აფხაზეთის სიახლოვეს, ქალაქ ტუაფსეში რუსული ნავთობსაცავი ააფეთქეს - რატომ გაახარა აფხაზების ნაწილი მომხდარმა?

როგორც მოსალოდნელი იყო, რუსეთ-უკრაინის ომის არეალი იზრდება და მალე კავკასიასაც შეიძლება გადმოსწვდეს. 25 იანვარს კრასნოდარის ოლქის ქალაქ ტუაფსეში აფეთქება მოხდა. გავრცელებული ინფორმაციით, რუსული ნავთობსაცავი უკრაინულმა უპილოტო საფრენმა აპარატმა გაანადგურა. ხანძარი 200 კვ.მ -ზე მეტ ფართობზე იყო გავრცელებული. მიუხედავად იმისა, რომ ადგილობრივმა მთავრობამ მოქალაქეებს სთხოვა, ინციდენტის ამსახველი ფოტო-ვიდეო მასალები არ გადაეღოთ და არ გაევრცელებინათ, სოციალურ ქსელებში მომხდარის ამსახველი არაერთი მასალა გავრცელდა.

კრასნოდარის ოპერატიულმა შტაბმა განაცხადა, რომ ნავთობის ბაზაზე ცეცხლი შუაღამეს გაჩნდა. ტუაფსეს რაიონის გამგებელი სერგეი ბოიკო ინციდენტის ადგილზე იმყოფებოდა. მისი თქმით, "ნავთობწარმოების ვაკუუმური მოწყობილობა“ იწვოდა.

"გთხოვთ, ენდოთ ოფიციალურ წყაროებს და არ დადოთ ხანძრის ადგილიდან ფოტო და ვიდეოები, რადგან თავიდან აირიდოთ არასასურველი შედეგები“, - დაწერა ბოიკომ თავის "ტელეგრამარხზე".

ხანძრის სრული ლიკვიდაცია გამთენიისას მოხერხდა.

ამ ეტაპზე ხანძრის გაჩენის ოფიციალური მიზეზები არ სახელდება. თუმცა "ტელეგრამარხები" წერენ, რომ მომხდარი, დიდი ალბათობით, უპილოტო საფრენი აპარატის თავდასხმამ გამოიწვია. მაგალითად, Mash-ი წერს, რომ ნავთობბაზას სამმა უკრაინულმა უპილოტო "თახვმა" შეუტია.

"მათ წინააღმდეგ ჰაერსაწინააღმდეგო ძალების მორიგეებმა იმუშავეს. ორი “თახვის“ ნამსხვრევები ზღვაში ჩავარდა, ხოლო მესამის ნაწილები - ნავთობბაზის ვაკუუმურ მოწყობილობას დაეცა“, - ნათქვამია შეტყობინებაში.

დრონების შეტევის საშიშროების გამო, სოჭის აეროპორტის რეისები შეყოვნდა.

ტუაფსე, მოგეხსენებათ, აფხაზეთიდან არცთუ შორს მდებარეობს. მომხდარი კიდევ ერთხელ დაგვაფიქრებს, რა შეიძლება მოჰყვეს ოჩამჩირეში რუსეთის სამხედრო-საზღვაო პორტის მშენებლობას....

ოკუპირებულ აფხაზეთში, სადაც ახლა ნავთობის სერიოზული კრიზისია, მოქალაქეები არაერთგვაროვანი რეაქციებით შეეგებნენ ამ აფეთქებას.

სოციალურ ქსელებში აფხაზების ნაწილი წერს, რომ რუსეთი დაისაჯა სწორედ იმიტომ, რომ მათ შეუქმნა საწვავის პრობლემა.

"კარმის ბრალია, ყველაფერი უკან უბრუნდებათ“, - წერს ერთ-ერთი მომხმარებელი სოციალურ ქსელში.

"გაგრასაც დრონებმა შეუტიეს, თუ შუქი სად წავიდა?" - კითხულობს მეორე.

"ღმერთი არსებობს, დაე, დაიწვას,“ - წერს მორიგი აფხაზი, რომელსაც, სავარაუდოდ, საწვავის პრობლემა აწუხებს.

"სპეციალურად ჩვენს ცხვირწინ დაწვა ღმერთმა... მერე ყველა ერთად წავალთ ბენზინგასამართი სადგურის რიგში და იქ საწვავის ნარჩენებს 150 რუბლად ვიყიდით. დაე, დაიწვას!" - აცხადებს კიდევ ერთი...

ეს შეფასებები რუსებს ყურადღების გარეშე არ დარჩენიათ. გაბრაზებულები წერენ, - ვატყობთ, ჩვენი პრობლემები გიხარიათ, არადა, აფხაზები გქვიათო...

• მოამზადა ანრი კურტანიძემ