"იმის გამო ვინმე დააბულინგო, რომ თანხა რატომ თანაბრად არ გაყვეს, არასწორია" - რას ამბობს "დიდი თამაშის" წამყვანი გიორგი ბახუტაშვილი გადაცემის სკანდალურ ეპიზოდზე

გასულ კვირას, სამ ახალგაზრდას, რომლებმაც გადაცემაში "დიდი თამაში“, მოგებული 17 950 ლარი გაანულეს, მაყურებლის კრიტიკა არ ასცდა. მათ მიმართ იმდენად ბევრი უარყოფითი კომენტარი დაიწერა, რომ ერთ-ერთმა მათგანმა თავის გასამართლებლად სოციალურ ქსელში ვრცელი პოსტიც კი გამოაქვეყნა...

გადაცემა ტელეკომპანია "ფორმულას“ ეთერში მესამე თვეა გადის და მისი წამყვანი მსახიობი გიორგი ბახუტაშვილია. აზარტულ შოუში ოთხი, ერთმანეთისთვის უცხო ადამიანი მონაწილეობს, რომლებიც ფულის მოსაგებად ერთად იბრძიან, თუმცა საბოლოოდ, თანხა სამ ნაწილად იყოფა - 60% 30% და 10% მონაწილეები თავად ირჩევენ ვის რამდენი ეკუთვნის, რაც უცხო ადამიანებში სერიოზულ დისკუსიას იწვევს და საბოლოოდ, შესაძლოა ვერც შეთანხმდნენ და ამასობაში თანხა განულდეს.

ასე მოხდა წინა გადაცემაშიც. "ძალიან ბევრ ფულს დავკარგავთ“, - ამბობდა ერთ-ერთი მონაწილე, მაგრამ მოთამაშეებმა პრინციპებს ვერ უღალატეს.

გიორგი ბახუტაშვილთან საუბარი ყველაზე სკანდალური ეთერით დავიწყეთ. როგორც გაგვიმხილა, მაყურებელს დღეს უფრო დიდი თანხის გაყოფის სცენა ელოდება.

გიორგი ბახუტაშვილი:

- პირველ რიგში მინდა ვთქვა, რომ ცოტა გამიკვირდა ხალხის რეაქციის, რადგან აქამდეც ყოფილა გადაცემები, სადაც მოთამაშეებს თანხა გაუნულებიათ. თუმცა ისიც უნდა ვთქვათ, რომ აქამდე ამხელა თანხა (17 980 ლარი) არ გაუნულებიათ.

საქმე ისაა, რომ სოციალურ ქსელში კომენტარების ავტორები არასწორი პოზიციიდან მსჯელობენ, რაც ყველაზე მეტად არ მომწონს.

მეჩვენება, რომ თამაშის წესები არ იციან. იმის გამო ვინმე დააბულინგო, რომ თანხა რატომ თანაბრად არ გაყვეს, არასწორია, რადგან ეს თამაშის წესებს ეწინააღმდეგება.

მოთამაშეები თამაშის დაწყებამდე ერთმანეთს არ იცნობენ, ჩაწერამდე ისინი იზოლირებულად სხედან სხვადასხვა ოთახებში. თითოეულ მათგანს ერთი თანამშრომელი ჰყავს მიმაგრებული ვინც აკონტროლებს, რომ ერთმანეთთან კონტაქტი ვერ შეძლონ. როდესაც უკვე გაიცნობენ და საუბარიც შეუძლიათ, კამერები ჩართულია და მიკროფონები უკეთიათ, თამაში იწყება. წინასწარ რომ შეთანხმდნენ თანხის თანაბრად გაყოფაზე, შეუძლებელია.

- თუმცა თქვენც ვერ დამალეთ ემოცია განულებული თანხის გამო...

