"გამიუარესდა ჯანმრთელობა, რაც გამოიხატა სხვადასხვა ორგანოების უკმარისობაში, კიდურების შეშუპებაში და ა.შ. ექიმებთან ვიარე თბილისშიც, მოსკოვშიც..." - ლევან ვასაძის მიმართვა სტამბოლიდან

საზოგადოებრივი მოძრაობა "ერის" ლიდერის, ლევან ვასაძის ინფორმაციით, მისი ჯანმრთელობის მდგომარეობა ბოლო 2 თვის განმავლობაში გაუარესდა.

როგორც ვასაძემ ვიდეომიმართვაში განაცხადა, მიმდინარეობს კომპლექსური კვლევა და გაუარესების გამომწვევი საბოლოო მიზეზი ცნობილი არ არის, თუმცა სურს საზოგადოება დაამშვიდოს, რომ "ყველაფერი კარგად იქნება".

"მოგმართავთ სტამბოლიდან, სადაც ახლა ვიმყოფები სამედიცინო გამოკვლევაზე, არ ვიცი როგორ გაჟონა ამ ინფორმაციამ პრესაში. მინდა ყველას შენდობა ვთხოვო, მოგეხსენებათ ადამიანის ჯანმრთელობა ძალზედ ინტიმური საკითხია. უღრმესი მადლობა ყველას ასეთი მხარდაჭერისათვის. ვალდებული ვარ, რომ გავცე პასუხი იმ შეკითხვებს, რომლებსაც უამრავი ადამიანი მისვამს. გასული 2 თვის განმავლობაში გამიუარესდა ჯანმრთელობის მდგომარეობა რაც გამოიხატა სხვადასხვა ორგანოების უკმარისობაში, ენერგიის ვარდნაში, კიდურების შეშუპებაში და ა.შ. ექიმებთან ვიარე თბილისშიც, მოსკოვშიც და ახლა სტამბულში, რომ აქაც დავეკითხო აზრს. მიმდინარეობს კომპლექსური კვლევა, ჯერ საბოლოო პასუხი არ არის. მინდა ყველა დავამშვიდო, რომ ყველაფერი კარგად იქნება, ნებისმიერ ასეთ დაავადებას მოვერევით და ნუ ინერვიულებთ", - აღნიშნა ლევან ვასაძემ.

ცნობისთვის, ლევან ვასაძე სამედიცინო გამოკვლევის ჩასატარებლად სტამბოლის კლინიკაში რამდენიმე დღის წინ გაემგზავრა.

ვასაძემ ვიდეომიმართვისას "პრაიდის კვირეულთან" დაკავშირებითაც ისაუბრა და ხელისუფლების წარმომადგენლებს აღნიშნული ღონისძიების გაუქმებისკენ მოუწოდა.

"გუშინწინ გავიდა 10-დღიანი ვადა, რომელიც შევუთვალეთ ხელისუფლებას „პრაიდის კვირეულთან“ დაკავშირებით, რადგანაც მათ არ გააკეთეს განცხადება, რომ აუქმებენ ამ ღონისძიებას, ჩვენ ამას არ დავუშვებთ. 5 ივლისს ყველას გეძახით და გეპატიჟებით, მოგიწოდებთ, რომ მივიდეთ რუსთაველის გამზირზე, მე პირადად დილიდან ვიქნები რუსთაველის ძეგლთან.

ამ უმსგავსობის ჩატარება 12:00 საათზე უნდათ და ჩვენ ამას აღვუდგებით წინ, მოვუწოდებ მთავრობას, გააუქმოს ეს ღონისძიება, რათა თავიდან აიცილოს ეს სოციალური დაძაბულობა. მსგავსი ღონისძიებები დაუშვებელია ჩვენს რეგიონში ის სპობს ნებისმიერ რეინტეგრაციის პერსპექტივას ჩვენს ძმებთან - ოსებთან და აფხაზებთან, არცხვენს საქართველოს სახელს მთელ რეგიონში... ეს არიან დაფინანსებული, ხელფასზე მოქმედი ჭინკები, რომლებიც ჯამაგირს იღებენ ყოველგვარ უმსგავსო საკითხებში, ჩვენი ხელისუფლება უბრალოდ ვალდებულია, რომ გაითვალისწინოს ეს ყველაფერი, ნებისმიერი პროვოკაცია, რომელიც იქ შეიძლება მოხდეს, არის ხელისუფლების პირდაპირი პასუხისმგებლობა და იმედს ვიტოვებ, რომ მოუხმობენ კეთილგონიერებას და აღკვეთენ ამ სრულიად დაუშვებელ ღონისძიებას.

ყველაფერს გავაკეთებ, რომ მეც მოვიდე იქ, ისევე როგორც ყველა, ვისთვისაც მნიშვნელოვანია ოჯახი და ტრადიცია. ყველას გთხოვთ დაპირისპირების შემთხვევაში არ დაარტყათ მათ ხელი და მხოლოდ გაიყვანოთ პროვოკაციის ადგილიდან. ძალოვნებს მინდა ვთხოვო, არავითარ შემთხვევაში არ გამოესარჩლონ უზნეობის ზეიმს საქართველოში. არანაირი ჯამაგირი არ გიღირთ თქვენი ქვეყნის შერცხვენად, თუ ეს ჩვენი პოლიტიკოსები ასეთ უსამართლო ბრძანებას მოგცემენ, ნუ შეასრულებთ მას და გაიწიეთ გვერდზე, რადგან ეს არ არის თქვენი საქმე. მოვუწოდებ უცხოური ქვეყნების ელჩებს, განსაკუთრებით კი დასავლური ქვეყნების ელჩებს, რომლებმაც ტრადიციად გახადეს ქართული ტრადიციების დაცინვა და ხელყოფა, ნუ მიაყენებთ შეურაცხყოფას საქართველოს, მის ეკლესიას, დარჩით თქვენს საელჩოებში და ნუ გაერევით ამ პროვოკაციაში, სიბინძურეში“, - განაცხადა ლევან ვასაძემ.