"მეუღლე ბრაზილიელი მყავს, ჩვენი ოჯახიდან სულ სიმღერის ხმა გადის"- ქართველი საოპერო მომღერლის ბრაზილიური ცხოვრება და წარმატებული კარიერა
"გულწრფელად გთხოვთ, ამ ფილმს ძილის წინ არ უყუროთ" - ასე გვითხრა ქართველმა საოპერო მომღერალმა გიორგი გელაშვილმა... იგი ძალიან საინტერესოდ მიიჩნევს იმ ფაქტს, რომ ძალიან ბევრი ქვეყნის კინოთეატრებში გაჟღერდა მისი ხმა ამ საუნდტრეკის საშუალებით!
"ერთ დღესაც საქართველოს კინოთეატრებში გასულ ბრაზილიურ სერიალში ქართველი ტენორის საუნდტრეკი აჟღერდება, ვინ იცის" - ამბობს იგი და ბრაზილიაში წარმატებულ კარიერასა და ბედნიერ ცხოვრებაზე თავად გვიამბობს".
გიორგი გელაშვილი:
- ქართველი ემიგრანტი, ოპერის მომღერალი, ტენორი გახლავართ... 2014 წლიდან ბრაზილიაში ვცხოვრობ და ვმოღვაწეობ, კერძოდ სეარას შტატში , ქალაქ - ფორტალეზაში. მყავს ბრაზილიელი მეუღლე - ლიანა ფოტელესი და 7 წლის ვაჟი - ლუკა. რაც შეეხება ბრაზილიაში ცხოვრებას. მინდა გითხრათ, რომ ძალიან გამიადვილდა აქ ყოფნა. ბრაზილიელები ტოლერანტი, უკონფლიქტო, უშუალო და თავისუფალი ხალხია. მათთან კონტაქტში იმდენად ადვილად შეხვალ, დიდი ხნის მეგობრები გეგონებიან. ასე რომ, 7 წლის მანძილზე ერთხელაც არ მიგრძვნია, რომ უცხო ქვეყანაში ვარ! ყოველთვის დიდი სურვილი მაქვს სანაპიროზე გასეირნების, რასაც შეძლებისდაგვარად ვახერხებ.
ძალიან მიყვარს ზღვა, ეს ის ადგილია, სადაც სულიერ სიმშვიდეს ვპოულობ. მოგეხსენებათ, ხელოვანი ადამიანი ვარ და ბუნებასთან ურთიერთობა ძალიან მიზიდავს. ჩვენდა საბედნიეროდ, სახლის პირობებში ვმუშაობთ და ძალიან მიხარია, ჩემს შვილთან რომ დიდ დროს ვატარებ! ლუკა კარგად თამაშობს ფეხბურთს, რაც გასაკვირი არცაა ნახევრად ბრაზილიელისგან. მინდა გითხრათ, რომ მეც საკმაოდ კარგად ვთამაშობდი... ლუკას სამსახიობო და ცეკვის ნიჭიც აქვს, მოკლედ კარგად ფლობს თავის სხეულს. ჩემი მეუღლე მომღერალი, პროფესორი გახლავთ. ულამაზესი და უძლიერესი, ხმა აქვს. უზომოდ შრომის მოყვარულია. შეუძლია შევიდეს სტუდიაში და მრავალი საათის მანძილზე ვოკალზე იმეცადინოს. მის გრაფიკს პიანისტების სამუშაო პროცესს შევადარებდი, რომელიც მრავალი საათის მანძილზე გრძელდება კარგი შედეგის მისაღწევად! ასე რომ, ჩვენი ოჯახიდან სულ სიმღერის ხმა გადის. ხუმრობით ვიტყოდი, ქედს ვიხრი მეზობლების წინაშე.
- ბრაზილიაში დიდი წარმატებები გქონდათ, ქართულ დღეებზე ჰიმნის შესრულებაც თქვენ მოგანდეს...
- რაც შეეხება ბრაზილიაში მოღვაწეობას, ჩამოსვლისთანავე მიმიწვიეს ერთ-ერთ კონცერტზე სამღერად, სადაც შევასრულე ჯუზეპე ვერდის ოპერა რიგოლეტოდან - ჰერცოგის სიმღერა " Lá donna è móbile" და ასევე ჩემთვის ძალიან საყვარელი შუბერტის „ავე მარია". შემდეგი ეტაპი იყო გამგზავრება სხვა შტატში, საოპერო სტუდიაში, სადაც დიდი გამოცდილება მივიღე დიდ ხელოვანებთან ურთიერთობაში. როგორიც მაგალითად, არის იტალიელი რეჟისორი სტეფანო ვიზიოლი და ასევე ამერიკელი სოპრანო - სინტია ლაურენსი.
ერთი თვის მუშაობის შემდეგ მივიღეთ დიდი გამოცდილება და ასევე ვიმღერეთ საოპერო წარმოდგენებში. შემდეგი ნაბიჯები იყო კონკურსებზე გამგზავრება. პირველი იყო ქ. სან პაულოში "მარია კალასის" კონკურსი, რასაც მოჰყვა მექსიკაში "ლინუს ლერნერის" კონკურსზე მიწვევა. ნახევარფინალურ ეტაპზე ვიმღერე და ძალიან კარგი გამოხმაურება მოყვა. შემდეგ იტალიის საერთაშორისო კონკურსში ვიყავი მიწვეული, ვერდის ოპერაში "ბალმასკარადი" რიკარდოს როლის შესასრულებლად.
