ცნობილია, რომელმა მედიკამენტმა გამოიწვია მეთიუ პერის გარდაცვალება

სერიალ "მეგობრების“ ვარსკვლავის მეთიუ პერის სიკვდილის მიზეზი "კეტამინის მწვავე ეფექტები" გახდა. პრეპარატი დეპრესიის სამკურნალოდ გამოიყენება. ინფორმაციას TMZ ავრცელებს.

ლოს-ანჯელესის ოლქის სამედიცინო ექსპერტიზის ოფისმა გამოაქვეყნა ტოქსიკოლოგიური დასკვნა, რის მიხედვითაც აღმოჩნდა, რომ პერი სიკვდილამდე ერთი კვირით ადრე გადიოდა კეტამინის ინფუზიურ თერაპიას დეპრესიისა და შფოთვისთვის. თუმცა უკანასკნელი ოფიციალური პროცედურა სიკვდილამდე ერთი კვირით ადრე ჰქონდა ჩატარებული და ნივთიერება ამდენ ხანს სისხლში ვერ დარჩებოდა, რაც იმაზე მიუთითებს, რომ მსახიობი კეტამინს კურსის ფარგლებს გარეთ, რეკრეაციული მიზნებითაც იღებდა.

სამედიცინო ექსპერტიზის თქმით, კეტამინი პერის ორგანიზმში იწვევდა როგორც გულ-სისხლძარღვთა გადაჭარბებულ სტიმულაციას, ასევე სუნთქვის დათრგუნვას. ექიმმა ალკოჰოლის ან სხვა ნარკოტიკების კვალი ვერ აღმოაჩინა. პერის სიკვდილის ხელშემწყობი ფაქტორები იყო დაღლილობა, კორონარული არტერიის დაავადება და ბუპრენორფინის ზემოქმედება. "ბუპრენორფინი გამოიყენება ოპიოიდებისგან დამოკიდებულების მოსაცილებლად“, - ნათქვამია მოხსენებაში.

მეთიუ პერი ლოს-ანჯელესში საკუთარ სახლში 55 წლის ასაკში გარდაიცვალა, მისი ცხედარი ჯაკუზში მისმა ასისტენტმა აღმოაჩინა. აღნიშნულია, რომ შემთხვევის ადგილზე ნარკოტიკები და ალკოჰოლი ვერ იპოვეს, მაგრამ მისმა ყოფილმა შეყვარებულმა ქეთი ედვარდსმა თქვა, რომ, მისი აზრით, მსახიობს სიკვდილამდე რეციდივი ჰქონდა.

მეთიუ პერის მეგობარმა ინტერვიუში განაცხადა, რომ მსახიობი მარტოსული იყო და ოცნებობდა ცოლზე და ოჯახზე, წარუმატებელი ურთიერთობების სერიის შემდეგ, ის "სევდიანი და დეპრესიული" გახდა. ბოლო დროს პერი "ისევ ეძებდა სიყვარულს".