იატაკქვეშა ანტიპუტინისტური მოძრაობა რუსეთში? - რას წარმოადგენს "ეროვნული რესპუბლიკური არმია", რომელმაც დარია დუგინას მკვლელობაზე აიღო პასუხისმგებლობა და ვინ არის ილია პონომარევი
რუსეთში ჯერ არ გამოჩენილა ძალა, რომელიც პუტინის დიქტატორულ რეჟიმს წარმატებით დაუპირისპირდებოდა. ყველა, ვინც მისი ოპონირება გაბედა, ან პატიმრობაშია, ან გაურკვეველ ვითარებაში გარდაიცვალა.
საზოგადოების ნაწილის აზრით, დიქტატურის დამხობა მხოლოდ თვითონ რუსებს შეუძლიათ და ამბობენ, რომ "ციხე შიგნიდან უნდა გატყდეს". ეს საკითხი განსაკუთრებით აქტუალური გახდა რუსეთის უკრაინაში შეჭრის შემდეგ, ხოლო ახლა, "რუსული სამყაროს" იდეოლოგის, ალექსანდრ დუგინის ქალიშილის, დარია დუგინას მკვლელობის შემდეგ დისკუსიამ ამ თემაზე ახალი ძალით იფეთქა.
მით უფრო, რომ მომხდარზე პასუხისმგებლობა რუსეთის "ეროვნულმა რესპუბლიკურმა არმიამ" აიღო და გამოქვეყნდა მანიფესტი, რომელშიც ნათქვამია, რომ მათი მთავარი მიზანი რუსეთის ფედერაციის პრეზიდენტის, ვლადიმერ პუტინის განადგურებაა.
- "ეროვნული რესპუბლიკური არმიის" მანიფესტი
"ჩვენ კანონგარეშე ვაყენებთ ომის გამჩაღებლებს, ყაჩაღებისა და რუსეთის ხალხის მჩაგვრელებს! პრეზიდენტ პუტინს ვაცხადებთ ძალაუფლების უზურპატორად და ომის დამნაშავედ, რომელმაც შეცვალა კონსტიტუცია, წამოიწყო ძმათამკვლელი ომი სლავურ ხალხებს შორის და გაგზავნა რუსი ჯარისკაცები უაზრო სიკვდილისთვის.
ჩვენ გვჯერა, რომ უუფლებო ადამიანებს აქვთ უფლება აჯანყდნენ ტირანების წინააღმდეგ. პუტინს გადავაყენებთ და გავანადგურებთ! ჩვენი მიზანია შევაჩეროთ რუსეთისა და მისი მეზობლების ნგრევა, შევაჩეროთ კრემლის რამდენიმე ბიზნესმენის საქმიანობა, რომლებმაც მიითვისეს ჩვენი ხალხის სიმდიდრე და დღეს დანაშაულს სჩადიან ქვეყნის შიგნით და მის ფარგლებს გარეთ.
რუსეთის ფედერაციის მთავრობისა და რეგიონული ადმინისტრაციების თანამდებობის პირებს უზურპატორის თანამზრახველებად ვაცხადებთ. ბიზნესმენებს, რომლებიც ფულს კორუფციითა და ჩინოვნიკებთან კავშირებით შოულობენ, სამშობლოს მოღალატეებად და უზურპატორის თანამზრახველებად ვაცხადებთ. ვინც არ მოინანიებს და საჯაროდ არ ილაპარაკებს, ამ ხელისუფლებისა და მისი ომის წინააღმდეგ და ისინი თავად განადგურდებიან ჩვენ მიერ. გაუმარჯოს თავისუფალ რუსეთს!
სადაც არ უნდა იყოთ - იბრძოლეთ ჩვენთვის, იბრძოლეთ ჩვენთან, იბრძოლეთ ჩვენზე უკეთ! გავწმინდოთ ჩვენი სამშობლო სიბინძურისგან! გამარჯვება ჩვენი იქნება", - ნათქვამია განცხადებაში, რომლის სრულ ტექსტსაც შეგიძლიათ გაეცნოთ ბმულზე.
- რას წარმოადგენს "ეროვნული რესპუბლიკური არმია"?
