დღის ფოტო ბათუმიდან - დაღუპული მოზარდების კლასელებმა ტრაგედიის ადგილზე ყვავილები მიიტანეს
ბათუმში, 26 მაისის ქუჩაზე ტრაგედიის ადგილზე კორპუსის ჩამონგრევის შედეგად გარდაცვლილი მოზარდების - 12 წლის დათა შომახიას და 9 წლის ანასტატია დავლაძის კლასელებმა ყვავილები მიიტანეს.
"ანასტასია იყო ძალიან ლაღი, თავისუფალი, საყვარელი ბავშვი, პატარა, სიფრიფანა, რომელსაც ყველაფრის გაკეთება უყვარდა, ხალისიანი, მშობლების მოყვარული, ხშირად საუბრობდა თავის დედაზე და უნდოდა, რომ დედის მსგავსი ყოფილიყო, სულ ამბობდა ჩემი ლამაზი დედიკოო და წავიდნენ ერთად, მისი ლამაზი დედიკო იქნება მთელი ცხოვრება ახალგაზრდა", - ჟყვება ჟურნალისტებთან ანასტასიას პედაგოგი.
ტრაგედიას ემსხვერპლა ორივე ბავშვის დედა - ინგა მეკეიძე და მაია შომახია.
8 ოქტომბერს, კორპუსის ჩამონგრევის შედეგად დაღუპული 9 პირიდან 4 ერთი ოჯახის წევრია - 35 წლის ინგა მეკეიძე, მისი მაზლი და ორი არასრულწლოვანი შვილი - 1 და 9 წლის ბავშვები. ნანგრევებიდან ამოყვანის შემდეგ, ინგა მეკეიძე ბათუმის რეფერალურ საავადმყოფოში 8 ოქტომბერს კრიტიკულად მძიმე მდგომარეობაში შეიყვანეს. ექიმების განცხადებით, პაციენტს ღამის განმავლობაში გული 4 ჯერ გაუჩერდა. დილით, დაახლოებით 10 საათისთვის, ინგა მეკეიძე კლინიკაში გარდაიცვალა.
გარდაცვლილთა შორის არიან ასევე დედაშვილი - მაია შომახია და მისი 12 წლის ვაჟი, რომელიც ტრაგედიის დროს სახლში ონლაინ-გაკვეთილებს ესწრებოდა.