2023 წელს "ევროვიზია" უკრაინაში არ ჩატარდება - როგორ ხსნის გადაწყვეტილებას EBU
2023 წელს "ევროვიზია" უკრაინაში არ ჩატარდება. ამის შესახებ ნათქვამია განცხადებაში, რომელსაც "ევროპის მაუწყებელთა კავშირი“ ავრცელებს.
"ევროპის მაუწყებელთა კავშირს" სრულად ესმის ის იმედგაცრუება, რომელიც ეხება განცხადებას, რომლის მიხედვითაც, 2023 წლის ევროვიზიის სიმღერის კონკურსი არ შეიძლება, შედგეს უკრაინაში, წლევანდელი წლის გამარჯვებულ ქვეყანაში. ამის შესახებ "ევროპის მაუწყებელთა კავშირის“ მიერ გავრცელებულ განცხადებაშია აღნიშნული.
როგორც წესი, სულ მცირე 10 000 ადამიანია ევროვიზიის სიმღერის კონკურსზე სამუშაოდ აკრედიტებული, მათ შორის მომსახურე პერსონალი, გუნდები და ჟურნალისტები. მოსალოდნელია, რომ კიდევ 30 000 გულშემატკივარი გაემგზავრება ღონისძიებაზე დასასწრებად მთელი მსოფლიოდან. მათი უსაფრთხოება ჩვენი მთავარი საზრუნავია.
ევროვიზიის სიმღერის კონკურსის წესებში, რომლებზეც ყველა მონაწილე მაუწყებელი თანხმდება, ნათლად წერია, რომ ღონისძიება შეიძლება, შეიცვალოს ფორსმაჟორულ სიტუაციაში, როგორიცაა მიმდინარე ომი.
გარდა ამისა, "ევროპის მაუწყებელთა კავშირმა“ მესამე მხარის უსაფრთხოების ექსპერტთა რჩევა მოისმინა, რომლის მიხედვით, უკრაინაში ღონისძიების დაგეგმვისას საფრთხის შესამცირებლად შემოთავაზებული საპირისპირო ზომები არასაკმარისია საერთაშორისო საჯარო ღონისძიებისთვის და მიმდინარე კონფლიქტის გამო, მასობრივი მსხვერპლის რისკის რეიტინგი მაღალია.
უსაფრთხოების პრობლემების პარალელურად, უკრაინაში განგრძობითი კონფლიქტი დელეგაციებსა და მონაწილეებს აიძულებს, გაემგზავრონ ქვეყანაში მათი სურვილის გარეშე. ჩვენ ასევე აღვნიშნავთ ნატო-ს გენერალური მდივნის, იენს სტოლტენბერგის კომენტარს, რომ უკრაინაში ომი „შეიძლება, წლები გაგრძელდეს“.
დასკვნების გამოტანისას, "ევროპის მაუწყებელთა კავშირმა“ ასევე გაითვალისწინა, რომ ჩვენს ამჟამინდელ ინფორმაციაზე დაყრდნობით, 2023 წლის განმავლობაში უკრაინას არც ერთი მნიშვნელოვანი საერთაშორისო საკონცერტო ტური არ ეწვევა.
ყოველივე ამის გათვალისწინებით, „ევროპის მაუწყებელთა კავშირმა“ სინანულით მიიღო გადაწყვეტილება, გადაეტანა ღონისძიება სხვა ქვეყანაში და გააგრძელებს დისკუსიებს მომავალი წლის ევროვიზიის სიმღერის კონკურსისთვის შესაფერისი ადგილის პოვნასთან დაკავშირებით. ჩვენ მოხარული ვართ, რომ შემდგომში ვითანამშრომლებთ ჩვენს უკრაინულ წევრთან, „უკრაინის საზოგადოებრივ მაუწყებელთან“ ყველა ამ საკითხზე“, – ნათქვამია განცხადებაში.
წლევანდელ კონკურში უკრაინულმა ჯგუფმა "Kalush Orchestra“-მა გაიმარჯვა და "ევროვიზიაზე“ მოპოვებული ჯილდო აუქციონზე გაყიდა. თანხა უკრაინის შეიარაღებული ძალებს საჭიროებების უზრუნველსაყოფად გადასცა.