"მარტო მე არ ვარ ამ დღეში", "საჭიროების შემთხვევაში, მიმტანადაც წავალ" - რუსი ვარსკვლავების გასაჭირი: ცნობილი სახეები კოტრდებიან

რუსი ვარსკვლავები, რომლებიც ჯერ კიდევ კორონავირუსის ეპიდემიის დროს დაბალ შემოსავალს უჩიოდნენ, რუსეთის მიმართ დაწესებული სანქციების გამო, ახლა უფრო რთულ პერიოდს გადიან. რუსებს აღარ ეკონცერტებათ, მკვეთრად დაეცა შეკვეთები კორპორატიულ ღონისძიებებზე და მასთან ერთად შემცირდა მომსახურების ფასიც.

მედიაში წერენ, რომ ცნობილი რუსი ტელეწამყვანი და პროდიუსერი იანა რუდოვსკაია, რომელიც ფუფუნებას არის მიჩვეული, სამშენებლო ჰიპერმარკეტში შენიშნეს, სადაც ქალი ეკონომ კლასის განყოფილებაში იძენდა კარადას. თუმცა პუტინის მხარდამჭერი ჟურნალისტი ფინანსურ კრიზისზე ამ ეტაპზე ხმამაღლა არ საუბრობს.

მომღერალი ოლგა ბუზოვა, რომლის შემოსავალი წლების მანძილზე მილიონები გახლდათ, ამბობს, რომ საკუთარ თავზე ბევრს ხარჯავს - 300 ათას დოლარამდე. ახლა კი ეშინია სიღარიბის, რადგან მისი ახლანდელი შემოსავალი მის მოთხოვნებს ვერ დააკმაყოფილებს.

"სიღარიბე არის ის, რისი დაშვებაც არავითარ შემთხვევაში არ მინდა ჩემს ცხოვრებაში. ყოველთვის ვიმუშავებ და საჭიროების შემთხვევაში, მიმტანადაც წავალ, ეს ჩემთვის პრობლემა არ არის“, - აღიარა ვარსკვლავმა ერთ-ერთ ინტერვიუში.

ცუდ დღეშია ფილიპ კირკოროვი, რომელიც საკუთარ გარეგნობაზე ზრუნვაში ათი ათასობით დოლარს ხარჯავს. 55 წლის იუბილეზე მან 20-ზე მეტი სასცენო კოსტიუმი გამოიცვალა, რაც ექსპერტების გამოთვლით, მას დაახლოებით, 400 მილიონი რუბლი დაუჯდა. მედიაში წერენ, რომ ამის შემდეგ კირკოროვმა "ქამარი მჭიდროდ შემოიჭირა", რადგან საიუბილეო კონცერტებზე ბილეთების გაყიდვა გაუჭირდა.

"დრო კარნახობს ეკონომიკას... მე შევამცირე ჩემი უზარმაზარი გუნდი. მხოლოდ ოთხი ადამიანი დავიტოვე, ნამდვილი თანამოაზრეები", - განაცხადა პუტინის მხარდამჭერმა მომღერალმა.

რუსეთის ყველაზე ეპატაჟური სტილისტი, სერგეი ზვერევი შოკირებულია მაღალი ფასებით. ამბობს, რომ მის სერვისზე ბაზარზე მოთხოვნა შემცირდა, ამიტომ მოსკოვში სილამაზის სალონებს ერთი მეორის მიყოლებით ხურავს.

"მოსკოვში ქირა ძალიან გაძვირდა, უბრალოდ, ეს არარეალურია! ჩემს კოლეგებს ხომ ვიცნობ, ყველას ასეთი მდგომარეობა აქვს, მარტო მე არ ვარ ამ დღეში. ბევრმა დიზაინერმა ატელიეები დახურა და სახლში აგრძელებენ ტანსაცმლის კერვას. ისინი ამბობენ, რომ ახლა არაფრის გახსნას აზრი აღარ აქვს. ჩემი მომხმარებლის უმეტესობა საზღვარგარეთ არის წასული. დარჩენილებს კი ახლა არაფერი აქვთ საქმე“, - ამბობს ზვერევი...