ნარკოტიკით მასობრივი მოწამვლა რუსეთში - გარდაცვლილია 3 ახალგაზრდა, მსხვერპლთა რიცხვი დღითიდღე იზრდება

რუსეთში, ასტრახანში მეტადონით 20-ზე მეტი ადამიანი მოიწამლა. ამ დროისთვის 6 ადამიანი საავადმყოფოშია გადაყვანილი, 29 წლის ბიჭი და ორი გოგონა, რომელთა ასაკიც 19 წელია, დაიღუპნენ.

ქალაქში ნარკოტიკებით მოწამვლის შესახებ ინფორმაცია არ წყდება. რუსული მედია წერს, რომ რამდენიმე ადამიანის მდგომარეობა მძიმეა. მათ შორის ერთი ახალგაზრდა კომაშია.

მოწამლული პაციენტების ჰოსპიტალიზაცია გასულ პარასკევს, 17 ნოემბერს დაიწყო და დღემდე გრძელდება. მსხვერპლთა რიცხვი დღითიდღე იზრდება. მათ შორის ძირითადად ახალგაზრდები არიან, მათგან ყველაზე უფროსი 42 წლისაა.

რუსეთის შინაგან საქმეთა სამინისტროს ოფიციალურმა წარმომადგენელმა ირინა ვოლკმა განაცხადა, რომ ოპერატიული სამძებრო სამუშაოების დროს დადგენილია ეჭვმიტანილთა ვინაობა. მედია წერს, რომ დაზარალებულებს ეგონათ, რომ სტიმულატორ მეფედრონს ყიდულობდნენ.

წინასწარი ინფორმაციით, სინთეტიკური ნარკოტიკი, სავარაუდოდ, ყირგიზეთის, უზბეკეთისა და ტაჯიკეთის სამმა მოქალაქემ გაავრცელა. ისინი სტავროპოლის მხარეში დააკავეს. აღძრულია სისხლის სამართლის საქმე "ნარკოტიკული საშუალების, ფსიქოტროპული ნივთიერებების ან მათი ანალოგის უკანონო რეალიზაციის მუხლით“.

სააგენტო TASS-ი, რუსეთის შინაგან საქმეთა სამინისტროს პრესცენტრის ანგარიშზე დაყრდნობით, წერს, რომ ნარკოტიკის გაყიდვაში ეჭვმიტანილი სამი უცხოელიდან ორმა აღიარა დანაშაული.