ვინ იყო ის 3 ადამიანი, ვინც 1989 წლის 9 აპრილის ტრაგედიას ემსხვერპლა, მაგრამ მათზე დღემდე არაფერია ცნობილი
1989 წლის 9 აპრილის ტრაგედიიდან 33 წელი გავიდა. ეს დღე საქართველოს უახლეს ისტორიაში ერთ-ერთ ყველაზე გმირული და ტრაგიკული დღეა.
ამ დღეს საზოგადოებრივი ერთიანობა ყველაზე მეტად იგრძნობოდა, როდესაც ათასობით ადამიანი საქართველოს დამოუკიდებლობას და თავისუფლებას მოითხოვდა, თუმცა საბჭოთა ხელისუფლების გადაწყვეტილებით, თავისუფლების მოთხოვნით შეკრებილი ადამიანები სასტიკად დაარბიეს და დილის 4 საათზე, კრემლის მითითებით რუსთაველის გამზირზე- საბჭოთა არმიის მძიმე ტექნიკა, შინაგანი ჯარის სპეცრაზმელები გამოჩნდნენ, რასაც უდანაშაულო და თავისუფლებისთვის მებრძოლი ადამიანების სიცოცხლე შეეწირა. 4 ათასზე მეტი დემონსტრანტი კი სხვადასხვა სახის ტრავმით საავადმყოფოში მოათავსეს.
ამ ტრაგიკული მოვლენებიდან 33 წელი გავიდა,მედიაში კი მუდმივად ვრცელდება ინფორმაცია, რომ 9 აპრილის მოვლენების შედეგად 21 ადამიანი გარდაიცვალა, რაც არასწორია, რადგან ამ ტრაგედიამ არა 21, არამედ 24 ადამიანის სიცოცხლე იმსხვერპლა. ამას მოწმობს 2014 წლის 9 აპრილს, ყოფილი პრეზიდენტის, გიორგი მარგველაშვილის განკარგულებაც, რომელშიც აღნიშნულია, რომ 1989 წლის 9 აპრილის მოვლენების შედეგად 24 ადამიანი დაიღუპა. ეს 3 ადამიანი 9 აპრილის ღამეს მოიწამლნენ და დაშავდნენ და მოგვიანებით, რამდენიმე თვის შემდეგ გარდაიცვალნენ.
ესენი არიან: შალვა გოგიძე, ალექსანდრე ადამია და ინგა რუხაძე.
- ambebi.ge უახლოეს მომავალში შემოგთავაზებთ სტატიას მათზე.
ავტორი: თიკო გურაშვილი