სკანდალი ვინ დიზელის გარშემო: რა მოხდა "ფორსაჟი 5"-ის გადაღებისას? - მსახიობს ყოფილი თანაშემწე სექსუალურ ძალადობაში ადანაშაულებს
ამერიკელ მსახიობ ვინ დიზელს ყოფილი თანაშემწე სექსუალური ძალადობის ბრალდებით სასამართლოში უჩივის - ინფორმაციას The Guardian ავრცელებს.
ინციდენტი, სავარაუდოდ, 2010 წელს, ფორსაჟი 5-ის გადაღებების დროს მოხდა. ასტა ჯონასონი ამტკიცებს, რომ მსახიობმა მასზე მაშინ იძალადა, როცა ჯერ კიდევ მის თანაშემწედ მუშაობდა. მისივე თქმით, შემთხვევიდან რამდენიმე საათში სამსახურიდან გაათავისუფლეს.
ჯონასონი ვინ დიზელსა და მის პროდიუსერულ კომპანიას გენდერულ დისკრიმინაციაში ადანაშაულებს.
"ასტა ჯონასონი გაათავისუფლეს ვინ დიზელისთვის გაბედული წინააღმდეგობის გაწევისთვის, იგი თავს უმწეოდ გრძნობდა, მისი თავმოყვარეობა შელახეს და აიძულეს, კარიერული წინსვლის სანაცვლოდ, სხეული გაეყიდა“ - აღნიშნულია სარჩელში.
ბრალდებას გამოეხმაურა მსახიობის ადვოკატი და ოფიციალური წარმომადგენელი ბრაიან ფრიდმანი:
"ძალიან პირდაპირი ვიქნები: ვინ დიზელი კატეგორიულად უარყოფს ამ ბრალდებას. 13 წლის წინ მომხდარი ამბავი, რომელსაც 9 დღით დასაქმებული თანამშრომელი ჰყვება, არის სიცრუე. არსებობს მტკიცებულებები, რომლებიც ამ ველურ ბრალდებებს გააბათილებს".