სოცქსელების მაგნატების ბრძოლა ოქტაგონზე გადაინაცვლებს - ცუკერბერგი და მასკი ბრძოლაზე შეთანხმდნენ: ილონი მარკს "ლომვეშაპის ტაქტიკით" ემუქრება"

მსოფლიოს ორმა ყველაზე გავლენიანმა მილიარდერმა, ილონ მასკმა და მარკ ცუკერბერგმა გადაწყვიტა, რომ ერთმანეთს ოქტაგონზე შეებრძოლონ.

ყველაფერი ასე დაიწყო - ილონ მასკმა "ტვიტერზე" გამოაქვეყნა ინფორმაცია, რომ ის ცუკერბერგთან ოქტაგონზე საბრძოლველად ემზადებოდა.

"მეტას" მფლობელმა მარკ ცუკერბერგმა უკან არ დაიხია და მასკის "ტვიტის" სქრინშოთი გამოაქვეყნა წარწერით - "მდებარეობა მომწერე". მასკმა ცუკერბერგს სურვილი შეუსრულა და უპასუხა, რომ ვეგასის ოქტაგონზე მისულიყო.

ადგილი, რომელიც ილონმა ცუკერბერგს შესთავაზა UFC-ის ორთაბრძოლებისთვისაა და ლას-ვეგასში მდებარეობს. რაც შეეხება ე.წ. გალიის ბრძოლას, რომელსაც მასკი მარკს სთავაზობს, ეს არის სრულად კონტაქტური სპორტი, სადაც ორი მებრძოლი სხვადასხვა ტიპის საბრძოლო ტექნიკის გამოყენებით ეჯიბრება ერთმანეთს, ხოლო ადგილი, გალია სადაც იბრძვიან, რვაკუთხაა.

51 წლის მასკმა ასევე "დატვიტა":

"მე შესანიშნავი ტაქტიკა მაქვს, მას "ლომვეშაპი" ჰქვია. ამ დროს მე უბრალოდ ზემოდან ვაწევარ ჩემს ოპონენტს და საერთოდ არ ვინძრევი". მან ასევე დაწერა: "თითქმის არასდროს ვვარჯიშობ, მხოლოდ ჩემს შვილებს ჰაერში ვაგდებ".

მასკისგან განსხვავებით, 39 წლის ცუკერბერგი სპორტულ ცხოვრებას მისდევს და პროფესიონალურ ორთაბრძოლებშიცაა ჩართული. მან ახლახან ჯიუ-ჯიცუს ტურნირზე გაიმარჯვა.

სოციალური ქსელის მომხმარებლები გაახალისა მასკისა და ცუკერბერგის ჩხუბის იდეამ და დებატებიც კი წამოიწყეს იმის შესახებ, თუ ვინ გაიმარჯვებდა ორთაბრძოლაში. ზოგიერთმა მათგანმა ხუმრობით ორთაბრძოლის პოსტერებიც შექმნა.

წყარო: bbc

მოამზადა: ანა სიბოშვილმა