"ვლოცულობთ, რომ ამ საშინელი დაავადების წამალი მალე აღმოაჩინონ" - რას ჰყვება სელენ დიონის და მომღერლის უიშვიათეს და ურთულეს დიაგნოზზე?

ცნობილი მომღერლის, სელინ დიონის დამ, კლოდეტ დიონმა კანადურ ჟურნალ HELLO! -სთან მომღერლის მდგომარეობის შესახებ ისაუბრა. 2022 წლის დეკემბერში დიონმა გაასაჯაროვა, რომ მას იშვიათი ნევროლოგიური დაავადება აქვს, რომელიც კუნთების დაძაბვას და ტკივილს იწვევს. მას ავადმყოფობის გამო მსოფლიო ტურნეს გადადება მოუწია.

ჯანდაცვის ეროვნული ინსტიტუტის თანახმად, Stiff Person Syndrome - მოუხრელი ადამიანის სინდრომი იშვიათი, პროგრესირებადი ნევროლოგიური დაავადებაა, რომელიც მილიონში ერთ ადამიანს ემართება. საწყის ეტაპებზე დაავადდება ხასიათდება ხერხემლის კუნთების ინტერმისიული, მტკივნეული სპაზმებით. ამის შემდეგ ჩონჩხის კუნთები მუდმივად ამაღლებულ ტონუსს იძენს, რასაც მოძრაობებით გამოწვეული სპაზმები მოჰყვება.

ის გავლენას ახდენს ადამიანის სხეულის ფორმაზე, ხოლო როდესაც პროგრესირდება, ადამიანი კარგავს სიარულისა და მეტყველების უნარს.

74 წლის კლოდეტ დიონი ამბობს, რომ ისიც და ოჯახის დანარჩენი წევრებიც ყველაფერს აკეთებენ სელინის დასახმარებლად და მისი ტკივილის შესამსუბუქებლად. "სელინი ყველაფერს აკეთებს იმისთვის, რომ გამოჯანმრთელდეს. ის ძლიერი ქალია",- განუცხადა მან გამოცემას.

"ამ დაავადების შესახებ ბევრი არაფერი ვიცით. სპაზმები აქვს, რომლის კონტროლიც შეუძლებელია. გინახავთ ვინმე, ვინც ფეხში ჭვალის გამო ხტის? დაახლოებით ასეა, მაგრამ ყველა კუნთში აქვს მსგავსი ტკივილი".

"ვლოცულობთ, რომ მეცნერებმა ამ საშინელი დაავადების წამალი მალე აღმოაჩინონ", - დასძენს კლოდეტი.

მას შემდეგ, რაც სელინს ეს მძიმე დიაგნოზი დაუსვეს, მომღერლის და, ლინდა და მისი ქმარი, მასთან სახლში გადავიდნენ საცხოვრებლად. კლოდეტის თქმით, ოჯახი ასე ბევრად უფრო მშვიდად გრძნობს თავს: "ყველას გვამშვიდებს ის ფაქტი, რომ ისინი სელინთან ახლოს არიან და მასზე ზრუნავენ", - ამბობს კლოდეტი.

წყაარო: pagesix

მოამზადა: ანა სიბოშვილმა