წინასწარი პატიმრობა შეეფარდა კაცს, რომელმაც გაუპატიურებაში ბრალდებული სიძე დაჭრა - დეტალები პროცესიდან
გაუპატიურებაში ბრალდებული სიძის დაჭრის ფაქტზე დაკავებულს 35 წლამდე კაცს აღკვეთის ღონისძიების სახით პატიმრობა შეეფარდა. ეს გადაწყვეტილება სიღნაღის რაიონულ სასამართლოში ცოტა ხნის წინ გამოცხადდა.
- დაკავებულის წინააღმდეგ გამოძიება განზრახ მკვლელობის მცდელობის მუხლით მიმდინარეობს. პროცესზე დაცვის მხარე 20 ათას ლარიანი გირაოს შეფარდებას ითხოვდა იმ არგუმენტით, რომ მის დაცვის ქვეშ მყოფს არ ჰქონია სიძის მოკვლა განზრახული და მას ცივი იარაღი განზრახ არ წაუღია.
უფრო მეტიც, ადვოკატი ამბობს, რომ დაკავებული აღიარებს დანაშაულს, თუმცა განზრახვის ნაწილს არ ეთანხმება, რადგან დანაშაულის ჩადენის შემდეგ პოლიციას თავად ჩაბარდა.
პროკურორი კი პატიმრობის შუამდგომლობის საფუძვლად ბრალდებულის მხრიდან ხელახალი დანაშაულის ჩადენის, მოწმეებზე ზემოქმედების, მტკიცებულებების განადგურების და მიმალვის საფრთხეებს ასახელებდა, რაც გაითვალისწინა მოსამართლემ და აღკვეთის ღონისძიების სახით პატიმრობა შეუფარდა.
საქმე ეხება გურჯაანის მუნიციპალიტეტში მომხდარ ფაქტს, სადაც მამიდის ქმარმა 14 წლის გოგო გააუპატიურა და მიიმალა. შურისძიების მიზნით კი დაზარალებულის ბიძამ, საგარეჯოს მუნიციპალიტეტში მყოფ სიძეს ცივი იარაღით მრავლობითი დაზიანებები მიაყენა. საქმეზე წინასასამართლო სხდომა 12 მარტს ჩაინიშნა.
წაიკითხეთ ასევე: