რუსი და ბელარუსი სპორტსმენები საერთაშორისო ასპარეზობებზე ისევ დაიშვებიან - რა აკრძალვებს აწესებს სოკ -ი და რას პასუხობენ რუსეთიდან?
საერთაშორისო ოლიმპიურმა კომიტეტმა გაასაჯაროვა ის რეკომენდაციები, რაც მისცა საერთაშორისო სპორტულ ფედერაციებს, რუსი და ბელარუსი სპორტსმენების საერთაშორისო ასპარეზობებზე დაშვებასთან დაკავშირებით, ანუ რაც იმას ნიშნავს, რომ ამ ქვეყნების წარმომადგენლები სხვადასხვა შეჯიბრზე მონაწილეობას შეძლებენ, თუმცა გარკვეული წესების დაცვის შემთხვევაში. შეგახსენებთ რუსეთის წარმომადგენლებს მკაცრი აკრძალვა უკრაინაში შეჭრის და ომის გაჩაღების შემდეგ დაუწესდათ.
ოლიმპიური კომიტეტის რეკომენდაციის მიხედვით, ოლიმპიადაში მონაწილეობას მიიღებენ სპორტსმენები, რომლებსაც ექნებათ ნეიტრალური სტატუსი, უფრო ზუსტად რომ ვთქვათ, სპორტსმენები, რომლებიც წარმოადგენენ მხოლოდ საკუთარ თავს, ინდივიდუალურად და არა ქვეყანას. არ ექნებათ უფლება დროშის წარდგენის, ან ქვეყანასთან დაკავშირებული რაიმე სიმბოლოს გამოტანის.
- რუსული ან ბელარუსული პასპორტის მქონე სპორტსმენისთვის ოლიმპიადაში მონაწილეობის პირობები ასეთია:
1. მათ უნდა იასპარეზონ მხოლოდ ინდივიდუალური, ნეიტრალური სპორტსმენის სტატუსით.
2. საერთოდ არ დაიშვება სპორტსმენთა გუნდი რუსული ან ბელარუსული პასპორტით.
3. ასევე, არ დაიშვებიან სპორტსმენები, რომლებიც აქტიურად უჭერენ მხარს ომს.
ჯერჯერობით უცნობია, შეეხება თუ არა ეს 2024 წლის პარიზის ოლიმპიადას. გადაწყვეტილება ამ ეტაპზე მიღებული არ არის, თუმცა პერსპექტივამ, რომ შესაძლოა, უკვე 2024 წელს რუსი და ბელარუსი სპორტსმენები ვიხილოთ ოლიმპიადაზე, ზოგიერთ ევროპულ ქვეყანაში პროტესტი გამოიწვია. მაგალითად, პოლონეთის საგარეო საქმეთა მინისტრის მოადგილის პიოტრ ვავრზიკის შეფასებით, ეს არის "სირცხვილის დღე."
საერთაშორისო ოლიმპიური კომიტეტის რეკომენდაციებს კრიტიკა მოჰყვა რუსეთშიც. რუსეთის ოლიმპიურმა კომიტეტმა დაგმო კრიტერიუმები, რომლის დაცვაც რუს და ბელარუს სპორტსმენებს მოეთხოვებათ და მათ "დისკრიმინაციული" უწოდა.