დიდ ბრიტანეთში ბადრი პატარკაციშვილის ქვრივის, ინა გუდავაძის 10-მილიონიანი სასახლე დაიწვა - რას წერს ბრიტანული მედია მომხდარზე
დიდ ბრიტანეთში ბიზნესმენ ბადრი პატარკაციშვილის ქვრივის, ინა გუდავაძის სასახლე მთლიანად დაიწვა.
ამის შესახებ ბრიტანული გამოცემა "დეილი მეილი“ იტყობინება. გამოცემის ცნობით, ხანძარი 23 სექტემბერს გაჩნდა.
"სახლი, სადაც ინა გუდავაძე შვილებთან, ლიანასა და იასთან ერთად გადასვლას აპირებდა, სამწლიანი რეკონსტრუქციის დასრულებისთანავე დაიწვა", - წერს "დეილი მეილი".
როგორც გამოცემა აღნიშნავს, სახლი იყო სამსართულიანი, 10 ოთახით და ის 10 მილიონ ფუნტ სტერლინგად იყო შეფასებული.
სახლი მდებარეობდა დაახლოებით 300 მეტრში ოჯახის კიდევ ერთი სახლიდან, რომელიც ბადრი პატარკაციშვილმა 2006 წელს იყიდა და სადაც ყიდვიდან ორი წლის შემდეგ გარდაიცვალა.
"დეილი მეილი“ აღნიშნავს, რომ პატარკაციშვილი თავდაპირველად რუსი დიქტატორის, ვლადიმერ პუტინის მოკავშირე იყო, მოგვიანებით კი მისი ერთ-ერთი ყველაზე სასტიკი კრიტიკოსი გახდა.