"ბრანჯელინას" სკანდალური სასამართლოს დეტალები და გადაწყვეტილება, რომელმაც ჯოლი გააბრაზა: "არ დავუშვებ, ჩემს შვილებს ზიანი მიადგეთ"

მართალია, ჰოლივუდის ვარსკვლავები, ანჯელინა ჯოლი და ბრედ პიტი წლებია, რაც დაშორდნენ, მაგრამ მათ შორის სასამართლო დავა ამ დრომდე მიმდინარეობს. დავა კი შვილებზე მეურვეობის მოპოვებას ეხება.

ანჯელინას სურს, რომ მხოლოდ ის იყოს მეურვე, თუმცა BBC-ის ცნობით, სასამართლომ ახლახანს სულ სხვაგვარი გადაწყვეტილება მიიღო - პიტსა და ჯოლის ბავშვებზე თანაბარი მეურვეობა მიანიჭა.

გადაწყვეტილება მოსამართლე ჯონ ოდერკიკმა მიიღო - ბრედ პიტს შესაძლებლობა ექნება შვილებთან გაცილებით უფრო მეტი დრო გაატაროს.

პიტი და ჯოლი მედოქსის, პაქსის, ზაჰარას, შაილოს, ვივიენისა და ნოქსის მშობლები არიან, რომელთა შორისაც, უფროსი მედოქსი - 19 წლისაა, ხოლო უმცროსები, ტყუპები, ვივიენი და ნოქსი 12 წლის არიან. აღსანიშნავია, რომ სასამართლოს გადაწყვეტილება არ ეხება უფროს შვილს, მედოქსს, რომელიც უკვე სრულწლოვანია.

სასამართლოს არ ეთანხმება ანჯელინა ჯოლი და აპირებს ბრძოლა გააგრძელოს, რათა ბავშვებზე მეურვეობის უფლება მხოლოდ მას ჰქონდეს. ის აკრიტიკებს მოსამართლეს და აცხადებს, რომ არ დაუშვებს, რომ ზიანი მიადგეს მის შვილებს.

წყაროს ცნობით, სასამართლო პროცესში, რომელიც რამდენიმე თვე გაგრძელდა, ჩართულნი იყვნენ მოწმეები, თერაპევტები, ექსპერტები, ფსიქოლოგები და ა.შ.

აღსანიშნავია, რომ ანჯელინა ბრედ პიტს შვილებზე ძალადობაში ადანაშაულებდა, თუმცა პიტს ეს ბრალდება სასამართლომ მოუხსნა. როგორც ტაბლოიდები წერდნენ, ჯოლიმ ბრედთან განქორწინების გადაწყვეტილება შვილების მიმართ მისი ძალადობრივი დამოკიდებულების გამო მიიღო.გასულ წელს Vogue-სთვის მიცემულ ინტერვიუში ანჯელინამ თქვა, რომ ბრედს ოჯახის "კეთილდღეობის" გამო დაშორდა.

რაც შეეხება პიტს, მან განქორწინების შემდეგ GQ-სთვის მიცემულ ინტერვიუში ისაუბრა და თქვა, რომ ალკოჰოლზე იყო დამოკიდებული და მარიხუანას მოიხმარდა, რამაც დიდწილად განაპირობა ოჯახის დანგრევა.