი წმინდა პეტრეს ტაძარში, ვატიკანში. მას ასევე ვატიკანის გასაღები გადასცეს.
მიუხედავად ამისა, მაკგრეგორი რჩება არასტაბილური: ერთ დღეს ის ღმერთზე საუბრობს, მეორე დღეს სიგარითა და ვისკით პოზირებს. 2023 წლის მარტში აღიარა, რომ არ იცის როდის დაბრუნდება და ღმერთის გეგმით ცხოვრობს:
"ამინ. ეს სიტყვა ივრითიდან ითარგმნება, როგორც "დაე, იყოს ასე“. სხვა სიტყვებით, ამინ - დაე, იყოს ასე. ეს არის ღმერთის გეგმა. ასე რომ, ბედნიერი ვარ, სადაც ვარ. ვაპირებ ჩემი საქმე გავაგრძელო, ვივარჯიშო, გავხდე უკეთესი“, - ამბობს მაკგრეგორი.
ავტორი: ანრი კურტანიძე