რუსული მედიის ცნობით, თბილისში რუსებისთვის ახალი სატრანზიტო ჰაბი იქმნება
“თბილისში რუსებისთვის ახალი სატრანზიტო ჰაბი იქმნება, რომლის მეშვეობითაც ევროპაში ფრენა გახდება შესაძლებელი“, - ამის შესახებ RBC-ს ვნუკოვოსა და აზიმუტის ავიახაზების თანამფლობელმა, ვიტალი ვანცევმა განუცხადა.
"ჩვენი პარტნიორები Georgian Airways-დან რუსი მგზავრებისთვის ტრანზიტის კუთხით კარგ შეთავაზებებს აკეთებენ, ხსნიან ფრენებს ევროპაში - პარიზში, ნიცაში და რომში, სადაც პირდაპირი რეისები ახლა დაკეტილია. შედეგად, რუსები მიიღებენ მეოთხე კარგ სატრანზიტო ჰაბს თბილისში სტამბოლის, ერევნისა და ბაქოს შემდეგ“, - ამბობს ვანცევი.
ცნობისთვის, პირდაპირი ავიამიმოსვლა საქართველოსთან რუსეთმა 2019 წელს ცნობილი საპროტესტო გამოსვლების შემდეგ აკრძალა, რაც რუსეთის დუმის წარმომადგენლის, სერგეი გავრილოვის საქართველოს პარლამენტის სპიკერის სავარძელში ნახვას მოჰყვა.
საერთაშორისო სანქციების შემდეგ კი ვლადიმერ პუტინმა აკრძალვა 2023 წლის 15 მაისს გააუქმა და დაუშვა ავიამიმოსვლა, ამავე დღეს გააუქმა სავიზო რეჟიმიც.