"ჩვენი ოჯახი შედგება ბევრი თავნება ადამიანისგან..." - ბადრი პატარკაციშვილის ქალიშვილების ლონდონური ცხოვრება და ოჯახური ფოტოები
2008 წლის 13 თებერვალს ლონდონში, საკუთარ სახლში, მოულოდნელად გარდაიცვალა ბიზნესმენი ბადრი პატარკაციშვილი. გარდაცვალების მიზეზი გულის შეტევა გახლდათ. იმ წლებში პატარკაციშვილების ოჯახის გარშემო ინტერესი განსაკუთრებულად გაზრდილი იყო. პოლიტიკურ პროცესებში ჩართული ბიზნესმენის მოულოდნელი გარდაცვალება დიდი ხნის მანძილზე ოპოზიციაში აჩენდა ეჭვს, რომ შესაძლოა, პატარკაციშვილი მოწამლეს, თუმცა ეს ვერსია არ დადასტურდა.
პატარკაციშვილების ოჯახთან იმ წლებში განსაკუთრებულად მეგობრობდა ქართული შოუბიზნესი. პატარკაციშვილების დები, დის შვილები, პოპულარული დიზაინერი სიძე - ავთანდილ ცქვიტინიძე, საზოგადოების ყურადღების ცენტრში იყვნენ.
ბიზნესმენმა შექმნა პროექტი "არტ იმედი", სადაც უამრავი ქართველი მომღერალი გააერთიანა და მაშინ ერთგვარი გამოცოცხლება დაიწყო ქართული შოუბიზნესის. მიუხედავად ბადრი პატარკაციშვილისა და მისი ნათესავების მიმართ განსაკუთრებული ყურადღებისა, თითქმის არასოდეს ჩანდა მისი ოჯახი, მეუღლე და ორი ქალიშვილი.
რძლისა და შვილიშვილების შესახებ ბიზნესმენის დედა, ინტერვიუებში საუბრობდა ხოლმე. ლიკა და ია პატარკაციშვილები, დედა ინა გუდავაძესთან ერთად ლონდონში ცხოვრობდნენ, გოგონებმა თავის დროზე განათლებაც იქ მიიღეს და ორივეს უცხოელი ქმრები ჰყავთ.
ბიზნესმენის გარდაცვალების შემდეგ აღმოჩნდა, რომ ბადრი პატარკაციშვილს მოსკოვში კიდევ ერთი შვილი, ვაჟი ჰყავდა, რომელსაც აღიარებდა, თუმცა ოჯახმა არ იცოდა.
ნათელა პატარკაციშვილი შვილის გარდაცვალების შემდეგ ჟურნალ "თბილისელებთან" ინტერვიუში ყვებოდა:
"ბადრის გოგონები თავიანთ ოჯახებთან ერთად ლონდონში ცალკ-ცალკე ცხოვრობენ, მაგრამ ხშირად მიდიან სტუმრად დედასთან. მათ მაინც ქალაქში ურჩევნიათ ცხოვრება, ინა კი ქალაქგარეთ ცხოვრობს. იქ გადატვირთული ცხოვრებაა, ბავშვები ათას რამეზე დაჰყავთ. როცა დრო აქვთ, ინასთან არიან. ინა ბადრის საქმეებით არის დაკავებული, ძალიან ჭკვიანი რძალი მყავს, ყველაფერს კარგად ართმევს თავს. უფროსი შვილი ლიკა, მამას ისე ჰგავს თვისებებით, საუბრის მანერით, თითქოს ბადრი ლაპარაკობს. იაც და ლიკაც ჭკვიანი გოგონები არიან...".
ლიკა პატარკაციშვილი-ჟმოტოვა დიდი ხანია დაოჯახებულია და ორი შვილი ჰყავს. მამის გარდაცვალების შემდეგ გარკვეული პერიოდი ტელეკომპანია „იმედის“ მმართველობაც ჩაიბარა...
ლიკას ორი შვილი ჰყავს და გარდა იმისა, რომ მამის ბიზნესებს ხელმძღვანელობს, თანამედროვე ხელოვნებით არის გატაცებული. 2019 წელს მამის ხსოვნას მიუძღვნა სპეციალური ინსტალაცია, რომელიც ლონდონის შემდეგ ქართული სახვითი ხელოვნების მუზეუმში იყო წარმოდგენილი.
ლიკამ, როგორ ინტერვიუში ამბობს, გადაწყვიტა, რომ ამ ინსტალაციით იმ 11 წელზე მოეყოლა, რაც მამის გარდაცვალების შემდეგ გამოიარა. ინსტალაცია, სახელწოდებით - "ხმები ჩემს თავში“ საინტერესო აღმოჩნდა აუდიტორიისთვის.
ვიდეოში ლიკა ყვება: "მე ვარ ლიკა პატარკაციშვილი, ბადრი პატარკაციშვილის ქალიშვილი, ეს არის ჩემი ხედვა, ჩემი მონათხრობი ყველა იმ მოვლენის შესახებ, რომელიც ჩემმა ოჯახმა გაიარა ბოლო 11 წლის მანძილზე. ინსტალაციის იდეა იმაში მდგომარეობს, რომ ყველაფერი ლამაზად განათებულია, შემდეგ კი კაშკაშა სივრციდან მნახველი ხვდება ბნელ გვირაბში. ზუსტად ეს დაგვემართა ჩვენც. მიდიხარ ამ გვირაბში და ზუსტად არ იცი, სად მიგიყვანს. და ესეც გამიზნულად, კარგად ვერ ხედავ, სად არის გასასვლელი.
გასასველი არსადაა, მხოლოდ შესაძლებელია გვირაბის გარღვევა, მისგან თავის დასაღწევად. დიდი დრო დასჭირდებოდა იმ ყველაფრის ახსნას, რაც ჩვენმა ოჯახმა გამოიარა, იმ ამბების გამო, რაც მოხდა მამაჩემის და ჩვენი ოჯახის გარშემო, მისი გარდაცვალების შემდეგ, 11 წლის წინ. მართალია, ჩვენი ოჯახი შედგება ბევრი თავნება ადამიანისგან, ჩვენ მაინც ვახერხებდით გუნდურად მუშაობას, რადგან ოჯახი ჩვენთვის პირველ ადგილზეა. ესაა ჩვენი ყველაზე ძვირფასი ქონება. ძალიან ძლიერები ვართ. ბოლო 11 წლის მანძილზე როდესაც მამა გარდაიცვალა, ჩვენ მოგვიწია მისი მემკვიდრეობისთვის ბრძოლა. ჩვენ გადავაწყდით ძალიან ბევრ თაღლითს, დამნაშავეს...“ - ამბობს ვიდეოში ლიკა პატარკაციშვილი.
ლიკას უმცროსი და - ია პატარკაციშვილი 16 წელია რაც უკრაინელ ევგენი გუნიაკზეა დაოჯახებული. წყვილს ორი შვილი ჰყავს და როგორც უფროსი და, ისიც ლონდონში ცხოვრობს.
ბადრი პატარკაციშვილის ქვრივი ინა გუდავაძე რამდენჯერმე მოხვდა ყველაზე მდიდარი ბრიტანელების სიაში. ბოლო მონაცემებით, მისი ქონება 650 მილიონ სტერლინგად იყო შეფასებული.