ასევე ვარ პედაგოგი და ჩემდა სასიხარულოდ, ბევრი ცნობილი მომღერალი და მუსიკოსი გახდა ჩემი მოსწავლე. აქედან დაიწყო ჩემი ურთიერთობა სხვადასხვა მუსიკალურ პროექტებთან! მაგ: ქ. გუარამირაგას ცნობილ ჯაზ-ფესტივალთან, არაერთი კონცერტი ხელოვნების ცენტრ "Dragão do mar" სიმფონიურ თუ ფილარმონიულ ორკესტრებთან კონცერტები. ერთ-ერთი გამორჩეული პროექტი იყო: " Cenas de Ópera". მე და ჩემმა მომღერალმა მეგობრებმა მოვიგეთ დაფინანსება 3 თვიან პროექტ კონკურსში და შევქმენით საოპერო სპექტაკლი, სადაც ჩართულები იყვნენ რეჟისორები, პიანისტები და მომღერლები. სამი თვის მანძილზე დავდგით და წარვსდექით მაყურებლის წინაშე ერთ-ერთ ცნობილ თეატრში. პანდემიამ სამწუხაროდ, დიდი ხნის მანძილზე გაგვაჩერა, მაგრამ ახლა ნელ-ნელა ვუბრუნდებით ჩვეულ რიტმს, რაც ძალიან მახარებს!
- გვიამბეთ ფილმის შესახებ...
- რაც შეეხება ამ არაჩვეულებრივ პროექტს, რასაც ჰქვია სრულმეტრაჟიანი მხატვრული ფილმისთვის საუნდტრეკის ჩაწერა, ასე დაიწყო: ჩემი მოსწავლე და დღეს უკვე მეგობარი, ცნობილი ბრაზილიელი მუსიკოსი, კომპოზიტორი, მომღერალი ერთ მშვენიერ დღეს მოვიდა ჩემს სტუდიაში გაკვეთილზე და შემომთავაზა ფილმისთვის საუნდტრეკის ჩაწერა. მომასმენინა მისივე შექმნილი მელოდია, რაზეც ხმა უნდა დაგვედო. ძალიან გამიხარდა და დავთანხმდი ამ გამოწვევაზე! მისი სახელი არის ფერნანდო კატატაო, რომელსაც ჰყავს ბრაზილიური ალტერნატიული როკის ჯგუფი" Cidadão instigado" საკმაოდ ცნობილი სან პაულოში და ასევე მის მშობლიურ ქალაქ ფორტალეზაში.
მელოდია შევისწავლე და სტუდიაში ჩაწერის დღეც დადგა. ძალიან ემოციური დღე გამოდგა ჩემთვის და დაუვიწყარიც. სასიამოვნო, საინტერესო და ასევე ძალიან საპასუხისმგებლო მისია მერგო წილად! გეტყვით, რომ არ იყო ძალიან ადვილი ამ რთული ამოცანის შესრულება, ჩემთვის განსხვავებულ მუსიკალურ ჟანრში ძალების მოსინჯვა. თუმცა საოცრად საინტერესოდ მიმაჩნდა ეს ყველაფერი, რაც შეეხებოდა ფილმის სიუჟეტს, სადაც ჩემი ხმა უნდა გაჟღერებულიყო . ჩაწერის დროს სრული თავისუფლება მომცა კომპოზიტორმა და მითხრა, რომ პატარა მონაკვეთი ჩამეწერა ჩემი ინტერპრეტაციით. ჩემდა საბედნიეროდ, ძალიან მოეწონათ და ასე მოხვდა ჩემი ხმა ბრაზილიურ, საკმაოდ ცნობილ ფილმში...
ფილმის პრემიერას დიდი ინტერესით ველოდი. შემდეგ იყო 30 საერთაშორისო კინოფესტივალზე გამგზავრება ამ ფილმის. ძალიან საინტერესოდ მივიჩნიე ის ფაქტი, რომ ძალიან ბევრი ქვეყნის კინოთეატრებში გაჟღერდა ჩემი ხმა ამ საუნდტრეკის საშუალებით! ძალიან საინტერესო ჟანრია და სიამოვნებით ველოდები შემდეგ შემოთავაზებებს. ერთ დღესაც საქართველოში გასულ ბრაზილიურ სერიალში ქართველი ტენორის საუნდტრეკი აჟღერდება, ვინ იცის...
ფილმმა წარმატებას მიაღწია მრავალ საერთაშორისო ფესტივალზე, მათ შორის BFI ლონდონის კინოფესტივალზე, ბრუკლინის საშინელებათა ფილმების ფესტივალზე - საუკეთესო ფილმისა და საუკეთესო რეჟისორის გამარჯვებული - ლუკას კინოფესტივალი (LFF) და ბუენოს აირესის დამოუკიდებელი კინოს საერთაშორისო ფესტივალი, ეროვნული ტერორი Canibais-ის კლუბი...