"ლურჯი ოკეანე" წიგნის პრეზენტაციაზე შემოსულ თანხას უკრაინის მხარდასაჭერ ფონდში რიცხავს
უკრაინის მხარდამჭერ აქციაში გამომცემლობა „პალიტრა L-ც“ ჩაერთო და თემაზე - იდეა, რომლისაც მწამს - შეხვედრა გაიმართა. სპიკერებმა კარლო ბატას მიერ ერთ წიგნად შეკრებილი მსოფლიო ლიდერების ყველაზე დასამახსოვრებელი გამოსვლები მიმოიხილეს. წიგნი - „მსოფლიო ლიდერების მიმართვები, რომლებმაც ეპოქა შეცვალა“ - გამომცემლობის პროექტის, „ლურჯი ოკეანე“ ფარგლებში ქართულ ენაზე ითარგმნა და გამოიცა.
ღონისძიებაზე დასასწრებად გაყიდული ბილეთებიდან შემოსული თანხა სრულად გადაირიცხა უკრაინის მხარდაჭერის ფონდში.
გამომცემლობა „პალიტრა L-მა“ „ლურჯი ოკეანის“ პროექტის ფარგლებში გამოსცა წიგნი „მსოფლიო ლიდერების მიმართვები, რომლებმაც ეპოქა შეცვალა“. ეს წიგნი სულ ახლახან გამოვიდა და ვიფიქრეთ, მკითხველისთვის და ფართო საზოგადოებისთვის მის წარსადგენად შეგვერჩია ფორმატი, რომლის ფარგლებშიც წარმოდგენილი იქნებოდნენ სპიკერები სხვადასხვა სფეროდან. 5-მა სპიკერმა შეხვედრის ფარგლებში ისაუბრა იმ იდეებზე, რომლისაც თავად სწამთ, რის გარშემოც ტრიალებენ და რისთვისაც ამდენი ხნის განმავლობაში იღვწიან. ღონისძიებაზე შემოსული თანხა სრულად გადაირიცხება უკრაინის დახმარების ფონდში. ჩვენ ვცდილობთ, რომ მეგობარ უკრაინას მცირედით, მაგრამ მაინც, მხარდაჭერა გამოვუცხადოთ,“ - აღნიშნა მარიამ გიორგაძემ, „პალიტრა L-ის“ პიარისა და მარკეტინგის დეპარტამენტის ხელმძღვანელმა.
წიგნის პრეზენტაციაზე სპიკერებს შორის იყვნენ: დავით ჩიკვაიძე, ანდრო დგებუაძე, დავით კენჭაძე, თათია დოლიძე და ნინო ზამბახიძე. მათ ისაუბრეს თავიანთ იდეებზე, სიტყვით გამოსვლის ძალასა და გავლენაზე, მსმენელს მსოფლიო ლიდერების გამოსვლების შესახებ მოსაზრებები გაუზიარეს. ღონისძიების მოდერატორი გახლდათ ნატა ასათიანი.
ღონისძიების ერთ-ერთი სპიკერის თათია დოლიძის თქმით, იდეების გაცვლის პროცესმა საინტერესოდ და პროდუქტიულად ჩაიარა.
„ღონისძიების ფარგლებში ვისაუბრეთ იმ იდეებზე, რომლისაც გვწამს, აუდიტორიას გავუზიარე ჩემი მრწამსი სიტყვის ძალასთან დაკავშირებით, რომ მას სამყაროს შეცვლაც შეუძლია და როდესაც ადამიანს შესაფერისი სიტყვები მოეპოვება, არ არსებობს რაიმე, რისი მიღწევაც არ შეუძლია,“ - აღნიშნა მან.
კარლო ბატას კრებული „მსოფლიო ლიდერების გამოსვლები, რომლებმაც ეპოქა“ შეცვალა მოიცავს 38 სხვადასხვა დროში მცხოვრები ადამიანის ყველაზე დასამახსოვრებელ და გავლენიან სიტყვას, რომლებიც დღესაც პოპულარულია და ბევრი პოლიტიკოსი თუ საზოგადოებრივი მოძრაობის წევრი თავის განცხადებებში იყენებს ხოლმე. აღნიშნული გამოსვლები თავის ისტორიულ კონტექსტთან ერთად, ქართულ ენაზეა ნათარგმნი და მისი შეძენა წიგნის მაღაზიებში უკვე შესაძლებელია. ონლაინ შესაძენად კი დააჭირეთ აქ.
