ვლადიმერ პუტინმა დარია დუგინას სიმამაცისთვის ორდენი მიანიჭა
რუსეთის პრეზიდეტნმა ვლადიმერ პუტინმა ხელი მოაწერა განკარგულებას, რომლის თანახმადაც, ფილოსოფოს და კრემლის პოლიტიკის მთავარ იდეოლოგ ალექსანდრ დუგინის შვილს, დარია დუგინას სიკვდილის შემდეგ ორდენი გადაეცა.
როგორც რუსული მედია წერს, დუგინას ორდენი "გამოჩენილი სიმამაცისთვის" მიანიჭეს.
"დაჯილდოვდეს დარია დუგინა პროფესიული მოვალეობის შესრულებისას გამოჩენილი სიმამაცისა და თავდადებისთვის“, - ნათქვამია ბრძანებულებაში.
დარია დუგინა 20 აგვისტოს საღამოს დაიღუპა. ის მართავდა მანქანას, რომელიც აფეთქდა მოსკოვის ოლქში, ოდინცოვოს რაიონში, მოჟაისკის გზატკეცილზე. წინასწარი ვერსიით, მანქანაში ასაფეთქებელი მოწყობილობა ამოქმედდა. რუსეთის უშიშროების სამსახურის ცნობით, მათ დანაშაული გახსნეს. როგორც "ეფ-ეს-ბე" აცხადებს, დარია დუგინა უკრაინის მოქალაქემ, ნატალია ვოვკიმ მოკლა. მათივე ცნობით, ვოვკი, მანამდე "აზოვის პოლკის" წევრი იყო.
უკრაინა უარყოფს კავშირს დარია დუგინას მკვლელობის საქმესთან.