"სიყვარულის თვეში" წასაკითხი 10 წიგნი, რომლებიც ბესტსელერების თაროდან არ ჩამოდის
წელიწადის ყველაზე რომანტიკული დღე გვიახლოვდება. ზოგისთვის ვალენტინობა უბრალოდ თარიღია, მაგრამ თებერვალი ამ დღის გამო „სიყვარულის თვედაც“ კი მოიხსენიება. ცხადია, რთულია სიყვარულს თარიღი შეურჩიო, თუმცა, თუკი გვინდა წელიწადში ერთი დღე განსაკუთრებული რომანტიკით სავსე იყოს, რატომაც არა?
რომანტიკული ვახშამი, საჩუქრები, სანთლები... ამ ყველაფერს თქვენ მოგანდობთ, ჩვენ კი გაგიზიარებთ 10 რომანს, რომლებიც სიყვარულის ისტორიას ისე ლამაზად გვიყვებიან, რომ ამ გრძნობის რეალურობაში იმედგაცრუებულ ადამიანსაც კი დაარწმუნებენ.
მოპარული სიყვარული (თინათინ ბერიძე)
„პალიტრა L-ის“ ლიტერატურული კონკურსის „გახდი ბესტსელერის ავტორი 2019-ის“ გამარჯვებულის, თინათინ ბერიძის რომანია, რომელიც არაჩვეულებრივი, ნიჭიერი და მგრძნობიარე ახალგაზრდების ირგვლივ განვითარებული დიდი სიყვარულის ამბავზე მოგვითხრობს. წიგნი მკითხველს დიდ თავგადასავლებსა და რომანტიკული განწყობის ამაღლებას ჰპირდება.
აღიარება ხელისგულზე (თათული ღვინიანიძე)
რომანი ადამიანურ სისუსტეებზე, შეცდომებსა და სინანულზე... წიგნი ჟურნალისტიკის ფაკულტეტის სტუდენტის, რადა მოდებაძის ამბავს გვიყვება. რადა ერთი ჩვეულებრივი გოგონაა, რომელსაც ყველას მსგავსად კომპლექსები და შიშები აწუხებს. ყველასგან შეუმჩნეველი კი ყურადღების მიქცევას „ბინძური გზებით“ ცდილობს... წიგნი მკითხველს გულგრილს ნამდვილად არ დატოვებს.
სიყვარულის 40 წესი (ელიფ შაფაქი)
„ყოველთვის ასე იყო. როგორც კი სიმართლეს ეტყოდი, მაშინვე შეგიძულებდნენ. რაც მეტს ელაპარაკებოდი სიყვარულზე, უფრო სძულდი...“
რომანი ელიფ შაფაქის ინგლისურად დაწერილ სამ რომანთაგან ერთ-ერთია. იგი თანამედროვე ამერიკელი ქალის ერთფეროვან ცხოვრებაზე მოგვითხრობს, რომელშიც სრულიად მოულოდნელად ორი საოცარი და საოცნებო სამყარო შემოიჭრება: სიყვარული და... აღმოსავლეთი!
ყვავილები სახლთან ახლოს (თამარ გოდერიძე)
წიგნი ქართველ მწერალს, თამარ გოდერიძეს ეკუთვნის და მარტოსული ქალის - კესანეს შესახებ გვიყვება, რომლის ერთფეროვან ცხოვრებაშიც ახალი ეტაპი ძველ სიყვარულთან შეხვედრის შემდეგ დგება. ამ რომანში ბევრი ადამიანი ამოიცნობს საკუთარ თავს.
ჭამე, ილოცე, შეიყვარე (ელზაბეტ ჯილბერტი)
ეს ავტობიოგრაფიული რომანი მოგვითხრობს ქალზე, რომელსაც სულიერი დანაკლისის ძიება ჯერ რომში მიიყვანს, შემდეგ ინდოეთში, ბოლოს კი ბალის კუნძულზე, სადაც ადგილობრივი ექიმბაში ახალ გზას დაანახვებს სიმშვიდისკენ და სიყვარულის სურვილს გაუღვიძებს. არაერთი წარუმატებელი ურთიერთობის შემდეგ შეძლებს ქალი საკუთარი თავისა და სხვის სიყვარულს? თუ არც წიგნი წაგიკითხავთ და არც ფილმი გინახავთ, საიდუმლოს არ გაგიმხელთ.
თანამედროვე სიყვარული (დანიელ ჯონსი)
წიგნი, რომელიც მკითხველს შეახსენებს, რომ სიყვარულს ასაკი არ ესმის და რომ მას ცხოვრების ნებისმიერ ეტაპზე მადლიერებით უნდა შევხვდეთ. წლების განმავლობაში „ნიუ-იორკერში“ გამოცემული მოკლე მოთხრობები, რომელთა ავტორებიც ანონიმურები არიან, ამ წიგნში იყრიან თავს. ყველა მათგანს კი ერთი მთავარი თემა აერთიანებს - თანამედროვე სიყვარული.
დასაწყისის დასასრული (ირაკლი არიშვილი)
პროექტის „გახდი ბესტსელერის ავტორი“ კიდევ ერთი გამარჯვებული წიგნი. რომანის მთავარი გმირი გზააბნეული ახალგაზრდაა, რომელსაც ერთი უცნაური თვისება აქვს: სხვისი ემოციების გაგება მხოლოდ ერთი შეხებით შეუძლია, იქნება ეს იმედგაცრუება, ტანჯვა, ტკივილი, სევდა, დეპრესია... მელანქოლიურ ხასიათზე ხართ, მაშინ ეს წიგნი წაიკითხეთ.
ჰერმესის დახლიდარები (ქარდა ქარდუხი)
რომანის მთავარი გმირი სოხუმიდან გაქცეული ახალგაზრდაა, რომელიც გულანშაროში აღმოჩნდება და მთლიანად ამ ადგილის რთული ცხოვრების ნაწილი ხდება. სწორედ უცხო მიწაზე ცხოვრებისას პოულობს იგი ახალ სიყვარულსა და მუზას, რომელიც სამშობლოში დარჩენილ სანატრელ ბავშვობას მოაგონებს.
წუთით კოსმოსში (ანუკი შატაკიშვილი)
ნაწარმოების მთავარი გმირების - ლალუნასა და ჰალეის ბავშვობის დროინდელი სურვილი მთვარეზე გაფრენაა, მაგრამ კოსმოსისკენ მიმავალი გზა დაბრკოლებებით სავსე აღმოჩნდება. ის, თუ როგორ გაუმკლავდება შეყვარებული წყვილი ამ დაბრკოლებებს - ამის გაგება მხოლოდ წიგნის წაკითხვის შემდეგ შეგეძლებათ.
მიყვარხარ - ქართველი პოეტები სიყვარულზე
გალაკტიონ ტაბიძე, აკაკი წერეთელი, ლადო ასათიანი, ვახტანგ ჯავახაძე, რატი ამაღლობელი, ბესიკ ხარანაული, ტიციან ტაბიძე, ნიკოლოზ ბარათაშვილი, გიორგი კეკელიძე და სხვები... ქართული ლიტერატურის ძველი და ახალი გენიოსები ვალენტინობის დღეს ნამდვილ რომანტიკულ მოგზაურობას გპირდებიან. და მართლაც, პოეზიაზე კარგად რა გადმოცემს სიყვარულს?
თქვენთვის რომელი წიგნი ასოცირდება სიყვარულთან?