იარაღი სურსათის სანაცვლოდ? - რა მისიით ჩავიდა შოიგუ ფხენიანში და რას უნდა ველოდოთ? შეხვედრა კიმ ჩენ ინთან და იარაღის გამოფენა: ფოტოები ჩრდილოეთ კორეიდან
ჩრდილოეთ კორეის ლიდერმა, კიმ ჩენ ინმა რუსეთის თავდაცვის მინისტრს სერგეი შოიგუს უახლესი იარაღი დაათვალიერებინა.
ფხენიანმა რუსული დელეგაცია შოიგუს ხელმძღვანელობით და ჩინელი ოფიციალური პირები ჩრდილოეთ კორეის სამხრეთ კორეაზე "გამარჯვების“ 70 წლის იუბილესთან დაკავშირებით მიიწვია.
- წარმოდგენილი შეიარაღებიდან იყო - საკონტინენტთაშორისი ბალისტიკური რაკეტა "ხვასონი“. ის აპრილში გამოსცადეს და პირველ ჩრდილოეთკორეულ საკონტინენტთაშორისო ბალისტიკურ რაკეტად ითვლება.
გამოფენაზე ახალი კონსტრუქციის ორი უპილოტო საფრენი აპარატიც იყო წარმოდგენილი - მათ შორის ძირითადი შემტევ-გამანადგურებელი დრონი, რომელიც ამერიკულ ვარიანტს ჰგავდა.
შიდა კონსტრუქციით დრონი ამერიკულ RQ-4 Global Hawk-სა და MQ-9 Reaper-ს წააგავდა. შოიგუმ და კიმ ჩენ ინმა ასევე დაათვალიერის ბალისტიკური რაკეტები, ტანკები და ჯავშანტრანსპორტიორები.
- შოიგუს ვიზიტი ჩრდილოეთ კორეისა და ამერიკის შეერთებული შტატების დაძაბული ურთიერთობების ფონზე მიმდინარეობს. არსებობს ეჭვი, რომ ფხენიანი მოსკოვს იარაღს აწვდის.
კერძოდ, საუბარი იყო რომ კორეა რუსეთს საარტილერიო ჭურვებსა და ახლო რადიუსში მოქმედ რაკეტებს აწვდიდა.
მარტში აშშ-ში განაცხადეს, რომ მათი სადაზვერვო მონაცემებით, რუსეთი კორეაში დელეგაციის გაგზავნას აპირებდა, რომ მათთვის სურსათის მიწოდების შესაძლებლობები განეხილათ. სანაცვლოდ, კიმ ჩენ ინის რეჟიმი რუსებს შეიარაღებას მიაწვდიდა.
ჩრდილოეთ კორეული სახელმწიფო სააგენტოს განცხადებით, კიმ ჩენ ინმა და შოიგუმ ეროვნული თავდაცვისა და საერთაშორისო უსაფრთხოების საკითხები განიხილეს.
მოსალოდნელია, რომ რუსეთისა და ჩინეთის დელეგაციის ვიზიტი ხუთშაბათს, მასშტაბური სამხედრო აღლუმით დასრულდება.
აღსანიშნავია, რომ კორეა უცხო ქვეყნის დელეგატებს პანდემიის შემდეგ პირველად მასპინძლობს. ბოლოჯერ ფხენიანმა 2018 წლის აღლუმზე მიიწვია სხვა ქვეყნის მთავრობის უმაღლესი პირები.
2020 წლის დასაწყისში ჩრდილოეთ კორეამ კორონავირუსის გამო საზღვრები ჩაკეტა. მთავრობამ სხვა ქვეყნების ოფიციალურ პირებთან შეხვედრები შეწყვიტა. მეტიც, შეაჩერეს სავაჭრო კავშირებიც, მათ შორის, პირველადი საჭიროების პროდუქტების იმპორტი.
ის ფაქტი, რომ ფხენიანმა სტუმრები მიიწვია, შესაძლოა, მეტყველებდეს იმაზე, რომ ქვეყანა მკაცრი სასაზღვრო შეზღუდვების მოხსნისთვის ემზადება.
- ავტორი: ანრი კურტანიძე