"სავარაუდოდ, ჩემი ცხოვრების პირველი "შპიონი" აღმოვაჩინეთ... სახლის ფანჯრის ქვეშ "რუსი ტურისტის იერის მქონე" კაცი ტელეფონზე ვიღაცას ესაუბრებოდა... " - რას წერს ლაშა ბუღაძე

მწერალი ლაშა ბუღაძე სოციალურ ქსელში წერს, რომ საკუთარი სახლის ფანჯრებთან "რუსი ტურისტის იერის მქონე" კაცი შენიშნა, რომელიც ტელეფონზე საეჭვოდ საუბრობდა.

ბუღაძის თქმით, უცხო კაცი თანამოსაუბრეს ეუბნებოდა, რომ ერთი თვე ელოდნენ იმის სიგნალს, რომ საქართველოში ჩამოსულიყვნენ.

"მეგობრებო, ცოტა ხნის წინ, სავარაუდოდ, ჩემი ცხოვრების პირველი "შპიონი" აღმოვაჩინეთ. ჩვენი სახლის ფანჯრის ქვეშ, რომელიც როგორც ჩანს, მოყუჩებულ ადგილად მიიჩნია, "რუსი ტურისტის იერის მქონე" კაცი ტელეფონზე ესაუბრებოდა ვიღაცას... ჩემი ტელეფონი თან არ მქონდა და ჩაწერა თავიდან ვერ მოვასწარით. კაცი რუსულად ეუბნებოდა თანამოსაუბრეს, რომ ჯობდა საღამოობით არ გამოსულიყვნენ, რათა ხალხის ყურადღება არ მიეპყროთ და მაქსიმალურად ფრთხილად ყოფილიყვნენ... რომ 1 თვეა ელოდებიან სიგნალს (!), რათა აქ ჩამოსულიყვნენ, - ასე გვეუბნებოდნენ, 1 კვირაში წახვალთო და არ გავიდა ეს 1 კვირაა, ზუგრჩანთები არც ამოგვილაგებია სიგნალის მოლოდინშიო, - არც დედას უნდა ველაპარაკოთ ტელეფონზე, არც ცოლს, არც არავისო, ყველა კონტრაქტორი ასე იქცევაო...

მარტო ყოფნა რთულია ასეთ პირობებში, სადაც კომუნაკაციაში არ უნდა შეხვიდე არავისთან და ამიტომ ჯობია, ორნი ვიყოთო. "ნე ვისოვივატსია". მას შემდეგ, რაც როგორც იქნა, შევწვდი ტელეფონს ფოტოს და ვიდეოს გადასაღებად (რაც მოვასწარი) და "რუსკი კარაბლის" შესახებ დავუძახეთ, ზურგი შეგვაქცია და სწრაფი ნაბიჯით აირბინა კიბე მთაწმინდისკენ... ეს მოხდა დღეს - 14:30-ზე. ქუჩის კამერებს დაფიქსირებული უნდა ჰყავდეს. მისი პოვნა - სურვილის შემთხვევაში - ადვილი იქნება. ეს უცნაური წარწერები ქუჩებში (რაც უკრაინაშიც ჩანდა ომამდე) და ახლა ამ კაცის აღმოჩენა - საგანგაშო სიმპტომების მატარებელია. რას ელოდებოდნენ "ერთი თვე"? ვინ შემოდის და შემოსულია საქართველოში? ვიმეორებ, ვიდეო და ფოტო მაქვს", - წერს მწერალი "ფეისბუქში" და სუს-სა და შსს-ს მიმართავს: "ველი თქვენს რეაგირებას!"

შეგახსენებთ, სოციალური ქსელის მომხმარებლები წერენ, რომ რამდენიმე დღეა თბილისში უცნაური ნახატები გამოჩნდა, რომელიც ყველა ერთი ფორმის არის, მხოლოდ ფერებით განსხვავდება და სხვადასხვა უბანში გვხვდება. სოციალურ ქსელში ფაქტის შესახებ აქტიურად მსჯელობენ.

"საერთო ჯამში აღმოვაჩინე დაახლოებით 50-მდე მსგავსი ნიშანი, რომელთა მოხაზულობა დაახლოებით ერთნაირია, თუმცა აქვს რაღაც მცირე განსხვავებები.

მაგრამ ახლა ყველაზე მთავარი, ნიშნების 95%+, რომელიც ვნახე, განთავსებულია მიწისქვეშა გადასასვლელებთან, მიწისქვეშა ავტოსადგომებთან, ხიდებთან, შედარებით დიდ ბანკებთან, რომელთაც აქვთ მიწისქვეშა საცავები, უნივერსიტეტების ან სხვა ტიპის საზოგადეობრივი დაწესებულებების შენობებთან, რომელთაც აქვთ მიწისქვეშა ინფრასტრუქტურა და მაღალსართულიანი კორპუსების ფასადის მხრიდან შემჩნეულ სარდაფებთან", - ვკითხულობთ "ფეისბუქგვერდზე" “World Military-ანალიტიკა. სოციალური ქსელი მომხმარებლები ეჭვობენ, რომ ამგვარად გარკვეული ჯგუფის მიერ სტრატეგიულად მნიშვნელოვანი ობოექტების მონიშვნა ხდება.