"სოლთ ბეის" გზა ჭურჭლის მრეცხავობიდან მილიონრობამდე - როგორ გახდა სტამბოლელი ყასაბი პოპულარული და რატომ არის სპორტსმენების ფავორიტი

ნუსრეთ გოქჩე, იგივე "სოლთ ბეი", პოპულარული თურქი შეფია. მას სტამბოლელ სექსუალურ ყასაბსაც უწოდებენ. "სოლთ ბეის" ცნობილი ვიდეო, სადაც ის იდაყვის დახმარებით სტეიკზე მარილს აყრის, 2017 წელს გავრცელდა ინტერნეტ სივრცეში და 2 დღეში 5 მილიონამდე ნახვა ჰქონდა.

"სოლთ ბეი" 1983 წელს, ერზრუმში დაიბადა, ფინანსური პრობლემების გამო, 11 წლის ასაკში სკოლა დატოვა და ყასბის თანაშემწე გახდა. ნუსრეთს ჭურჭლის რეცხვაც კი უწევდა, რათა ოჯახს დახმარებოდა. ოცნებისკენ სწრაფვა ჯერ კიდევ 2010 წელს დაიწყო და სტამბოლში საკუთარი რესტორანი გახსნა.

"ინსტაგრამზე" მას უკვე 38 მილიონი ერთგული მიმდევარი ჰყავს. ბევრი ფანის მიუხედავად, რეალურ ცხოვრებაში პარტნიორი არ ჰყავს და ამაზე არც კი ფიქრობს. ნუსრეთ გოქჩეს ქონება, ბოლო მონაცემებით, 60 მილიონ დოლარს შეადგენს.

"მე ქალების გაბედნიერება მინდა, მათი გაუბედურება კი არა. დილის 3:00 საათამდე ვმუშაობ და ამაზე ნამდვილად გაბრაზდება ჩემი მეორე ნახევარი“, - ამბობს ნუსრეთ გოქჩე.

თურქი შეფი ნელ-ნელა მსოფლიოს ყველაზე მნიშვნელოვან ადგილებში ხსნის “Nusr-Et” სტეიკის სახლებს, მათ შორისაა ნიუ იორკი, დუბაი და სტამბოლი. ნუსრეთმა 1 თვის წინ რიგით მეცამეტე რესტორანი გახსნა, ამჯერად ლონდონში. დახელოვნებულმა კულინარმა Times- თან ინტერვიუში თქვა, რომ მან ყასბის პოროფესია პოპულარული გახადა:

• "ბავშვებს სურთ, რომ იყვნენ "სოლთ ბეი". მათთვის მე კუმირი ვარ, შთაგონების წყარო. ძველად სირცხვილი იყო ყოფილიყავი ყასაბი, ახლა კი ყველას მოვანდომე, ამ პროფესიას დაეუფლოს."

"სოლთ ბეი" სპორტსმენების საყვარელი შეფ-მზარეულია და გარდა იმისა, რომ მის მიერ მომზადებულ სტეიკს მიირთმევენ, ამასთან, ხორცზე მარილის მოყრის უჩვეულო ხელოვნებასაც იმეორებენ. აღნიშნულის ამსახველ ვიდეოებსა და ფოტოებს კი სოციალურ ქსელებში ავრცელებენ. ნუსრეთ გოქჩე ელიტარული წრის წარმომადგენლების მზარეულად მიიჩნევა.

დევიდ ბექჰემი, ნაომი კემბელი, ჯეისონ სტეტჰემი, სნუპ დოგი, ლიონელ მესი და მრავალი სხვა ცნობილი სახე სტუმრობს "სოლთ ბეის" რესტორნებს მსოფლიოს სხვადასხვა წერტილში.

ლეონარდო დიკაპრიომ ასე შეაფასა ნუსრეთის მიერ მომზადებული სტეიკი - "ეს საუკეთესო ხორცი იყო, რაც კი ოდესმე მიჭამია“.

ლონდონში "სოლთ ბეის" ახალი "სტეიკ ჰაუსის" გახსნას ცნობილი სახეები დაესწრნენ. აღსანიშნავია, რომ რესტორანში კერძების ფასებს კრიტიკა მოჰყვა. სტეიკი 630, ბურგერი 100, სპაგეტი კი 80 ფუნტი ღირს. ზოგი კერძის ფასი 1000 ფუნტსაც კი აღწევს.

"სოლთ ბეისთან" სავახშმოდ მყოფმა ერთ-ერთმა ადამიანმა რამდენიმე დღის წინ ინტერნეტში გაავრცელა ქვითრის ფოტო, სადაც ჩანს, რომ საერთო დანახარჯი 6 000 ფუნტს აღემატება. "სპაგეტიში 80 დოლარის გადახდის შემდეგ, ჯობია იტალიურად ამოვიდგა ენა“, - გვხვდება ერთ-ერთი კომენტარი ფოტოზე

ფასების გარდა, ბევრი ჰიგიენასაც უწუნებს ცნობილ შეფს და ხორციანი ხელით პურის ნაჭრების დატეხვისთვის აკრიტიკებს. ვიდეომ, სადაც ეს მომენტია ასახული, ბევრი ნეგატიური გამოხმაურება ჰპოვა ინტერნეტ სივრცეში. კოსმიური ფასების, თუ კერძების უხელთათმანოდ გამზადების მიუხედავად, ეჭვი არავის ეპარება, რომ "სოლთ ბეის" სტეიკის სახლს კიდევ უამრავი ადამიანი ეწვევა და არც ცნობილი სახეები შეწყვეტენ მის რესტორნებში სტუმრობას.

მოამზადა ანა სიბოშვილმა