"მაღალი თანამდებობის ყოფილი პირები საერთაშორისო ფორუმებზე ერთადერთ ფრაზას გვეუბნებიან: "გააჩუმეთ ეგენი", "ხელისუფლებას უთხარით, დეკემბრამდე ხმა არ ამოიღონ" - ხიდაშელი

სამართლიანი შეფასება თუ მოხდება, საქართველოს შანსი არ აქვს კანდიდატის სტატუსის მიღების, თუკი პოლიტიკური შეფასება მოხდება, საქართველომ აუცილებლად უნდა მიიღოს კანდიდატის სტატუსი, - ამის შესახებ თავდაცვის ყოფილმა მინისტრმა, ორგანიზაცია „სამოქალაქო იდეის“ თავმჯდომარე თინა ხიდაშელმა განაცხადა, რითაც „ქართული ოცნების“ თავმჯდომარის, ირაკლი კობახიძის მიერ რეკომენდაციების შესრულების ანგარიშის წარდგენას და მის განცხადებას გამოეხმაურა იმის თაობაზე, რომ „დღემდე რისი გაკეთებაც შეიძლებოდა, ხელისუფლებამ ყველაფერი გააკეთა. შესაბამისად, საბაბიც კი არ არსებობს იმისთვის, რომ დეკემბერში კანდიდატის სტატუსი არ მოგვენიჭოს, თუ სამართლიანად შეფასდება საქართველოს მიერ გატარებული რეფორმები“.

როგორც ხიდაშელმა „პალიტრანიუსის“ გადაცემა „თავისუფალ სტუდიაში“ განაცხადა, საერთაშორისო ფორუმებზე, კოლეგებთან შეხვედრისას, ევროპელი პარტნიორები ეუბნებიან, რომ თუკი დეკემბრამდე „ქართული ოცნება“ ხმას არ ამოიღებს - საქართველო კანდიდატის სტატუსს მიიღებს.

„სამართლიანი შეფასება ნიშნავს იმას, რომ ამ ადამიანებმა ხელში უნდა დაიჭირონ ფურცელი და კალამი და უნდა ჩამოწერონ საქართველოს ხელისუფლების მიერ განხორციელებული ნაბიჯები. როდესაც დეპოლარიზაციას მიადგებიან, იქ კიდევ მთელი ტომი უნდა დაიჭირონ - საქართველოს ხელისუფლების მიერ განხორციელებული მუქარების, ძალადობრივი ქმედებების, თავდასხმების, არა მარტო პოლიტიკურ ოპოზიციაზე, არამედ მედიის წარმომადგენლებზეც. ამიტომ პოლიტიკური გადაწყვეტილება თუ მიიღეს, ჩვენ უნდა მოგვცენ კანდიდატის სტატუსი. თუ სამართლიანი გადაწყვეტილება მიიღეს, ჩვენ კანდიდატის სტატუსი არ გვეკუთვნის. პოლიტიკური გადაწყვეტილება იმას ნიშნავს, რომ ორი ფაქტორი უნდა გაითვალისწინონ იმ ადამიანებმა, რომლებიც მაგიდის გარშემო დასხდებიან, სადაც ეს გადაწყვეტილება დეკემბერში მიიღება. პირველი არის ის, რომ საქართველო არ ჩატოვონ რუსეთის უკანა ეზოში და მეორე გადაწყვეტილება, რაზეც უნდა დააფუძნონ, ეს არის ის, რომ ქვეყანაში 2024 წელს არჩევნებია, რომელიც შეეწირება წევრობის სტატუსის არ მიღებას, იმიტომ, რომ საქართველოში ამ ფონზე, არჩევნები რასაც ჰქვია, ის აღარ იქნება.

ძალიან ბევრი ადამიანი ვიცი უკვე, კოლეგები, ყოფილი მაღალი თანამდებობის პირები სხვადასხვა საერთაშორისო ფორუმებზე ამ თემებზე რომ ველაპარაკებით, ერთადერთ ფრაზას გვეუბნებიან: Tell them to shut up - ამ ფრაზით გვეუბნებიან, გააჩუმეთ ეგენიო, უთხარით ხელისუფლებას დეკემბრამდე ხმა არ ამოიღონ საერთოდ და სტატუსი გარანტირებული გაქვთო“, - განაცხადა ხიდაშელმა.

მისივე შეფასებით, დარწმუნებულია, რომ „ქართულ ოცნებას“ სურს საქართველომ ევროკავშირის წევრობის კანდიდატის სტატუსი მიიღოს, რადგან წინააღმდეგ შემთხვევაში მთელი პასუხისმგებლობა ხელისუფლებას დაეკისრება.

„ამ პასუხისმგებლობას ისვე ვერ მოერევა, როგორც მარტის მოვლენების დროს რუსული კანონის ავტორობის პასუხისმგებლობას ვერ მოერია. მათ გულწრფელად უნდათ კანდიდატის სტატუსი, ოღონდ ისე, რომ არცერთი დემოკრატიული ვალდებულება არ შეასრულონ. ზუსტად შემიძლია გითხრათ, რას ეუბნება ირაკლი კობახიძე ჩვენს პარტნიორებს - თუკი ვინმე ხვდება, ის ეუბნება: „მზად ხართ პასუხისმგებლობა აიღოთ რევოლუციაზე? კანდიდატის სტატუსის არ მოცემის შემთხვევაში, საქართველოში იქნება რევოლუცია“, - ასე ელაპარაკება და ამ კითხვებს უსვამს“,- განაცხადა ხიდაშელმა.

ამასთან, ხიდაშელის თქმით, ამ წუთის მდგომარეობით, ევროპაში აზრი ჩამოყალიბებულია, რომ საქართველოს არ ჩატოვებენ რუსეთის უკანა ეზოში, ამისთვის საქართველოს არ გაიმეტებენ.