"სომხეთ-აზერბაიჯანის საზღვარზე შემაშფოთებელი მოვლენები გრძელდება" - მხარეები ცეცხლის გახსნაში ერთმანეთს ადანაშაულებენ

ბოლო დღეების განმავლობაში სომხეთ-აზერბაიჯანის საზღვარზე ვითარება დაიძაბულია, მხარეები ერთმანეთს ცეცხლის გახსნაში ხშირად ადანაშაულებენ. აზერნაიჯანული მხარის მტკიცებით, წუხელაც, აზერბაიჯანის არმიის პოზიციებს ნახიჩევანის ავტონომიური რესპუბლიკის სადარაქის რაიონის მიმართულებით სომხეთის ტერიტორიიდან ცეცხლი გაუხსნეს. ეს ინფორმაცია აზერბაიჯანულმა მედიამ ქვეყნის თავდაცვის სამინისტროზე დაყრდნობით გაავრცელა. მათივე ინფორმაციით, თავდასხმას აზერბაიჯანულმა მხარემ საპასუხო ცეცხლით უპასუხა. "აზერბაიჯანის არმიაში არავინ დაშავებულა“, - განაცხადეს თავდაცვის უწყებაში.

თავის მხრივ სომხეთი ამტკიცებს, რომ ცეცხლის გახსნის ინიციატორი აზერბაიჯანი იყო.

"19 ივლისს გვიან საღამოს და 20 ივლისის ღამით, 02:00 საათამდე, აზერბაიჯანის შეიარაღებული ძალები ერასხის მონაკვეთზე დისლოცირებული სომხური პოზიციების მიმართულებით ისროდნენ, ყუმბარმტყორცნების გამოყენების გარეშე.

სომხური მხარის მხრიდან ერასხის თემის ხელმძღვანელი რადიკ ოგიკიანი დაიჭრა. ამ დროს ის ორგანიზებას უწევდა აზერბაიჯანის მოქმედებების შედეგად ტერიტორიაზე გაჩენილი ხანძრის ჩაქრობის სამუშაოებს.

სომხეთის შეიარაღებულ ძალებში აცხადებენ, რომ კონტაქტის ხაზზე არანაირ ცვლილებას არ დაუშვებენ.

"სომხეთ-აზერბაიჯანის საზღვარზე ღრმად შემაშფოთებელი მოვლენები გრძელდება", - დაწერა სამხრეთ კავკასიასა და საქართველოში კრიზისის საკითხებში ევროკავშირის სპეციალური წარმომადგენელმა ტოივო კლაარმა "ტვიტერში".

"ვიმეორებთ მოწოდებას თავშეკავების გამოჩენისა და სასაზღვრო საკითხებში კონსტრუქციული ჩართულობის შესახებ, ვიდრე ისევ მსხვერპლი არ მოჰყოლია ამ დაპირისპირებას. ევროკავშირი მზადაა მხარეების დასახმარებლად“, - წერს ტოივო კლაარი.