როგორც მედიაში წერენ, ეს არის სავარაუდო იატაკქვეშა, პარტიზანული ორგანიზაცია რუსეთში. როგორც "ეროვნული რესპუბლიკური არმიის" განცხადებაშია აღნიშნული, მის შემადგენლობაში შედიან რუსი აქტივისტები, სამხედროები და პარტიზანები, რომლებიც პუტინის რეჟიმის წინააღმდეგ არიან. მათი განცხადება სატელევიზიო ეთერში რუსეთის დუმის ყოფილმა დეპუტატმა და რუსეთიდან განდევნილმა პოლიტიკოსმა ილია პონომარევმა წაიკითხა, განცხადების ტექსტი კი გამოქვეყნდა "ტელეგრამში" Утро Февраля-სა და "როსპარტიზანის" არხებზე. აღსანიშნავია, რომ ეს არხები ილია პონომარევის მიერაა შექმნილი.
ვინ დგას "ეროვნული რესპუბლიკური არმიის" უკან - ამ საკითხზე დადასტურებულად ლაპარაკი ამ ეტაპზე შეუძლებელია, თუმცა არსებული ცნობებით, მას შესაძლოა, ორგანიზებას რუსეთიდან წასული მოქალაქეები უწევდნენ. ასევე, კიდევ ერთი ვერსიით, ამ მოძრაობის სულისჩამდგმელები არიან "ეფესბეს" ყოფილი თანამშრომლები, მოსაზრებას კიდევ უფრო ამყარებს ინფორმაციები იმ მზარდ დაპირისპირებაზე, რომელიც თითქოსდა, "ეფ-ეს-ბეში" ამ დროისთვის არსებობს.
იატაკქვეშა ორგანიზაცია მუშაობს პუტინის ძალადობრივი რეჟიმის დამხობაზე. სახელი - "ეროვნული რესპუბლიკური არმია" პირველად სწორედ ილია პონომარევმა დაასახელა. მისივე თქმით, აღნიშნული ჯგუფი დგას არა მხოლოდ დარია დუგინას მკვლელობის უკან, არამედ ის არის პასუხისმგებელი ყველა იმ აფეთქებასა, თუ ხანძარზე, რომელიც ბოლო დროს რუსეთში მოხდა.
- ვინ არის ილია პონომარევი?
ილია პონომარევი რუსეთის დუმის მემარცხენე დეპუტატი იყო და იყო ერთადერთი პოლიტიკოსი, რომელიც მხარს არ უჭერდა 2014 წელს ყირიმში რუსეთის შეჭრას.
ის "ანტიკრემლური საქმიანობის“ გამო გააძევეს სამშობლოდან, ამჟამად კიევში ცხოვრობს. 2019 წელს უკრაინის მოქალაქე გახდა. მარტში, უკრაინაში რუსეთის შეჭრის შემდეგ, მან "ტელეგრამზე" გახსნა არხები "თებერვლის დილა“ და "როსპარტიზანი“, სადაც რეგულარულად ქვეყნდება ინფორმაცია ომის შესახებ. ეს სწორედ ის არხებია, სადაც "ეროვნული რესპუბლიკური არმიის" განცხადება გამოქვეყნდა.
პონომარევის უთანხმოება პუტინთან დიდი ხანია კარგადაა ცნობილი. ის ამტკიცებს, რომ რუსეთში არსებობს ძირძველი იატაკქვეშა მოძრაობა, რომელიც ცდილობს რუსეთის შიგნით იმ ცნობილი ადამიანების განადგურებას, რომლებიც ომს უჭერენ მხარს. დარია დუგინას მკვლელობა კი კრემლს დაარწმუნებს ამ მოძრაობის ძალაში.
აღსანიშნავია, რომ 22 აგვისტოს რუსეთის უშიშროების ფედერალურმა სამსახურმა განაცხადა, რომ ალექსანდრ დუგინის ქალიშვილის, დარია დუგინას მკვლელობა გახსნა. "დადგინდა, რომ დანაშაული უკრაინის სპეცსამსახურებმა მოამზადეს და ჩაიდინეს. დამნაშავე არის უკრაინის მოქალაქე ნატალია ვოვკი, დაბადებული 1979 წელს", - ნათქვამია უწყების განცხადებაში.
- ნახეთ ასევე:
- როგორ იქცა ერთ დროს შინიდან გაქცევაზე მეოცნებე დარია დუგინა პუტინის პროპაგანდისტად და მამის იდეების მემკვიდრედ - "ადრე ვერც იფიქრებდი, რომ ის მისი ქალიშვილი იყო"
- ალექსანდრ დუგინის ქალიშვილის ლიკვიდაციაზე პასუხისმგებლობა აიღო "ეროვნულმა რესპუბლიკურმა არმიამ” - ისინი რუსეთის პრეზიდენტსაც ემუქრებიან: "პუტინს გადავაყენებთ და გავანადგურებთ"