ქორწილი წინანდლის მამულში, რომელსაც პრეზიდენტიც ესწრებოდა - ბიზნესმენ გიორგი რცხილაძისა და ყაზახი აინათ ქსენბაის თანაცხოვრება, გლამურული წვეულებები და ჯვრისწერა (ფოტოები)

გუშინ წინანდლის მამულში გრანდიოზული ქორწილი გაიმართა, რომელსაც საქართველოს პრეზიდენტიც ესწრებოდა. სალომე ზურაბიშვილი კახეთში ბიზნესმენ გიორგი რცხილაძის ქორწილში სპეციალურად, სტუმრის რანგში ჩავიდა. ბიზნესმენი რცხილაძე წლებია, რაც მსახიობ და მოდის დიზანერ აინათ ქსენბაიზეა დაქორწინებული. ქორწილს პრეზიდენტის გარდა, ძირითადად უცხოელი სტუმრები ესწრებოდნენ. წყვილმა ჯვარი ალავერდის საკათედრო ტაძარში დაიწერა.

• ვინ არის ბიზნესმენი გიორგი რცხილაძე?

მის სახელსა და გვარს უცხოურ მედიაში უფრო შეხვდებით, ვიდრე ქართულში. ბიზნესმენი წლებია, რაც ამერიკაში ცხოვრობს და Silk Road Group-ის ხელმძღვანელის გიორგი რამიშვილის პარტნიორია. 2017 წელს რამიშვილსა და რცხილაძეზე წერდნენ, რომ საქართველოში ყალბი "ტრამპთაუერის" აშენებას აპირებდნენ.

ბათუმში Trump-tower-ის აშენების შეთანხმებას 2012 წელს საქართველოში სტუმრად მყოფმა დონალდ ტრამპმა და საქართველოს იმჟამინდელმა პრეზიდენტმა მიხეილ სააკაშვილმა მოაწერეს ხელი. ტრამპის პარტნიორი სწორედ Silk Road Group იყო. პროექტი დროში გაიწელა, ხოლო 2017 წლის იანვარში კომპანიებმა განაცხადეს, რომ ბათუმის Trump-tower-ის პროექტზე მუშაობას აჩერებდნენ.

მედიაში დაიწერა, რომ რამიშვილმა პროექტის გაგრძელება სხვა პარტნიორთან ერთად გადაწყვიტა.

"მე ჩამოვიყვან აქ 20 მოსკოველს, იმისთვის, რომ მათ იყიდონ ბინები. ვაპირებ ვაყიდინო აქ ბინა ვლადიმერ პუტინს“, - ხუმრობდა იმჟამად გიორგი რცხილაძე.

• ვინ არის აინათ ქსენბაია

მისი ნამდვილი სახელი და გვარი აიანა ესმაგამბეტოვაა, მსახიობი წარმოშობით ყაზახეთიდან არის. პირველად კინოში 2002 წელს გამოჩნდა. 2004 წელს ითამაშა პირველ საერთაშორისო სპექტაკლში, ივან პასერისა და სერგეი ბოდროვის Nomad-ში. შემდეგ, 2007 წელს შეასრულა ულჟანის როლი ფოლკერ შლონდორფის ფილმში. აინათი სულ ოთხ ფილმშია გადაღებული, შემდეგ მისი სამსახიობო კარიერა წყდება.

უცხოურ მედიასთან ინტერვიუში აინათი ამბობს, რომ ამერიკაში სამსახიობო უნარების დასახვეწად ჩავიდა, მაგრამ მალე მისმა ცხოვრებამ სრული ტრანსფორმაცია განიცადა, რადგან მომავალი მეუღლე გაიცნო. სამსახიობო პაუზა კი ტექსტილის დიზაინერობით შეავსო.

"ჩემი დიდი ბებია ეგზოტიკური აღმოსავლური ფარდაგებისა და ქსოვილების გამორჩეული დიზაინერია. მისი ისტორია იყო ჩემი ოცნების მამოძრავებელი ძალა, გამომეყენებინა ყაზახური კულტურის ელემენტები და მისი მდიდარი, ცოცხალი ბუნების ფერები.

მინდა, რომ ჩემმა სამოსმა ყველა ასაკისა თუ ეროვნების ქალს საშუალება მისცეს, იგრძნოს თავისუფლება, ძალა, ელეგანტურობა და მდიდარი ფერების ლოგიკური სიგიჟე. არასდროს ვწყვეტ მოძრაობას და ვცდილობ სტრესის მართვას ჩოგბურთით, ცურვით, კარგი კვებით და მუსიკით", - ყვება ერთ-ერთ ინტერვიუში აინათი.

ამბობს, რომ მისი ყველაზე დიდი კრიტიკოსები ქმარი და დედა არიან.

წყვილის შვილები მშობლების ქორწილს ქართული ტრადიციული სამოსით ესწრებოდნენ. აინათი, მეუღლესთან ერთად, ხშირად ესწრება გლამურულ წვეულებებს ამერიკაში.