- დიახ, რადგან დიდ ფულზე ვთამაშობთ და მართლა დიდი ფული იყო გასაყოფი. მაგრამ ცხოვრებაშიც არის მომენტები, როდესაც ფულზე მაღლა სხვა რაღაცები დგება, თუნდაც პრინციპები. მაგ შემთხვევაშიც ასე მოხდა. არ ვიცი, რამდენად სწორია ადამიანი იმის გამო აკრიტიკო თუ მიიჩნევდა, რომ მეტი ეკუთვნოდა და სხვა მოთამაშეების არ დათანხმების გამო, თანხა გაენულებინა.

- ამ ჩანაწერმა ძალიან გაზარდა გადაცემის მაყურებელთა რიცხვი, ელოდებიან ახალ გადაცემას. დღესაც საინტერესო ეთერი გაქვთ, როგორც ვიცი...

- მიხარია, რომ ამ გადაცემის გარშემო ამხელა აჟიოტაჟია, ისეთი ფორმატი აქვს, რომ გარდა შემეცნებითისა, დიდ როლს თამაშობს ადამიანური უნარების წარმოჩენაში, ძალიან საინტერესოა მაყურებლის პოზიციიდან დაკვირვება. დღეს მოთამაშეები ძალიან დიდ თანხას დებენ გასაყოფად, 17 ათასზე ბევრად მეტს, მაგრამ როგორ მოიქცევიან, ამას უკვე გადაცემაში ნახავთ.

- მონაწილეები ყოველთვის ახალგაზრდები არიან?

- არა, შეიძლება იყოს ყველა, ვინც ანკეტას გამოაგზავნის. ოთხეულის შერჩევის მთავარი პრინციპი ისაა, რომ ერთმანეთს არ უნდა იცნობდნენ. ზუსტად იმიტომ, რომ თავიდან ავირიდოთ ნებისმიერი შეთანხმება. აქვე გეტყვით, რომ მკაცრი წესების მიუხედავად, თუ გადაცემის დროს მაინც შევატყობთ, რომ შეთანხმება შედგა, უფლება გვაქვს, ჩვენ გავანულოთ თანხა.

- ამ ჩანაწერზე სოციალურ ქსელში წერდნენ, რომ საქართველოს ბედს ჰგავდა, როდესაც ოპოზიციური პარტიები ერთიანდებიან და ბოლოს მაინც იშლებიან.

- არა, სრული სურათის აღსაქმელად მთელი გადაცემა უნდა ნახონ. იმაში ვეთანხმები ყველას, რომ გაყოფის სცენა ყოველთვის ცალკე "ქეისია“. მარტივი საყურებელი არ არის, როდესაც ადამიანები გულხელდაკრეფილები დგანან და უყურებენ, როგორ ნულდება მათი ფული.

- გადაცემის შემდეგ თუ კამათობენ მონაწილეები, ისინი ვინც თანხას ანულებენ?

- განხილვები გვაქვს ხოლმე, მეც ვერთვები, მაგრამ ეს უკვე შედეგზე გავლენას აღარ ახდენს. პატივისცემა დააფიქსირეს ერთმანეთის მიმართ. უბრალოდ ასე მოხდა, რომ ამ სამი ადამიანის პრინციპმა ასე გადაკვეთა ერთმანეთი.

- თქვენ როგორ მოიქცეოდით მათ ადგილას?

- ყველაფერს თავისი საფასური აქვს, მაგრამ არ შემრცხვება იმის თქმა, რომ ჩემთვის პრინციპები მთავარია და არანაირი თანხა არ ღირს. ცდილობდნენ ერთმანეთი დაერწმუნებინათ, მაგრამ არ გამოუვიდათ.

- როგორ ფიქრობთ, დღევანდელი გადაცემა იგივე მასშტაბის დისკუსიას გამოიწვევს სოციალურ ქსელში?

- მგონია, რომ ერთ-ერთი ყველაზე დასამახსოვრებელი გადაცემა იქნება როგორც მონაწილეების მხრივ, ისე თანხის. გამიხარდება თუ ამ გადაცემასაც იმდენივე ადამიანი ნახავს, როგორც წინას.