"დედაჩემს ჩემს შეყვარებულებთან ჰქონდა რომანი" - დრიუ ბერიმორი და ბრუკ შილდსი მშობლებთან ურთიერთობის მძიმე გამოცდილებაზე
ჰოლივუდის ვარსკვლავი ბრუკ შილდსი კოლეგის, დრიუ ბერიმორის გადაცემას, The Drew Barrymore Show-ს ეწვია, სადაც მსახიობებმა ბავშვობა გაიხსენეს და ერთმანეთს გული გადაუშალეს.
ბრუკმა და დრიუმ ისაუბრეს კარიერის ადრეულ ეტაპზე და დედებთან ურთიერთობაზე.
დრიუ ბერიმორის თქმით, ბრუკ შილდსის დედამ მენეჯერის როლი მოირგო და ბერიმორის დედას ერთგვარად გზა გაუკვალა მენეჯერულ საქმიანობაში. ერთი შეხედვით თითქოს, ყველაფერი ნორმალურად იყო, თუმცა მსახიობები ამბობენ, რომ რეალობა აცდენილი იყო ნორმალურ ყოფას.
ბრუკ შილდსის თქმით, მათი მშობლები არ იყვნენ ნორმალურები.
დრიუმ კი მისი ნათქვამი განავრცო:
"დედაჩემს შემს შეყვარებულებთან ჰქონდა რომანი, ძალიან დაბნეული ვიყავი."
შემდეგ ბრუკს ჰკითხა, მასაც თუ ჰქონია მსგავსი გამოცდილება:
"არა, რადგან დედაჩემი ჩემზე იყო შეყვარებული. მისთვის მე ვიყავი უმთავრესი. ისე ჩამოშორებულები ვიყავით სექსუალურ ურთიერთობებს, რომ ვაპირებდი, ქალწული დავრჩენილიყავი", - უპასუხა ბრუკ შილდსმა.
დრიუს აზრით, დედამისი ისე იყო მისით გატაცებული, რომ თვითონაც იმ ადამიანებთან სურდა ყოფნა, ვისთანაც მისი ქალიშვილი ურთიერთობდა. სწორედ ამით ახსნა მსახიობმა ის ფაქტი, რომ დედა მის შეყვარებულებს ხვდებოდა.
აღსანიშნავია, რომ დრიუმ დედასთან კონტაქტი ადრეულ ასაკში გაწყვიტა და ბოლო რამდენიმე წელია, რაც შეურიგდა. მსახიობის თქმით, ახლა პატივს სცემენ ერთმანეთს და მათ შორის მშვიდობაა.
დამთრგუნველი დიალოგის შემდეგ, ბერიმორმა პოზიტიურად გადაწყვიტა გადაცემის დასრულება.
"ისინი ჩვენი დედები არიან! მათ სიცოცხლე გვაჩუქეს. დედას ყველა კასტინგზე რომ არ ვეტარებინე და ჩემს მენეჯერად არ ქცეულიყო, ალბათ ახლა აქ არ ვიჯდებოდი",- თქვა მსახიობმა.
წყარო: decider
მოამზადა: ანა სიბოშვილმა