ჯეკ ნიკოლსონი მარლონ ბრანდოსგან 5 მილიონ დოლარად შეძენილ სასახლეში განდეგილად ცხოვრობს - "ვშიშობთ, რომ ბრანდოს მსგავსად მარტოობაში არ გარდაიცვალოს"

ჯეკ ნიკოლსონის მეგობრები მსახიობის მარტოსული ცხოვრების წესის გამო შეშფოთებულები არიან. მათ აშინებთ იმაზე ფიქრი, რომ ნიკოლსონს ცხოვრების ბოლო დღეების გატარება შესაძლოა, მარტოს მოუწიოს. სამგზის "ოსკარის" მფლობელი მსახიობი წელიწადზე მეტია, რაც საზოგადოებაში არ გამოჩენილა. მისი მეგობრების თქმით, ის განდეგილ ცხოვრებას ეწევა. რამდენიმე წყაროზე დაყრდნობით, მედია წერს, რომ 85 წლის ნიკოლსონი "აღარ ტოვებს სახლს", "გონზე აღარ არის" და დემენციის შესაძლებლობაც არ გამოირიცხება.

ხუთი შვილის მამა ბოლოს 2021 წლის ოქტომბერში ნახეს ლოს-ანჯელესის "ლეიკერსის" მატჩზე, რომელზეც ვაჟთან - რეისთან ერთად იმყოფებოდა. გავრცელებული ინფორმაციის თანახმად, ნიკოლსონი მთელ დროს თავის სასახლეში ატარებს, რომელიც მან 2005 წელს 5 მილიონ დოლარად შეიძინა მეგობარ მარლონ ბრანდოსგან.

"მისი სახლი ნამდვილი ციხე-სიმაგრეა, მაგრამ მეგობრები ვნატრობთ, რომ გამოვიდეს და ის მაინც გაგვაგებინოს, კარგად არის თუ არა..."- აცხადებს ნიკოლსონის ერთ-ერთი მეგობარი.

"ჯეკი ზოგ ნათესავთან ურთიერთობს, განსაკუთრებით რეისთან (იგულისხმება ნიკოლსონის 30 წლის ვაჟი), მაგრამ მისი სოციალიზაციის დღეები დიდი ხანია, გასულია", - განაცხადა ერთ-ერთმა წყარომ. მსახიობის მეგობრები ამბობენ, რომ "ნიკოლსონი, მარტოობის სიყვარულით, ნელ-ნელა მარლონ ბრანდოს ემსგავსება, რომელიც 2004 წელს მარტოობაში გარდაიცვალა".

"შვილები კი სტუმრობენ, მაგრამ ეს ერთადერთი რამაა, რაც გარე სამყაროსთან აკავშირებს. თითქოს მას აღარ სურს რეალობას სახეში შეხედოს და ეს ძალიან სამწუხაროა..."

ჯერ კიდევ 2021 წელს, ნიკოლსონის ჯანმრთელობის გამო შეწუხებულმა ერთ-ერთმა ახლობელმა RadarOnline-ს განუცხადა, რომ ჯეკს მისი ვაჟი - რეი, ასევე და - ლორეინი უვლიდნენ": "ნამდვილად სამწუხაროა, როცა ხედავ, რომ ისეთი ნიჭიერი მსახიობი, როგორიც ჯეკია, ასეთი დასასრულისკენ მიდის".

წყარო: nypost

მოამზადა: ანა სიბოშვილმა