"მითხრა, რომ თუ პოლიციაში ჩავიდოდი, 2 კვირის ჩვილს მომიკლავდა..." - რატომ ემუქრებოდა რძალს შანაი ბრუკის მკვლელობაში ბრალდებული და რა წერია ძმის ჩვენებაში?
"რუსთავი 2" მოკლული შანაი ბრუკის საქმესთან დაკავშირებით ახალ დეტალებს ასაჯაროებს. ტელეკომპანიის ცნობით, შანაი ბრუკის მკვლელობაში ბრალდებული რაფაელ მურსაკულოვი მკვლელობის შემდეგ ცხედრის დაწვას გეგმავდა.
მათივე ინფორმაციით, მურსაკულოვი საკუთარი ოჯახის წევრებს მოკვლით ემუქრებოდა, თუ ისინი პოლიციაში ჩაუშვებდნენ. ცნობილი ხდება ბრალდებულის ძმისა და რძლის ჩვენებებიც.
"ჩემი ძმა საუბრობდა, რომ მას თან ჰქონდა დანა, რომელიც იმ გოგოს ჩხუბის დროს გამოუსვა ყელში, რის შემდეგაც გაგუდა. ხოლო გვამი, რომ არ ეპოვათ, ჩაუცურებია ბუჩქებში და ზევიდან დაუყრია ტოტები... ჩემი ძმის განმარტებით, შემდგომში უნდოდა გვამის დაწვა, რაც ვერ მოახერხა, კერძოდ, ხსენებულის შემდეგ იგი დაბრუნდა სახლში, მოწესრიგდა, შეუძენია ბენზინი და დაბრუნებულა გვამთან, მაგრამ იქვე მიმდებარედ მოძრაობდნენ პიროვნებები, რის გამოც ვერ შეძლო და დაბრუნებულა უკან,"- ნათქვამია ბრალდებულის ძმის ჩვენებაში.
"რუსთავი 2"-ის მიერ მოპოვებულ ჩვენებაში ბრალდებულის რძალი ამბობს, რომ მუსკალოვი მას ახალშობილი შვილის მოკვლითაც კი დაემუქრა.
"რაფაელს ვუთხარი, რომ აუცილებლად წავიდოდი და განვაცხადებდი პოლიციაში, ვინაიდან ფაქტის დამალვა არ შემეძლო. რაზეც მითხრა, რომ თუ პოლიციაში ჩავიდოდი და განვაცხადებდი მის მონაყოლს, მაშინ მომკლავდა და თუ ჩემს მოკვლას ვერ მოახერხებდა, მაშინ მომიკლავდა ჩემი ორი კვირის შვილს და როდესაც პოლიციიდან დავბრუნდებოდი მკვდარ შვილს ჩავეხუტებოდი. მოცემული მუქარის ძალიან შემეშინდა და რეალურად მივიღე. ჩემმა დედამთილმა, რომელმაც მოისმინა რაფაელის მუქარა, მითხრა, რომ არ წავსულიყავი პოლიციაში, ვინაიდან შესაძლებელი იყო მართლა მოეკლა რაფაელს ჩემი შვილი,"- ნათქვამია ჩვენებაში.
შეგახსენებთ, ავსტრალიის მოქალაქე შანაი ბრუკი 30 ივლისს გაუჩინარდა. ახალგაზრდა ქალის ცხედარი მთაწმინდის ფერდზე 31 ივლისს იპოვეს. აღნიშნულთან დაკავშირებით სამართალდამცავებმა რაფაელ მურსაკულოვი დააკავეს. მას ბრალდება საქართველოს სისხლის სამართლის კოდექსის 179-ე მუხლის პირველი ნაწილით (ყაჩაღობა, ესე იგი თავდასხმა სხვისი მოძრავი ნივთის მართლსაწინააღმდეგო მისაკუთრების მიზნით, ჩადენილი სიცოცხლისათვის ან ჯანმრთელობისათვის საშიში ძალადობით ანდა ასეთი ძალადობის გამოყენების მუქარით), 109-ე მუხლის პირველი ნაწილის "გ“ და მესამე ნაწილის "გ“ ქვეპუნქტებით (განზრახ მკვლელობა, ჩადენილი სხვა დანაშაულის დაფარვის და მისი ჩადენის გაადვილების მიზნით; ანგარებით) წარედგინა, რაც სასჯელის სახედ და ზომად 16 წლიდან 20 წლამდე ან უვადო თავისუფლების აღკვეთას ითვალისწინებს.
შანაი ბრუკის დამამძიმებელ გარემოებებში ჩადენილი განზრახ მკვლელობის საქმეზე ბრალდებულ რაფაელ მურსაკულოვს აღკვეთის ღონისძიების სახით პატიმრობა შეეფარდა.